O ciclocrós internacional ten unha cita este sábado en Pontevedra

Pontevedra volve acoller esta fin de semana unha cita deportiva importante do ciclismo estatal, na modalidade de ciclocrós, coa ollada posta no Campionato de Europa que terá lugar en 2024. O escenario escollido para o CX Cidade de Pontevedra 2023, segunda proba da Copa de España e evento internacional de categoría C1, é a Illa das Esculturas da cidade do Lérez e a data este sábado 7 de outubro. Desde a Federación Ciclismo Galego (FCG), entidade organizadora do evento, confirman a presenza de grandes nomes do ciclocrós tanto estatal como europeo. O seu presidente, Juan Carlos Muñoz, explica a Nós Diario que “falar de Pontevedra é falar de deporte” e pon en valor "o traballo que realiza o Concello que vén de organizar unhas magníficas Finais Mundiais de Tríatlon". O carácter internacional da proba conta, segundo o responsábel federativo, coa facilidade que dá "a boa resposta da cidade" ao que lle engade "a presenza doutras competicións que puntúan en poucos días. É algo moi atractivo para o ciclismo de fóra”. Coincide con esta afirmación o calendario de compromisos que consta de dúas Copas de España "coa incorporación do circuíto das Pontes (comarca do Eume) o 12 de outubro". Este é o motivo polo que, por agora, xa estea confirmada a presenza, entre outras, da selección italiana de ciclocrós liderada polo seu técnico, Daniele Pontoni. Samuel González e María Barros voan sobre a lama Circuíto e horarios “Temos un percorrido que é espectacular, algo comprobado xa nas dúas edicións anteriores da Copa de España”, sinala Muñoz. As experiencias doutros anos serviron para que neste non se realicen moitos cambios, como aclara a Nós Diario o director técnico da Federación e selección nacional de ciclocrós, Alberto del Río. “Variará só nun tramo da zona universitarias por estar en obras”, apunta. A distancia será a mesma que o ano anterior, 3.400 metros, nun circuíto “na súa maior parte chan e moi rápido” que inclúe taboleiros, un caracol, longas rectas mais tamén zonas técnicas así como un dobre paso pola zona de asistencia. As probas iniciaranse ás 9 da mañá cos júniors masculinos para seguir ás 10.15 horas coas júniors femininas. Ás 12 horas será a vez das elites e Sub-23 mulleres e ás 13.15 horas a proba elite masculina. Na sesión da tarde, ás 15.30 horas, será a quenda cadete -feminina e masculina- para seguir ás 16.15 horas cos másters 30, 50 e 60 masculino así como as mulleres másters. Fechará a competición a proba final de máster 40 ás 17.10 horas. A Copa Galiza remata as primeiras xornadas con dominio dos portugueses As opcións galegas O ciclocrós júnior feminino e máster 40 iniciou con bo pé a Copa de España a pasada fin de semana e estará representado no Gran Premio Cidade de Pontevedra por Lorena Patiño (XSM), na primeira categoría, e Marina González (Illas Cíes), na segunda. Ambas as dúas lideran as súas respectivas clasificacións após chegar ao máis alto do podio no circuíto de Las Mestas, en Xixón (Asturias). Ademais, nesa cita tamén destacaron en júnior Aroa Otero (Supermercados Froiz) e Marta Estévez (XSM), que quedaron en segundo e terceiro lugar respectivamente. Tamén haberá opcións en cadete masculino coa presenza de Xian Alvariño (Lynalfa Ponteareas) que terminou cuarto na xornada asturiana. En elite non haberá que perder de vista a actuación de Irene Trabazo (XSM), agora mesmo entre as seis primeiras. “Na actualidade somos unha potencia, sen ningunha dúbida está ligado con ter probas de calidade”, considera o seleccionador galego. En relación ao papel do ciclicrós feminino, Del Río admite que “temos unha boa xeración, con Irene moi vinculada coa selección galega e facendo de referente para as demais”. O seu papel vai máis alá do deportivo "e anima ás demais para que vaian correr fóra". Verdonschot e Orts estrean palmarés no Ciclocrós Lago das Pontes A pasada edición do CX Cidade de Pontevedra en 2022, tivo no máis alto do podio a Ryan Kamp e Lucía González en elite; Luke Verburg e Carlotta Borelo en sub-23; Samuele Scappini e Federica Venturelli en júnior; Roc Cubí e Lorena Patiño en cadete; José Luis Blanco e Beatriz Megido en máster 30; Isaac Suárez e Marina González en máster 40; José Luis Rebollo e Isabel Castro en máster 50; e Abelardo Martínez en máster 60. Campionato de Europa En xuño deste ano confirmouse que a cidade de Pontevedra acollerá o Campionato de Europa de Ciclocrós os días 2 e 3 de novembro de 2024. Será a primeira vez que este evento visite o Estado español e desprazará até a cidade ás estrelas mundiais desta disciplina. “Estamos preparando a cita con moito cariño e moito traballo”, asegura o presidente da federación galega, “queremos facer un evento que quede na retina durante moito tempo e estou seguro que a cidade estará á altura”, engade. Neste sentido, Del Río coincide en que as experiencias anteriores da cidade organizando grandes competicións confirman que "é un referente a nivel mundial" polo que non dubida do éxito que terá este outro evento ciclista.