Celta, Ensino e Ferrol disputan unha xornada chave adiantada pola 'ventá FIBA'

Baxi Uni Ferrol, Ensino Lugo e Celta Baloncesto, os representantes galegos na elite do baloncesto feminino, disputan esta sexta feira a décimo novena xornada do campionato debido a unha nova "ventá FIBA" –fase clasificatoria para seleccións de baloncesto organizada pola Federación Internacional de Baloncesto con vistas ao acceso a mundiais e Eurobasket–. O conxunto ferrolán recibe na súa casa o IDK Gipuzkoa (20.15 horas, Pavillón da Malata), o cal está un posto por debaixo pero con tres vitorias menos. Na primeira volta o Baxi levou o triunfo nun encontro no que foi superior en todos os momentos do partido. Pola súa parte, as luguesas viaxan a Iruña para enfrontarse ao cabeiro da competición, o Ardoi (20.30 horas, Polideportivo Arrosadia). Na primeira volta, no Pazo dos Deportes, o Ardoi foi quen conseguiu a vitoria tras levar o partido á prórroga. As viguesas xogarán tamén fóra da casa para enfrontarse ás cuartas clasificadas, o Casademont Zaragoza (20 horas, Pavillón Príncipe Felipe). Na ida, o Celta perdeu no seu feudo por tan só un punto, polo que este encontro será como un desquite para as de Cristina Cantero. Carmen Portela, a promesa galega do baloncesto e das matemáticas A situación dos tres conxuntos galegos na táboa é ben distinta, o Baxi Ferrol é o actual décimo clasificado, empatado a vitorias con Gran Canaria e Gernika Bizkaia, que ocupan a novena e oitava posición respectivamente; polo que un triunfo no partido desta sexta podería supor o ascenso do conxunto ferrolán aos postos de play-off. Nunha tesitura moi distinta están Celta Baloncesto e Ensino Lugo, décimo terceiro e décimo cuarto clasificados, coas mesmas vitorias que Cadi La Seu que está xusto por enriba deles. Porén, as nosas tamén igualan a triunfos o Araski, que é penúltimo e está en postos de descenso. O Baxi Ferrol está a vivir un dos mellores momentos da tempada tras dúas vitorias consecutivas ante dous equipos da parte alta da táboa, e na décima posición da liga coas mesmas vitorias que o oitavo clasificado, o cal ocupa os postos de play-off. O adestrador do conxunto ferrolán, Lino López, destacou que veñen "de gañar dous partidos da entidade de Girona e Avenida" e que se lles din que antes deses partidos ían sacar dous triunfos "non o crerían". Remarca ademais que "foron unhas semanas incríbeis" Sumado a esta grande actuación en liga está a clasificación a cuartos de final da Eurocup polo que o ambiente no vestiario non pode ser mellor. "As xogadoras están con moita confianza, o equipo está a traballar moi ben, esta semana ao non ter competición polo medio pódese facer máis carga táctica, ademais de tentar recuperar esas xogadoras que teñen problemas físicos ou sobrecarga de minutos", apunta Lino López, e engade que "sobre todo foi unha semana máis tranquila do que é habitual nestes últimos meses". A pesar do bo estado de forma no que se atopa o Baxi, López é claro e non quere marcarse ningún obxectivo e "traballar no día a día, preparar o mellor posíbel o partido da fin de semana sen mirar a clasificación nin o rival e tentar chegar o mellor tanto física como tacticamente", aclara López. "O único obxectivo existente a principio de tempada era facer un equipo competitivo, tentar ser un equipo recoñecíbel, que a afección se identifique co Baxi e é evidente que se conseguiu. E, aínda por enriba, os resultados non poden ser mellores", remarca o adestrador do conxunto ferrolán. De cara ao encontro contra o IDK Gipuzkoa, equipo ao cal xa logrou vencer na primeira volta e que agora recibe na súa casa, Lino López destaca que "alí o equipo fixo un dos mellores partidos da liga en todos os sentidos, tanto ofensiva como defensivamente, pero é certo que agora é un equipo diferente que se reforzou moi ben", e engade que "xa era un grande equipo e agora deu un paso máis, e así o demostrou a pasada fin de semana". Oportunidade para afastarse do descenso O Ensino Lugo afronta un dos momento claves da tempada nunha situación un tanto delicada debido á súa posición na táboa e á proximidade co descenso. "Xaneiro é un mes crucial, o partido contra Agasti en casa, o de Murcia e este son moi importantes", destaca o adestrador do conxunto lucense, Antonio Pernas, explicando que eran tres encontros onde o equipo tiña a posibilidade de sumar tres vitorias. O Uni Ferrol, o equipo que sorprende a Europa e deleita a Ferrol e a Galiza O rival é o cabeiro da competición, o Ardoi, o cal ten una vitoria menos, catro, e unha delas rexistrouna contra o propio Ensino. "É un equipo moi forte na súa casa, dos catro partidos que gañaron, tres foron no seu feudo, menos o que gañaron aquí", apunta Pernas. En relación ao partido de ida, o técnico do Ensino remarca que "hai unha sensación de desquite" posto que o primeiro encontro escapóuselles na prórroga nunha mala actuación das lucenses, aínda que incide en que deberían ter gañado o encontro. O problema que tiveron as galegas neste duelo é o que levan arrastrando toda a tempada é esa capacidade de manter as vantaxes no marcador. O propio Antonio Pernas salienta que a clave do partido desta sexta pasa por "ser capaces de ser un pouquiño máis regulares no partido, posto que o equipo é capaz de obter vantaxes de até oito, dez ou doce puntos pero non sabe administralas e mantelas". Romper a mala xeira fóra da casa O Celta Baloncesto pasa pola mesma situación que o Ensino. Suma até o momento cinco vitorias, as mesmas que as lucenses e que o Araski, equipo que ocupa postos de descenso. Esta sexta visita o Casademont Zaragoza, cuarto clasificado, e un dos conxuntos máis fortes na súa casa, lugar onde só perdeu un encontro, contra o Uni Girona. Cristina Cantero quixo destacar antes do partido que "o Zaragoza é un equipo que sempre está na pelexa por quedar arriba, ten xogadoras de nivel internacional e é un conxunto moi dominante na zona". En relación a isto, a adestradora do conxunto vigués remarca que o partido pasa por tres cuestións claves: "Debemos evitar que nos dominen no rebote, que é algo moi importante para nós e no que estivemos insistindo estes días, en relación a iso buscaremos pórnos ao mesmo nivel físico ca elas dando un punto máis de intensidade. Por último, temos que incidir máis nas perdas xa que nos últimos encontros estamos concedendo moitos agasallos que acaban por ser determinantes no resultado". Precisamente, o conxunto que dirixe Cristina Cantero fixo oficial esta semana a segunda incorporación do mercado invernal, Naomie Alnatas, base francesa que provén do Kangaroos, en Estados Unidos de América (EUA), e que poderá facer o seu debut. O ano pasado militou no Gran Canaria, onde conseguiu unha media de 10,1 puntos, 3,1 rebotes e 2,4 asistencias nos 28 partidos que disputou ao longo da tempada co conxunto canario.