Ana Seabra, adestradora do Atlético Guardés: "Queremos loitar por estar arriba e facer un playoff mellor que na última tempada"

—Que valoración fai do rendemento do equipo tras esta primeira volta? Estamos moi contentas co traballo nesta primeira volta. A verdade é que as xogadoras estiveron incríbeis e fixemos unha primeira volta de moita calidade, e claro que temos que estar moi orgullosas e moi contentas co traballo que fixemos. Foi unha primeira volta moi positiva. —Cales diría que son as chaves dos bos resultados do Guardés? Penso que pasa polo traballo, tanto de xogadoras como de adestradoras, e penso que conseguimos pelexar con case todos os equipos. Temos só unha derrota e un empate ante Rocasa e Bera Bera, respectivamente. Considero que a nosa chave foi principalmente a consistencia defensiva, unha forma de xogo na que temos gran facilidade e na que tivemos un pouco máis de consistencia ca no resto das áreas de xogo e que nos axuda moito a equilibrar os partidos. —Cal é o principal obxectivo para este 2026? Se o facemos igual ca na primeira volta debemos estar moi contentas. Queremos loitar por estar arriba e intentar facer un play-off mellor que na última tempada. Iso require chegar a unha final e sabemos que vai ser un reto moi difícil, mais non imposíbel. —Na liga están esta tempada moi parellas co Bera Bera. Cre que poden disputarlles o título? Bera Bera ten un equipo moi bo, un equipo que podería dicirse que ten dous equipos dentro dun, e respectamos a calidade que teñen. A verdade é que nós queremos pelexar polo noso e o imposíbel non existe. Cremos no traballo, cremos que podemos facer cousas, pero é moi difícil. Non obstante, non vou pór unha imposibilidade en que poidamos conseguir algunha cousa, vou acreditar no noso traballo, acreditar en que é un equipo difícil, pero non imposíbel. —O sábado 17 regresarán á EHF European Cup. Que agardan do seu novo rival, o Erice italiano? É un rival que nos vai traer moitas dificultades, que ten a ambición de chegar lonxe na competición e que está intentando facelo mellor que na última tempada, principalmente en Europa. Seguramente que disputemos un partido na casa e o outro fóra sexa porque de verdade quere pelexar por esta rolda e seguir adiante. Por iso tamén estamos moi concentradas e con moito respecto, porque queren facer o seu traballo e nós temos que facer o noso. Non podemos pensar que é un equipo que non ten calidade, porque ten xogadoras con moita experiencia, como Shandy Barbosa, que xogou coa selección de España, e outras brasileiras e doutras nacionalidades que achegan ao equipo calidade e experiencia. —O obxectivo do Atlético Guardés nesta ilusionante competición europea pasa tamén por chegar á final polo título? Si, penso que a ambición ten que pasar por aí. Non pensamos en perder o próximo partido, pensamos en pelexar, en competir e facelo o mellor que poidamos. Se seguimos adiante quedaremos moi contentas, porque o noso obxectivo principal é chegar o máis lonxe que poidamos. — Como viviu o retorno de África Sempere á cancha? Moi ben. Afri volveu e está igual que sempre. Unha xogadora con experiencia, con calidade, que nos vén axudar pola lesión de Cristina [Cifuentes]. É unha xogadora que nos vai aportar moito, unha xogadora que coñecemos, que ten experiencia e que volveu moi ben. Está medrando e non se nota que estivo media tempada fóra [tras anunciar o seu retiro]. Volveu coas mesmas ganas e coa mesma calidade que tiña e non se sente a diferenza por ser unha África que non estivo nos primeiros meses da tempada. Sentimos que está aportando, que está ben e que nos vai axudar moito. —Vai ser difícil afrontar un calendario tan cargado nestes primeiros meses do ano? Sabemos que con competición europea, coa Copa da Raíña... serán meses duros, porque temos moitos partidos e pouco tempo de descanso. Hai que organizar o equipo, coidalas, adestrar de forma intelixente e poder aproveitar o que hai e seguir adiante nas probas que temos, puntuando en Liga e seguindo adiante na Copa da Raíña e na Copa de Europa. Son os principais obxectivos, pero sabemos que vai ser moi duro. Temos que ter coidado e tratar o equipo dunha forma moi intelixente. —En que estado se atopan as xogadoras? Están todas dispoñíbeis para reiniciar a competición? Si, están todas moi ben e volveron moi motivadas para entrar neste segundo treito da tempada e con ganas de facelo o mellor posíbel. —E de cara á Copa da Raíña, ante o Morvedre, que agardan? Agardamos un encontro difícil na súa casa. Un partido [o vindeiro 4 de febreiro] que é unha final, no que se perdes quedas fóra, e agardamos un Morvedre moi motivado. Nós sabemos o que temos que facer e preparar o encontro o mellor posíbel e respectando moito a rolda, pois sabemos que quen perda marcha. O calendario: Un mes de gran dificultade que culminará contra Bera Bera As de Ana Seabra terán que facer fronte neste mes de xaneiro a importantes partidos da competición ligueira, pois terán que medirse a un total de catro equipos: Lanzarote Zonzamas, BM Granollers, Sporting La Rioja e o partidazo ante Bera Bera. A excepción das donostiarras, os outros rivais son, a priori, bastante máis sinxelos para o Guardés, pois La Rioja está en sétima posición de catorce equipos, Granollers noveno e Lanzarote duodécimo. Aínda así, para a adestradora do equipo miñoto non hai rival pequeno: "Agardamos partidos difíciles. Na liga, cando falamos do 'partido a partido', é porque non temos ningún fácil. Temos a conciencia de que temos que respectar as opoñentes e a nós mesmas, facendo o noso traballo e intentando facelo en cada partido mellor que no anterior". Ademais, a propia técnica salienta o axustada que está a competición nestes momentos: "Sabemos que estamos disputando unha liga moi equilibrada e que cun erro ou cun día malo podemos perder puntos. Hai que estar todos os partidos coa máxima concentración porque nós tamén queremos loitar polos puntos". A nivel competitivo, salienta, "é moi difícil, e temos a conciencia de que todos os partidos, sexan con quen sexan, son complexos", conclúe a técnica portuguesa.