Xoán Manuel Pérez: "As bibliotecas tivemos que reclamar protocolos claros porque houbo moitísima improvisación"

Bamad criticou a actuación das Administracións na xestión da pandemia.
Con respecto aos protocolos de inicio, en primeiro lugar criticamos a actuación da Xunta porque se tomaron decisións dun día para o outro sen informar o persoal traballador, entón si reclamamos que se atendese a demanda non só das e dos usuarios senón tamén do persoal traballador. Cando se abriron de novo os servizos tivemos que reclamar uns protocolos claros porque o que houbo foi moitísima improvisación, como está a pasar agora no ensino. A Xunta seguía os pasos que daba o Estado pero non tiña en conta que os concellos agardaban a que a Xunta crease ou aplicase os protocolos para facéreno eles tamén. Nese sentido as Administracións máis pequenas quedaron bastante colgadas. Desde o ministerio houbo tamén contradicións en relación ás corentenas, 14 días para os libros e 10 para documentos de arquivo, e cando rematou o estado de alarma elimináronse sen máis.

Como é, a día de hoxe, unha xornada nunha biblioteca?
Aparentemente é normal, porque están todos os servizos das bibliotecas activos, pero cos protocolos actuais: distancias entre persoas usuarias, uso obrigado das máscaras, coma en todos os lugares, e hidroxel. A día de hoxe damos todos os servizos pero para un menor número de usuarios simultáneos. No referido aos préstamos, as e os usuarios poden tocar os libros directamente nos estantes, coas debidas precaucións, achegárense ao mostrador etc. Os postos de lectura, debido ao mantemento da distancia de seguridade, son máis reducidos. O que cambia é o referido ás actividades de animación á lectura, no inicio de curso seguramente nos vexamos con máis dificultades á hora de realizalas, mais durante o verán as biblioteacas non están moi activas. Ben porque a situación poida emperorar e haxa que suspender determinados servizos, ben polo tamaños dos espazos, que obriguen a ter moi pouquiña xente nas actividades. No caso de Ames pode haber 14 persoas para cada actividade.

O nivel de préstamos variou polo confinamento?
Nas nosas bibliotecas notouse unha baixada moi grande, de usuarios e de préstamos. Creo que a xente se cortou moito co tema de utilizar os servizos, e vén alguén se non ten que ler ou se é un lector moi empedernido. É certo que ao reporse o servizo durante o verán xa non hai oposicións, por exemplo, e iso implica que dentro da propia biblioteca o número de persoas que estudan tamén sexa moi baixo. É unha situación estraña por esta coincidencia da reapertura na época de verán, non podes saber se a baixada no número de usuarias é por iso ou por medo ao contaxio.

Que nos pode contar do préstamo 'online'?
O préstamo online xestiónao a Xunta e saca normalmente datos anuais, pero o que si podo dicir é que se multiplicou moitísimo, chegouse ao total anual en tan só 3 meses. Ademais en marzo habilitouse o rexistro de usuarios aínda que non se tivese carné de biblioteca.

E que hai do curso escolar?
As bibliotecas tivemos que realizar cambios por mor das capacidades, para manter a separación física, e terá que haber un sistema de numeración ou cita. Nós temos un sistema de número que se lle dá a cada usuario segundo o lugar no que queira sentar, pode haber tantas persoas como número de postos de lectura haxa. A partir de aí, hai que agardar a que se baleire un posto para que o poida ocupar outra persoa usuaria. Pero a xestión do espazo é algo que ten que ir vendo cada biblioteca individualmente.