Volven con forza os Sete Falares a Pontevedra

Se se pode “chorar os sete chorares tamén se pode falar os sete falares” e iso era o que buscaban para o seu evento os organizadores do encontro internacional de contadores de historias, de aí o nome do festival, Sete Falares, que terá lugar na cidade Pontevedra a partir de mañá até o domingo día 27. Pavís Pavós, integrado por Xacobe Rodríguez e Tareixa Alonso, fundou este festival no ano 2012 coa premisa de “cubrir a necesidade de mostrar a xente a figura da contadora de contos, distinguir os relatos para público infantil e adulto e mostrar lugares singulares da cidade” explica Rodríguez en conversa con Nós Diario. Xa na primeira edición deste festival centrado en contar contos para público adulto “a resposta foi moi boa e isto fixo que continuásemos durante todos estes anos”. Mais “veu a Covid e tivemos que cancelar a edición do ano pasado porque foi xusto ao rematar o confinamento e a situación non era a ideal”. Para compensar este feito, Sete Falares volve “con máis forza ca nunca”. Dos tradicionais “catro días intensos que viñamos facendo durante os anos anteriores con 7 artistas, pasamos a 10 días de programación con 17 artistas que realizarán máis de 15 espectáculos”, conta Rodríguez. Para este ano, as artistas son na súa maioría galegas, pero tamén se achegan contadoras internacionais como a mexicana Martha Escudero, a salmantina Eugenia Manzanera e os portugueses Miguel Horta e Antonio Fontinha. O festival “sempre tivo un gran vínculo con contadoras de conto en lingua portuguesa, convidamos a artistas de Brasil, San Tomé e Príncipe e mesmo un ano contamos coa presenza dunha narradora italiana que realizaba a súa sesión en portugués”, comenta o organizador. Contos sobre o mar ou debaixo da terra Antes da chegada da pandemia causada pola Covid-19, o festival “realizábase en lugares singulares da cidade, non só no teatro que é o más clásico, senón tamén en localizacións como o Centro de Interpretación das Torres Arcebispais, onde se relataron historias debaixo da terra, ou no mar, onde chegamos a contar contos nun barco na ría de Pontevedra. Tamén facíamos rutas nocturnas pola cidade, onde realizábamos paradas en certos puntos da cidade para escoitar contos”, lembra Rodríguez. Para esta edición, “e así poder cumprir con todos os protocolos sanitarios, temos só dúas localizacións, a Alameda, ao lado do Palco da Música, e a Praza da Pedreira”. Obxectivo: emocionar Dos máis de quince espectáculos que se poderán desfrutar durante o festival, dous deles pensados para o público infantil, o “obxectivo de todos é emocionar, que non só facer rir, senón tamén transmitir todo tipo de sentimentos ao público e remover as súas conciencias e imaxinacións”, sinala Rodríguez. Para isto, “é preciso crer nas historias que se contan, non é un texto que se memoriza e se solta, senón que tes que interiorizalas, facelas túas, para así conseguir emocionar ao público”, expresa a contadora de contos, Cris de Caldas, en conversa co xornal. O seu espectáculo, que terá lugar na quinta feira, día 24, chámase “Un feixe de contos” e componse dunha “escolma de historias, que buscan exaltar a vida e facer ver ao público que nos preocupamos demasiado por cousas banais que non merecen a pena”, explica a oradora. Estes relatos, “están baseados en contos de tradición oral, de xente maior, que é o patrimonio inmaterial máis grande que temos, e algúns que atopei en antoloxías editadas no país”. A narradora oral, que ademais contará algúns relatos da súa localidade, "e mesmo un conto erótico", entende que “desde o persoal, o local e concreto, pódese chegar ao universal e a conseguir que a xente se sinta identificada na historia”. Pola súa banda, Paula Carballeira, quen abrirá a programación de contos para público adulto mañá, leva case 30 anos dedicándose profesionalmente á narración oral. O seu espectáculo titúlase “Mulleres que viven soas” e componse dunha selección de contos de tradición oral “adaptados por min que buscan dar unha pincelada do mundo no que vivimos, de pequenas cosas como o humor que pode axudar a afrontar os nosos medos”, explica Carballeira en conversa con Nós Diario. As "irmás pequenas" das artes ao vivo Desde que se creou o grupo Pavís Pavós no ano 1996 “notamos como foi en aumento o número de profesionais que se dedican a contar contos no país, sobre todo de cara ao ano 2010, chegando mesmo a ter grandes contadoras de historias galegas que son recoñecidas internacionalmente”, explica Xacobe Rodríguez, quen tamén resalta “a enorme canteira de narradoras orais que existe na cidade de Pontevedra”. Con este festival, as organizadoras tentan pór en valor esta profesión que “semella non ter cabida no mundo da cultura, porque en aspectos como o burocrático, cando queremos optar a recibir axudas, non existe un apartado que nos defina como profesionais e temos que clasificarnos como animadores, por exemplo. Podemos case considerarnos como as irmás pequenas das artes ao vivo, porque en cultura fálase da música, do teatro, do circo, pero non das contadoras de contos”, critica Rodríguez."As contadoras de historias é unha figura que forma parte de todas as culturas e compoñen a nosa tradición oral, axudando a crear un imaxinario colectivo, recordar o pasado, vivir o presente e formar o futuro”, sinala. Por iso o organizador convida a xente a asistir ao festival pontevedrés a descubrir esta figura e desfrutar da desconexión. “Estamos tan estimuladas a diario coas tecnoloxías e os contidos audiovisuais, acostumadas a saltar dunha actividade a outra sen case deterse a pensar que, a xente que veña, agradecerá pararse a escoitar unha historia, sentada, sen facer outra cousa que utilizar a súa propia imaxinación”, conclúe. Programación A novena edición do festival Sete Falares, o encontro internacional de contadoras de historias comeza na xornada de mañá ás 18 horas na Alameda da cidade de Pontevedra. Pavís Pavós, integrado por Xacobe Rodríguez e Tareixa Alonso, contarán unha historia pensada para o público familiar, recomendada a partir dos catro anos. No mesmo día, ás 21 horas na Praza da Pedreira, será a quenda de Paula Carballeira para amenizar co seu relato pensado para un público adulto. A mesma localización e horario albergarán durante a fin de semana as historias de Celso Fernández Sanmartín, e o dúo de María Ortíz e Sofía Espiñeira, o sábado e o domingo respectivamente. Durante a próxima semana, tamén na Praza da Pedreira ás 21 horas, Charo Pita, as Divas de Diván (Vero Rilo, Ángeles Goás e Carme Conde), Lois Pérez e Cris de Caldas, interpretarán cadanseu espectáculo pensado para público adulto . Durante a sexta feira, día 25, o luso Miguel Horta contará o seu conto na Alameda a partir das 19 horas. Pola outra banda, o tamén portugués Antonio Fontinha e a galega Soledad Felloza realizarán senllos espectáculos na Praza da Pedreira. Xa na fin de semana, ao mediodía, a salmantina Eugenia Manzanera interpretará a súa historia pensada para o público infantil. Soledad Felloza será a responsábel do "Vermú de historias" ás 13.30 horas e ás 19 horas, será a quenda de Antonio Fontinha. O sábado rematará na praza cos espectáculos de Miguel Horta, Eugenia Manzanera e a mexicana Martha Escudero, quen abrirá a última xornada do festival, domingo 27, ás 13.30 horas na Alameda. A Gala de Clausura será ás 21 horas na Praza da Pedreira coa presenza de varias oradoras.