Traspielas, o proxecto musical de Su Garrido que recupera as orixes da súa parroquia

Su Garrido Pombo (16 de xaneiro de 1982 en Santa María de Traspielas, en Fornelos de Montes, Vigo), vén de presentar Traspielas, o seu novo proxecto musical como cantautora. Nesta nova proposta Su Garrido celebra a memoria colectiva da súa aldea, Traspielas, a través dunha obra musical, poética e visual xunto con Macarena Montesinos (cello), Iago Ramilo (saxo), Marco Maril (electrónica) e Fran Rodríguez Casal (visuais). “Este proxecto baséase en Traspielas, mais podería ser sobre a aldea de calquera outra persoa”, explicaba Su Garrido na súa conversa con Nós Diario. “A idea comunitaria que está detrás do proxecto é moi importante para nós, é o que queremos transcribir”. Neste novo proxecto musical Su Garrido Pombo recolle, xunto cos cos seus compañeiros da banda, unha idea que tiña desde hai tempo: conseguir que se volvan a cantar esas cancións populares da parroquia viguesa de Traspielas que se “están a perder pouco a pouco”. “Quería buscar un nome para o proxecto que reflectira a súa esencia, e creo que non hai mellor nome que Traspielas porque se transmite e se fala de comunidade. Todos os topónimos están aí durante séculos por algunha razón e se aferran a un significado en si mesmo”, sostiña na súa conversa con Nós Diario. "Unha nova vida ás cancións de Traspielos para pór en valor a cultura popular" “Estas cancións son un legado que a min me pasaron meus veciños e tamén miña familia, en especial miña avoa ,e eu quería darlle vida a estas obras que co tempo estanse a deixar de cantar. Eran cancións que se cantaban en traballos comunitarios, polo que teño a idea de que poder darlle a esas cancións unha nova vida e tamén unha maneira que reflexe o noso estilo de vida contemporánea”. “A música ten algo que nos inclina cara adiante, estas cancións parten do pasado mais ao mesmo tempo proxectan un presente e espérase que sexan cantadas nun futuro. Ese é o desexo para este proxecto, esa esperanza de que sexan cantadas e coñecidas no futuro”, explica. “Facemos arte que ten que ver co pasado, que proxecta o presente e que ten tamén unha continuidade. Creo que a esperanza hoxe en día está aí, aínda que é obvio que desde o auxe das redes sociais ao mellor esa esperanza está máis limitada”. Todos e todas as integrantes da banda teñen un círculo moi próximo coas aldeas e coa terra, aínda que agora teñan "outras vidas”. De feito, Fran Rodríguez, o encargado da parte máis visual do proxecto, tamén se criou na parroquia de Traspielas. “Queremos celebrar toda esa riqueza cultural da Galiza e as fermosas oportunidades da vida”. O proxecto Traspielas mestura a electrónica e a música tradicional coa experimentación con outros xéneros, co obxectivo de dar unha nova vida ás cancións da parroquia para por en valor a comunidade e a cultura popular do territorio. A banda ten pensado gravar o proxecto en disco e por iso abriron un crowdfunding co que os e as participantes recibirán unha recompensa como o vinilo, o CD ou mesmo entradas para un concerto exclusivo na aldea de Traspielas, dependendo da achega económica acadada polos interesados e interesadas. “Comezamos co crowdfunding hai uns trinta días e vai moi ben. Pedimos case 7.000 euros e estamos xa na metade”, confesa Su Garrido a Nós Diario. “Na Galiza temos bastantes experiencias comunais, a idea do crowdfunding vén dese concepto comunitario galego”.A artista engadiu tamén que así podían darlle á oportunidade á xente para que colabore con nós porque o mellor é presentar música dunha maneira colaborativa. É unha obra comunitaria súper bonita”. "A arte ten que ver co pasado, co presente e co futuro" A idea de comunidade está moi clara neste proxecto porque “esas cancións foron creadas, bailadas e cantadas en comunidades, e iso é o que máis nos motiva fronte ao mundo individualista e unha das razóns que queremos seguir adiante con este estilo”. “Nós cantamos e tocamos, mais como digo, para bailar ten que haber xente e iso o temos moi interiorizado no noso grupo”, engadía a cantautora orixinaria de Vigo. Outros proxectos de cara ao futuro Agora mesmo, o grupo musical está centrado en Traspielas como proxecto principal, mais non descartan que nun futuro poidan realizar máis iniciativas desta índole. “Dedicarse á música supón moito traballo, pois ademais de crear cancións e compoñer discos podes ter entrevistas e tes que contactar con xente, por exemplo”, admitía Su Garrido na súa conversa con Nós Diario. “Agora mesmo estamos centrados en Traspielas que, como proxecto principal, é moito traballo, leva moitísimas horas de ensaio, admitía. "Non podería ter feito nada disto se os meus compañeiros e compañeiras non fosen tan xenerosos co seu tempo. Hai unha xenerosidade detrás deste proxecto que é incríbel, é imposíbel pagar o tempo que levan eles e elas detrás de todo isto”. A artista viguesa mostrouse agradecida cos seu equipo de traballo por compartir con ela todo o tempo de traballo para sacar adiante o proxecto e a paixón por un proxecto cultural coma este que pretende recuperar esa cultura musical da parroquia de Traspielas, en Fornelos de Montes. Su Garrido, cantautora que persegue as súas raíces Su Garrido Pombo ten tras de si obras musicais como “Rúas do Pracer”, “A Horta do Berbés”ou "Miudiño", entre moitas outras. No seu estilo musical adoita mesturar diferentes e variados xéneros, desde o jazz, o tradicional, o folk e a música de autora. No 2019 publicaba o seu primeiro álbum en solitario titulado “Queda a vivir aquí”, co que gañou Concurso de Fran Narf da Deputación da Coruña. Tamén nese ano conseguía facerse co Premio Martín Códax na categoría de música de autora, galardón que volvería gañar catro anos despois co seu traballo en solitario “Patios de Luz”. Un longo traballo de documentación Para levar adiante o proxecto, o grupo utilizou pezas tradicionais recompiladas na parroquia de Traspielas, así como proxeccións con imaxes actuais e de arquivo. O que queren conseguir con esta iniciativa, segundo a propia Su Garrido, é revitalizar estas cancións tradicionais da parroquia nunha proposta artística contemporánea que valora a cultura comunitaria e popular dun territorio. Achegar as raíces e as orixes musicais da súa terra é para a cantautora un privilexio, e máis aínda transmitindo ese concepto de comunidade e de unión que "tantas veces se mirou e se mira día a día na Galiza".