O Salón do Libro Infantil transforma Pontevedra en capital da lectura

O potencial lúdico da lectura queda patente no lema escollido para este ano polo Salón do Libro Infantil e Xuvenil de Pontevedra: Libros para xogar. Poesía, narración de contos, sinaturas de libros, obradoiros de escrita, faladoiros e encontros lectores son parte desta edición, mais tamén teatro, música, danza, espectáculos para bebés ou andainas, ademais de programacións especiais para conmemorar o 23 de abril, Día do Libro -cunha troca de libros e apertura en horario continuo- e para os días 1 e 2 de maio, que contarán, ao ser festivos, con horario e programación similar á da fin de semana. En total, haberá máis de trescentas actividades entre a cidade e as parroquias rurais, que circulará a Rodalibros, unha furgoneta- biblioteca que transporta contacontos e actuacións. O Salón do Libro de Pontevedra renderá homenaxe a Manuel Lourenzo Residencia artística Nesta edición, a segunda Residencia Artística convocada polo Salón do Libro da man da asociación Galpón Lab, seleccionou Laura Tova e Noemí Llantada para gozaren dunha estancia no taller da asociación do 24 ao 30 de abril, onde desenvolverán un proxecto artístico conxunto utilizando diverso mobiliario urbano como soporte. Laura Tova é unha contadora de historias cuxa ferramenta preferida é a ilustración. Noemí Llantada é unha ilustradora que usa o papel, a madeira ou as paredes para expresar a súa obra creando obxectos únicos. As súas ilustracións falan desde o humor das loitas cotiás contra a frustración. Ademais, botará a andar a I Escola de Escrita Xuvenil, do 26 de abril ao 6 de xuño, que terá como froito unha publicación recompilatoria dos contos producidos. O Salón do Libro gaña o primeiro Premio do Público Culturgal Música e libros O Salón do Libro comezará mañá cun espectáculo inaugural, Libros para xogar, ás 18.30 horas, creado especificamente para o Salón, conducido por Aldaolado -María Lado e Lucía Aldao- do que formarán parte o Coro do IES A Xunqueira I, a Escola de Danza Ballet Galicia, a Chouque Big Band e a representación de Colombia, país invitado, da man de Carolina Rueda e Diego Alejandro Ruiz. Outro espectáculo no que tamén estarán presentes literatura e a música ao vivo estarán moi presentes: Son de Contos, o sábado 22 ás 19 horas, da man da Asociación Amigos da Ópera de Santiago de Compostela que contará co Orfeón Terra Nosa, a Banda Municipal de Santiago, a soprano Clara Panas e Ledicia Costas como narradora. Un proxecto de Vicente Couceiro a partir dos textos de Manuel Lourenzo González e Fina Casalderrey, musicados por Fernando Ruibal e Julius Andrejevas. O Salón recuperará Imos cambiar o mundo!, unha historia de Fina Casalderrey musicada por Néstor Blanco que tivera a súa estrea en 2020, o ano da pandemia, en medio dunhas medidas sanitarias que impediron que chegase ao público en condicións normais. Agora poderá verse sen restricións, o sábado 29. E tamén estarán presentes en Pontevedra as colaboracións habituais con entidades musicais locais como a da Orquestra Sinfónica de Pontevedra, que presentará o 1 de maio, ás 19 horas, Brinca, unha ópera infantil interactiva de Brais González na que colabora o Coro Luís Álvarez Limeses. Ou Cantando e xogando do Coro Infantil do Conservatorio Manuel Quiroga o día 2 á mesma hora. Ademais, Pakolas estreará Ramona pequena vai á Lúa e Magín Blanco presentará Xogando con cores e cancións. O Salón do Libro entre as mellores iniciativas culturais do ano 2020 Exposicións e homenaxes Até 13 exposicións ofrecerá o Salón, todas elas no Pazo da Cultura agás a que se inaugurará o día 22 no Museo de Pontevedra, Había outra vez, que mostrará obras de Belén Padrón, Itziar Ezquieta, Manuel Figueiras e Xosé Carlos Seoane a partir dun texto de Manuel Lourenzo González, a quen se homenaxea nesta edición do encontro e que tamén é protagonista doutra exhibición, Cousas dos libros, que reúne obxectos de todas as clases "que nalgún momento tomaron parte en relatos, ben como complementos dos personaxes ou das accións, ben como auténticos protagonistas". A outra homenaxeada polo Salón deste ano, a ilustradora Maifé Quesada, será a protagonista doutra exposición que mostrará as obras dunha pioneira do xénero na Galiza que recibiu distintos recoñecementos polo seu traballo, perto dun cento de contos infantís e xuvenís e máis dunha decena de libros de texto. Unha obra que a fixo acredora do premio White Ravens da biblioteca de Munich e que a levou a ser seleccionada como unha das mellores ilustradoras do Estado na Bienal Internacional de Ilustración de Bratislava. Outras exposicións mostrarán a historia do xogo, Os xogos do mundo e o mundo dos xogos, con pezas procedentes do Museo Etnolúdico de Galiza; traballos do alumnado da escola de banda deseñada O Garaxe Hermético; xogos populares da Galiza, nunha colaboración do Consello da Cultura Galega e o Observatorio do Patrimonio Lúdico Galego para facilitar a achega aos xogos tradicionais; ou videoxogos de salón protagonistas do ocio a finais do século XX e inicios do XXI, nunha área de xogo a cargo do MUVI, o Museo do Videoxogo de Cangas. A literatura infantil atopa voz e música Mediación lectora desde diversas perspectivas Ismael Ramos -Premio Nacional de Poesía Xove 2022- e Ana Garralón -Premio Nacional de Fomento da Lectura-, serán dous dos referentes do V Congreso de Mediación Lectora que decorrerá no marco da nova edición do Salón do Libro. O congreso realizarase os días 20 e 27 de abril e 4 de maio, no salón de actos do Pazo da Cultura, e achegarase á mediación lectora desde diversas perspectivas: o videoxogo, a radio, o teatro, a arte, a narración oral, a poesía ou a ilustración. Así, na unión entre a imaxe, a creatividade e o xogo internaranse Iván R., Itziar Ezquieta e Begoña Paz; Esther Carrodeguas explorará a expresión teatral como xogo; Hematocrítico mergullarase na escrita divertida e Ana Garralón, na lectura dos libros informativos. O tratamento doutras linguaxes e soportes será abordado por Rede Espora, que se centrará na radio e podcasting para a mediación lectora, e por Silvia López, quen convidará a indagar nas posibilidades do emprego dos videoxogos nas aulas. A necesaria inclusión será o punto de referencia de Manuela Vázquez, ao abeiro dos xogos nos patios inclusivos e de Sonia Hermida, quen se deterá na relación entre literatura infantil e xogo. Censuras na literatura para nenas e nenos