Sabela Mendoza na MIT de Ribadavia: falar do presente desde diferentes lugares e linguaxes

"Un plan de dirección que se fai cargo –desde o respecto, a humildade e o compromiso– do legado cultural da MIT de Ribadavia, ao tempo que abre novas vías para seguir imaxinándonos colectivamente e relacionándonos co panorama escénico e cultural galego e internacional". Con esta tarxeta de presentación aborda Sabela Mendoza o cargo de nova directora da Mostra Internacional de Teatro de Ribadavia (O Ribeiro), despois de obter a máxima puntuación no proceso de licitación convocado polo Concello. A celeridade con que se desenvolveu o proceso e o pouco tempo que resta para abrir o pano da 41ª edición do encontro non parecen minguar a fe de Mendoza no seu proxecto, aínda que confesa que son moitas as frontes que ten que atender. "Agora mesmo estamos traballando nas bases do Premio Abrente de Textos Teatrais, que faremos públicas en breve", explica Mendoza en conversa con Nós Diario, "e tamén houbo que atender cuestións administrativas cos principais apoios que ten o festival, que son, á parte do Concello de Ribadavia, o Ministerio de Cultura, a Axencia Galega de Industrias Culturais (Agadic) e a Deputación de Ourense". "Para este ano, loxicamente, temos pensada unha edición de transición na que, mantendo os compromisos adquiridos pola anterior dirección, comezaremos a introducir de forma paulatina as novas liñas de acción", sinala. A 40ª edición da MIT Ribadavia foi a despedida do seu director, Roberto Pascual Redefinir o contemporáneo Mendoza fala en plural porque o seu proxecto incorpora unha subdirección que ocupa a creadora, directora, investigadora e intérprete Gena Baamonde. Ambas teñen unha longa traxectoria no campo da creación contemporánea, malia que Mendoza matiza que o seu traballo na MIT abranguerá un abano máis amplo de propostas. "O contemporáneo pode adquirir formas moi diversas: teatro, novas dramaturxias, danza e artes do movemento, performance, circo, instalación escénica, arte de acción, recital escénico… A nosa intención é manter e expandir os valores e liñas de acción da MIT de Ribadavia –a conxunción de "experiencia, tradición, vangarda" que caracteriza o festival–, seguir afondando nas liñas programáticas habituais –nomes internacionais de referencia, hibridación de linguaxes, talento galego emerxente e consolidado, coproducións, residencias, premios…–, ao tempo que queremos sumar novas propostas e iniciativas. No fondo, trátase simplemente de falar do presente desde diferentes lugares e con linguaxes diversas ", asegura. Mostra de Teatro Abrente: transformar a sociedade a través da escena Axente dinamizador Esas novas propostas teñen no punto de mira o apoio á creación galega, a facilitación de espazos de encontro e de oportunidade para o ecosistema cultural da Galiza, a aposta pola diversidade e pluralidade na curadoría, a construción de redes de colaboración –especialmente con Portugal– e a expansión de actividades de mediación e de participación cidadá. "Sentímonos identificadas co espírito da MIT de Ribadavia e o noso propósito é seguir expandindo esa vocación de ágora, de praza pública aberta, inclusiva, disruptiva e diverxente á que acudimos para celebrar a reunión e para ensanchar os nosos horizontes. Queremos apoiar procesos de creación e produción, abrir espazos de encontro e diálogo cos públicos, divulgar a través doutras actividades de formatos non escénicos, construír redes de colaboración con outros axentes e citas culturais... En definitiva, facer un festival que non se limite a propor a exhibición de espectáculos, senón que se converta nun axente cultural e dinamizador tanto para a comunidade artística e profesional como para a sociedade en xeral", sostén. Ademais, Mendoza fai fincapé nunha filosofía que percorrerá de maneira transversal toda a actividade da MIT: "Defendemos e reivindicamos a reconstrución das memorias e a revisión e rescate de xenealoxías emancipatorias. Compartimos un enfoque feminista, ecoloxista, situado na defensa da xustiza social e da vida digna, que pasa sen dúbida por ter acceso a unha vida cultural de calidade e proximidade, como a que ofrece a MIT de Ribadavia", declara. A historia dos anos en que o teatro galego se recoñeceu a si mesmo Respecto polo legado O respecto polo traballo desenvolvido polo anterior director da MIT, Roberto Pascual, e pola longa historia que hai detrás do festival está moi presente nos plans de Mendoza, cuxo proxecto dista moito da tabula rasa que moitas veces se pretende levar a cabo cando existe un cambio de dirección. "Non imos cambiar unha mostra que xa é de todas as galegas e os galegos. Para nós é un reto de gran magnitude facernos cargo da MIT porque, se algo conseguiu, foi transformarse nun festival moi popular sen renunciar á máxima exixencia na súa vontade de combinar pracer estético e pensamento crítico. Hai moito camiño andado e moitas cousas asentadas, moitas persoas e desexos involucrados; hai un festival que é de todas as persoas que pasaron por el e que está sempre aberto a ser tamén das persoas por vir. Por iso non podemos facer outra cousa que partir dese legado para seguir construíndo", conclúe. Escenas en tránsito Na conversa con Sabela Mendoza abrollan os temas que ocupan agora a súa mente e, malia que non pode avanzar nomes –apenas está comezando a deseñar o programa–, si que adianta que quere "ampliar o espazo que ocupan os espectáculos de rúa, pero buscando aqueles que proporcionen unha maior dose de reflexión e de pensamento crítico". "Estamos convencidas que o público de Ribadavia exixe dar un paso máis alá de unha boa animación de rúa", di. A autoexixencia e o compromiso co público que se marca a nova directora da MIT reflíctese no leit motiv escollido para a súa proposta de dirección: Escenas en tránsito. "Buscamos unha actividade escénica que transite dunha linguaxe a outra, dun corpo a outro, dun territorio a outro. Acudir ao teatro é, como toda experiencia artística, unha intensificación da vida. Pero ademais, nas artes escénicas dáse esa especial convención de compartir un tempo e un espazo únicos, o que supón unha intensificación da vida compartida. Cremos firmemente na potencia da arte e da cultura para sermos libres, para pensarnos individual e colectivamente, entender e construír o mundo que nos rodea desde o respecto, a tolerancia e os coidados. Cremos que e pode construír unha vida mellor, un mundo mellor", asegura Mendoza a este xornal.