Rosa Cedrón e Opus One enchen o Palau da Música coas obras primas de Mike Oldfield

Apenas quedan unhas horas para que comece o concerto, o último ensaio acaba de rematar, e o Palau da Música (Barcelona, Catalunya) está a piques de colgar o cartel de 'non hai billetes'. Neste contexto, Rosa Cedrón e Xavier Alern atenden Nós Diario. Ela, unha das divas tocadas pola variña de Mike Oldfield, interpretará como cantante solista Ommadawn. El, director de Opus One, é o máximo artífice de que isto sexa posíbel. Até 28 músicos e músicas sobre o escenario para interpretar a obra prima de Oldfield "co máximo rigor posíbel". No orfeón catalán acompañan a Opus One un quinteto de percusión africana e un coro de cinco crianzas, un sexto guitarrista, un arpista, un trompetista, un segundo percusionista e a propia Rosa Cedrón, que tamén tocará o violonchelo. Rosa Cedrón e Xavier Alern: "Mike Oldfield lembra Santa Cristina como algo alucinante, queremos volver traer a súa música á Galiza" "Faime moitísima ilusión, sempre o dixen, Ommadawn para min é algo tan grandioso, é estratosférico poder interpretalo", di Cedrón. "Lévame a sitios que non me leva outra música. Mike sábeo, cando tiven oportunidade díxenllo", engade. "Para min non é só o seu mellor disco, é a miña obra preferida, de todas. De non ser por Ommadawn, eu non sería guitarrista, decidín selo con 13 anos por este disco", sinala Alern. "Ten algo que sobrepasa o que é a música, non sei até que punto el é consciente", afirma o director. "Eu creo que hai en Mike unha parte moi espiritual, e transcende, en particular nesta obra, esa conexión con algo que está por riba de todo", referenda Cedrón. "Nas voces [en Ommadawn intúese claramente o gaélico], a partir de certo momento, Mike empezou a tirar da súa ascendencia irlandesa, dese modo de cantar, desas melodías da tradición das illas británicas, da música celta, talvez por iso tivo unha conexión coa Galiza", explica Alern. 'Tubular Bells' Antes de interpretar Ommadawn, Opus One tamén fixo onte gozar o público do Palau con Tubular Bells. "É o gran reclamo moitas veces, presentámolo publicamente hai tres anos xa, en 2023, cando foi o 50 aniversario, aínda que variamos músicos, si que o temos bastante ensaiado", relata o director da orquestra. Transcribir a música "O que está facendo Xavier é incríbel, e ademais faino desde un amor absoluto pola música de Mike Oldfield e cunha meticulosidade que non sei como pode", sinala Cedrón. "Transcribir as obras de Mike pode ser un caos, hai cousas que escapan á lóxica en forma, harmonía ou tempo, é algo titánico, só transcribilo", afirma a música. "Non vexo Opus One como unha banda tributo, para min é un movemento de conservación e dignificación, non de obras pop ou rock, senón do que é, de música sinfónica, e desde unha aproximación moi académica. É moi necesario, e talvez non só con Oldfield, senón con moitas outras figuras da época", sinala. "Hai moita xente que o está facendo moi ben [no ámbito das bandas tributo], mais aquí hai algo máis", explica a galega. Rosa Cedrón xunto á orquestra Opus One, no Palau da Música, en Barcelona (Catalunya), este 13 de febreiro, interpretando 'Ommadawn', de Mike Oldfield. (Foto: Santi Puig) "Aproximeime á música de Mike Oldfield do mesmo modo que o faría con calquera outro compositor, porque eu son músico de música antiga, agora mesmo estou nun proxecto no que facemos música do século XV con instrumentos reconstruídos, con criterios de reconstrución histórica e con transcricións feitas por min da notación antiga, e para min isto é exactamente o mesmo", sinala Alern. "Irrompemos nun momento no que hai grupos tributo mais, con todos os respectos, non é o mesmo", afirma o músico. "O que acontece é que Oldfield non estudou nun conservatorio, non escribiu para formacións instrumentais clásicas, mais por exemplo, Incantations, o seu cuarto disco, é unha obra de música contemporánea con pleno dereito, e os discos anteriores, como é o caso de Ommadawn ou Tubular Bells, o que ocorre é que os dispositivos instrumentais son tan inusuais que son moi difíciles de clasificar", di. A dificultade do proxecto "A un programador, se lle pides 25.000 euros para pagar unha orquestra sinfónica, vai dicir que si, mais se llos pides para pagar un grupo de guitarristas eléctricos máis cuartetos de corda, pero cunha percusión africana, e non sei que máis, vai quedar moi sorprendido e vaino pensar moito", destaca Alern. "Mais digo unha cousa, estamos a piques de colgar o cartel de 'non hai billetes', é a primeira vez, e facémolo coas dúas grandes obras de música instrumental de Mike Oldfield e sen as súas cancións. Hai un público, e canseime de recibir incluso mofa por parte dos produtores", reivindica. "Gustaríame tocar tamén Incantations, mais preciso un encargo do Palau, ou doutro auditorio, porque ten un grupo instrumental moi grande, e transcribir unha pequena orquestra de cámara que todo son cordas, é máis complicado", acrecenta. Patrimonio da Humanidade A interpretación de Opus One é especial de por si, mais éo aínda máis polo lugar no que ten lugar. En 1997, a Unesco incluíu o Palau na súa relación do Patrimonio da Humanidade. "Nunca sen Opus One actuara alí, é moi máxico. Non o conseguín con Luar na Lubre nin na miña época clásica, foi grazas a Xavier, e agora repito", conclúe Cedrón. O Palau, un modelo que apoia a música e o patrimonio Alén de ser especial polo propio edificio, que é Patrimonio da Humanidade, o Palau tamén o é pola súa xestión. A misión da Fundació Orfeó Català-Palau de la Música Catalana é promover a música, cunha especial atención ao canto coral, o coñecemento e a difusión do patrimonio cultural, así como colaborar na consolidación da cohesión social, explican desde a institución. "É o único auditorio do mundo que creu que a música de Mike Oldfield podería ser interesante para o público", salienta Xavier Alern, director de Opus One. Próximo paso: teatro Estar nun lugar como o Palau supón un escaparate para Opus One e para poder desenvolver novos proxectos. "Despois de Ommadawn imos comezar a traballar cunha importantísima compañía de teatro, imos coller Tubular Bells, e imos darlle toda unha volta", relata Alern. "E oxalá vaia moi ben o concerto de mañá [por onte], porque os directores desta compañía de teatro van estar alí, e eu quero venderlles tamén Ommadawn, quero facer un espectáculo con Ommadawn e Tubular Bells", acrecenta. "Se isto sae adiante vai ser un antes e un despois, porque estamos falando dunha compañía [non revela o nome] que traballou por todo o mundo e ten un prestixio incríbel", conclúe o director de Opus One.