A primeira longa de Maureen Fazendeiro chega aos cinemas

A película As estações, a primeira longametraxe en solitario de Maureen Fazendeiro, chegará aos cines de todo o Estado o 9 de marzo, tras a súa estrea en competición no Festival de Cine de Locarno.

Dirixida e escrita por Fazendeiro, con fotografía de Robin Fresson e Marta Simões, montaxe de Telmo Churro e da propia directora, está producida pola empresa galega Filmika Galaika, a empresa portuguesa O Som e a Fúria, a empresa francesa Norte Productions e a empresa austríaca Nabis Filmgroup, con distribución a cargo de La Machina.

A película, que supón o debut en solitario da cineasta -codirectora de Diarios de Otsoga (2021) e coguionista de Grand Tour (2024), ambas con Miguel Gomes- ofrece unha viaxe polas diferentes épocas do Alentexo portugués, baseada na relación entre os seus habitantes e a terra.

Fazendeiro captura a historia oral da rexión a través de cartas, cancións e testemuños de agricultores, pastores e nenos, así como a correspondencia dos Leisner, pioneiros no estudo dos monumentos megalíticos na península Ibérica. 

Concibida como unha "película arqueolóxica", a obra propón unha aproximación ao territorio que transcende os límites do documental tradicional, explorando como o cine pode conectar diferentes capas de tempo, memoria e imaxinación nun único espazo.

Rodada na rexión do Alentexo, a película tamén incorpora as voces de arqueólogos, pastores, apicultores, poetas e traballadores rurais, configurando unha paisaxe en transformación, impregnada de historia, experiencia e narrativa.