Os ritmos afrobrasilerios aterran en Compostela no décimo aniversario de Trópico de Grelos

 

Os primeiros dous días do mes de xuño terán lugar un conxunto de actividades “abertas ao público de todas as idades” de man de Trópico de Grelos, a emblemática a asociación de percusionistas de Compostela. Para celebraren o seu décimo aniversario, este ano propoñen un cartaz que oferta obradoiros de percusión, danza, circo e capoeira e mesmo concertos, no marco da V Xornada de Percusión Afrobrasileira. E todo de balde.

Amais, para refrescar ao público, a organización propón unha sesión vermuth e xantares e ceas populares. Como desenlace do traballo anual desta asociación, o BateBatuke 2013 ten por obxecto difundir as súas actividades “entre o público da cidade de Compostela e de todo o territorio galego”.

Para levar o festival ao corazón da capital galega, un macrobloco de percusión (denominación brasileira) da escola Prucupá, xerme do proxecto, sairá da Alameda e percorrerá o casco antigo. Cómpre destacar tamén a presenza de Mario Pam, director no Brasil dunha coñecida banda de percusión, que será o encargado de guiar o taller musical.

Canto ás actuacións nocturnas, a máis relevante é a do conxunto coruñés Chotokeu que, para as súas actuacións na rúa, rescatan o nome A Patxaranga, proxecto paralelo á súa banda á que se recorre cando “os medios técnicos e os espacio” non cumpren as condicións que require o espectáculo de Chotokoeu. 

Tamén esta confirmada a presenza do mago Charlangas, dos grupos Gicap e Iandé  para os obradoiros de capoeira, do conxunto de percusión vigués Bloquinho Aperta, xa incondicionais do evento e da banda de percusións africanas de Arteixo, Perfusión. Todas estas activades porán de manifesto o lazos tecidos dende a Galiza até o Brasil e a África.