A música clásica e o teatro únense nunha reinterpretación do conto da Cincenta

A música clásica e o mundo teatral uníronse esta terza feira no escenario do Auditorio de Galiza. Un ano máis a Real Filharmonía da Galiza convidou o público a desfrutar do seu tradicional concerto de Reis, nunha ocasión na que a orquestra interpretou unha selección de números pertencentes ao ballet A Cincenta de Sergei Prokófiev. A música de orquestra uniuse coa proposta escénica da dramaturga Lorena Conde e coas interpretacións de Belén Constenla e Lidia Veiga. A actriz arzuá explicou esta terza feira a Nós Diario que esta iniciativa leva varios anos desenvolvéndose, co obxectivo de crear un espazo de convivencia entre a Real Filharmonía e o mundo teatral, "lugares que se aproximan moi pouco", apuntou Veiga. Unha proposta que nace da "idea de vencellar dous mundos moi afastados, pero que curiosamente teñen moitas cousas en común", unha finalidade que é posíbel combinando a parte clásica do ballet de Prokófiev, coa orquestra dirixida por Baldur Brönnimann e unha dirección escénica contemporánea de Lorena Conde. Unha xuntanza que para Lidia Veiga provoca "sinerxías, pois aparece a maxia", posto que consegue unir na mesma escena maneiras moi diferentes de contar a mesma historia. Lidia Veiga: "Gústame dicir que son unha traballadora cultural porque vivo grazas ao sector da cultura" A musicalidade na interpretación teatral Para Lidia Veiga unha das chaves principais desta proposta é "a musicalidade que teñen todos os personaxes, sen a necesidade de que teñan que cantar", posto que esta é achegada polo propio ritmo da interpretación. Outros dos puntos principais, e que é toda unha sorpresa para o espectador, é a colaboración da Filharmonía na interpretación e na narración do conto, "o público vai poder ver algún músico actuar en momentos concretos, dalgún xeito tentamos que, a través da proposta escénica, non só se queden como músicos senón tamén que formen parte do conto das Cincenta como persoas que están na escena". Unha reinterpretación do conto clásico da Cincenta O conto clásico da Cincenta amosa a unha rapaza que chega a princesa grazas a un príncipe que a salva da súa cruel vida que lle dá a súa malvada madrastra, unha historia que como na maioría dos contos de fadas "as princesas representan o que é ser unha persoa submisa e estar baixo a rede do patriarcado", reflexiona Veiga. Un enfoque que foi totalmente suprimido na interpretación do concerto de Reis da Real Filharmonía. Na escena, a Cincenta non é a protagonista nin a que narra a súa propia historia, posto que, como sinala Veiga, "os protagonistas son dous príncipes que foron contratados para contar o conto de Cincenta, mais eles queren aproveitar o momento para ser protagonistas ao considerar que nos contos de fadas os príncipes teñen unha cota baixísima, concretamente de 6%". Así, a historia da Cincenta será contada por dúas figuras masculinas, "que o único que lles houbese gustado no conto é ser a Cincenta", que servirán para pór o punto de mira presenza do machismo e do patriarcado nos contos que están dirixidos para as crianzas. Unha reinterpretación que tenta que "a xente xulgue e se poida rir da presenza masculina nos contos, pondo en ridículo a estes dous príncipes enriba da escena", apuntou a actriz. Un conto de princesa universal e en galego Como é costume o concerto de Reis da Filharmonía da Galiza garante a presenza do galego no escenario, así como o texto de Lorena Conde, cuxas "propostas teñen unha personalidade en relación ao idioma moi potente", explicou Veiga. Ambos os factores mesturados dan unha das primeiras interpretación do conto da Cincenta en galego e a primeira proposta escénica que combina música e teatralidade nunha das grandes salas do país. Xa anteriormente Sarela Teatro fixo que a Cincenta fálase galego.