O mundo da cultura de Vigo organízase contra o “malestar xeral” do sector
“Vimos decatándonos dun malestar xeral no ámbito cultural da cidade Vigo. Queremos abordar esta situación nun encontro”. Que será esta sexta feira 16 de novembro, organizado pola Agrupación Amig@s do Marco, o Ateneno Atlántico, Acolectiva, Caín e o Instituto Galego de Praxe Actual.
“Cremos necesario pór en común a realidade cultural da nosa cidade”, insisten as promotoras nunha nota remitida aos medios de comuncación, “é un encontro aberto a todos os cidadáns para estabelcer lazos entre veciños da cidade, asociacións e colectivos sociais”.
A iniciativa reunirase a partir das 17.30 horas no salón de actos do Politécnico da cidade. Comezará cunha mesa redonda moderada polo xornalista Fernando González, Gonzo, e na que participarán tres relatoras arredor de tres bloques: a avogada Ania González -sobre equipamentos e xestión cultural-; o arquitecto Iago Valverde e o historiador Uxío Reinoso -sobre urbanismo e patrimonio-; e o editor Manuel Bragado -sobre a imaxe da cidade e identidade.
A seguir, en estimación da organización, ás 18.45, comezará “a posta en común e o debate”, que se estenderán até as 20.00 horas. “Temos o firme convencemento de que entre todos podemos encontrar formas de traballar máis horizontais que favorezan a democratización da cultura nesta cidade e así mellorar a vida da veciñanza”, conclúen.