A Mostra de Cangas retrata as inquedanzas da sociedade contemporánea

Un programa que abonda nas coproducións, como sinal do "apoio firme ao tecido teatral galego, ás novas compañías e a creadoras e creadores de todas as xeracións". Así se expresaba María Armesto, directora da Mostra Internacional de Teatro Cómico e Festivo de Cangas (MITCFC), que decorrerá entre os días 22 de xuño e o 6 de xullo. Ao longo de 15 días, a MITCFC acollerá 26 espectáculos, repartidos en cinco escenarios, incluíndo o Auditorio Municipal para as obras nocturnas. Nesta 42 edición a Mostra conta con 5 coproducións, 8 estreas absolutas e 7 estreas na Galiza. Son espectáculos que van desde a danza, a performance e o teatro máis contemporáneo e innovador, até o teatro de rúa e o máis clásico e popular. María Armesto: "Todas as administracións deberan entender que un país que non promove a súa cultura é un país que non existe" Esta edición destaca por programar unha serie de obras que retratan unha sociedade confusa e desorientada ante uns tempos convulsos. Así, por exemplo, leva a escena diversas estreas absolutas, entre elas as coproducións do festival, nas que destacan O espírito de Vania, un espectáculo creado a partir da peza do dramaturgo ruso Antón Chékhov no que Machi Salgado desenvolverá diversos roles para conectar o espírito de Vania coas inquedanzas da sociedade galega e o mundo actual. Outra das estreas que coproduce a Mostra é A beleza faranos libres, de Anómico Teatro, un espectáculo que fusiona teatro e cinema para falar do amor á terra, á maxia dos montes e da beleza como horizonte para fuxir da voracidade do extractivismo. Destaca tamén Coa cabeza nas nubes, un espectáculo da compañía SÖA que fusiona música, danza e teatro. Tamén se poderá ver en Cangas a estrea absoluta de Gala, da compañía de novo circo do País Vasco Rojo Telón, unha pioneira compañía formada por mulleres que celebra o seu décimo aniversario neste 2025. En canto ás estreas na Galiza, a MITCFC presentará, entre outros espectáculos, La reina brava, o último traballo da compañía andaluza, Las Niñas de Cádiz. Ademais, a compañía La Zaranda volve a Cangas co espectáculo Todos los ángeles alzaron el vuelo, recentemente estreado cunhas críticas extraordinarias. A Mostra tamén presentará no país Julio César, da popular compañía portuguesa Teatro do Chapitô, que vén de acadar un rotundo éxito en escenarios de todo o mundo. Ademais, coincidindo coa celebración dos 25 anos de Mulleres en Acción, a Mostra presentará por primeira vez na Galiza a performance colectiva Se nota, se siente, el beige es incluyente, pilotada por Mis Beige, o xenial alter ego da actriz e performer, Ana Esmith. Poderá gozarse tamén do multipremiado espectáculo de teatro físico Lubbert, do artista catalán Inda Pereda, que leva anos percorrendo o mundo cun éxito absoluto de crítica e público. A Mostra segue apostando pola dramaturxia co xa consolidado e popular Torneo de Dramaturxia de Galiza, que este ano chega á súa novena edición. Desta vez, as participantes serán Iván Caloto, Marta Lado, Amantia Coello e David Gun Gundas, que medirán os seus textos ante a mirada atenta de Esther Carrodeguas, a xa tradicional Mestra de Cerimonias do Torneo. Ademais, celebrarase un encontro de representantes de asociacións de dramaturgas/os de Baleares, Cataluña, Galiza, Madrid, Murcia e Valencia que van presentar o Manual de boas prácticas na dramaturxia e nas artes escénicas. Mulleres en Acción Aproveitando o seu 25 aniversario, Mulleres en Acción faise eco da decisión da Academia Galega de dedicar as Letras Galegas ás cantareiras e pandeireteiras, cunha programación especial. O pregón da 42 MITCFC correrá a cargo das Fillas Bravas, as tres cantareiras e pandeireteiras saídas do Grupo Chévere. Ademais, Mercedes Peón interpretará Osmose, unha proposta na que a artista crea un diálogo colectivo, con imaxes do seu arquivo persoal, o traballo visual de Peque Varela, o relato fílmico da película Nación de Margarita Ledo Andión, e a arquitectura lumínica de Laura Iturralde. Mulleres en acción: Vinte anos de pensamento e acción feminista en Cangas As voces e pandeiretas das pandeireteiras do Morrazo invadirán as rúas de Cangas para difundir a riqueza que nos legaron e para mostrar que hai relevo xeracional. Premios Como cada ano, a MITCFC concede dous galardóns. O Premio Xiria ao Labor Teatral desta 42ª edición é para a Compañía de Teatro A Panadaría, en recoñecemento "ao seu talentoso labor en amasar un teatro innovador e esixente". A organización da MITCFC destaca o traballo que Areta Bolado, Noelia Castro e Ailén Kendelman, as tres almas máter da compañía, adoitan crear cunha excelente acción física e verbal. Tamén salienta as temáticas actuais das súas obras, "un teatro que denuncia sen vitimizar, a través da comedia, ese xénero aínda desvalorizado do que poucas creadoras son protagonistas". Por outra parte, o Premio Mulleres en Acción 2025 recae en Mercedes Peón, pola súa "extraordinaria traxectoria profesional, artística, pedagóxica, de investigación e social". Compositora, instrumentista e cantora de creatividade excepcional, Peón comezou hai xa 25 anos a realizar un formidábel labor de investigación e divulgación que visibilizou ás pandeireteiras, mulleres esenciais no desenvolvemento da riqueza musical e cultural do país. Mercedes Peón, ademais, é impulsora do proxecto Somos Pandeireteiras que naceu coa firme intención de mover os marcos de pensamento androcéntrico e de crear un espazo diáfano para poñer no centro ás tocadoras e así crear os seus propios relatos, sen mediacións externas. Falece o tradutor e histórico nacionalista Henrique Harguindey Homenaxe a Harguindey Na 42 MITCFC tamén se inclúe unha homenaxe ao recentemente falecido Henrique Harguindey, profesor, tradutor e un dos fundadores da Asociación Cultural Xiria e da Mostra de Teatro de Cangas, na que traballou incansabelmente. Para lembralo, a MITCFC programa o espectáculo As gardías ou o nó do tecelán, de Teatro de Ningures, con dirección de Cristina Domínguez e un texto de Nasser Djemaï cuxa tradución desde o orixinal francés ao galego foi o derradeiro traballo de Harguindey.