Modelar a tradición tamén é unha festa

Oleiros inaugura hoxe unha das feiras máis singulares do verán galego. Até o domingo 6, o parque Luís Seoane de Santa Cruz será o escenario de Alfaroleiros, a feira na que oleiros de toda a península Ibérica se reunirán para exhibir e vender as súas pezas. A que xa é a XIX edición desta cita, consolidada na paisaxe festiva da comarca e lugar de parada obrigado para todos os amantes da cerámica, rende homenaxe -baixo o lema 'Modelando a tradición'- a unha forma de traballar que posúe séculos de historia, unha sabedoría cultivada ao longo do tempo que algunhas persoas manteñen e transmiten de xeración en xeración, repetindo ese xesto teolóxico de crear algo novo a partir do barro. A feira de Oleiros conta con invitados de 23 obradoiros procedentes de España e Portugal e, por suposto, de diferentes localidades da Galiza, algunhas delas cunha tradición de tanta sona e prestixio como a de Buño (Malpica, na comarca de Bergantiños) ou a de Niñodaguia (Xunqueira de Espadanedo, na comarca de Allariz-Maceda). Daquela, Alfaroleiros preséntase non soamente como unha feira ao uso, senón tamén como un lugar de encontro e de intercambio entre tradicións peninsulares diversas. A memoria do barro Cociña e barro A feira de Oleiros parte da convicción de que a olaría tradicional -unha tradición ancestral que se remonta ao neolítico e que, como actividade de artesanía, ten aínda moito arraigo na Galiza- é unha expresión da identidade cultural das sociedades, e a súa conservación, enriquecemento e diversidade fai parte do patrimonio. O alcalde Oleiros, Ángel García Seoane, en declaracións aos medios, destacaba que "estarán presentes os mellores oleiros tradicionais da península Ibérica, que destacan por ser únicos nas súas respectivas zonas de procedencia e pola calidade e pureza dos seus traballos”. Mais o rexedor tamén invitaba as persoas visitantes a participaren da feira como dunha experiencia que vai máis alá da exposición e da venda dos traballos de olaría. "Todos os días vai haber actividades no campo da feira", cun programa que inclúe eventos directamente relacionados con esta especialidade artesá e outros diferentes. Dentro das primeiras, haberá demostracións de diversos obradoiros case a diario, aínda que destaca polo seu "exotismo" unha delas dedicada ao rakú -o día 4 de agosto, de 17 a 20 horas-, un tipo de cerámica tradicional xaponesa moi ligada á célebre cerimonia do té e que alcanzou un nivel de excelencia artística de enorme consideración en todo o mundo. Esa relación entre a olaría e a cociña tamén se explotará noutras actividades, durante a fin de semana, que baixo o epígrafe Cociña e barro mostrarán en vivo a estreita relación de ambas as disciplinas, permitindo ás persoas visitantes, ademais, a degustación de varios pratos tradicionais ou innovadores. Buño ensina o seu segredo Música en directo Mais Alfaroleiros tamén se expande cara a outras ramas da creación e do entretemento para que o ambiente de festa non esmoreza en ningún momento. Desta forma, hoxe mesmo está programado, no parque Luís Seoane, ás 21 horas, un concerto da Gallaecia Small Band, "unha Big Band en formato pequeno", como eles mesmos se definen, que resucitará sons doutros tempos para amenizar a primeira noite da feira. Familia Caamagno, unha das bandas galegas con máis tirón do panorama musical actual, será outra das invitadas á feira. Rock'n'roll garaxeiro e acelerado para a noite da sexta feira, na praza de Esther Pita, a partir das 22 horas. No mesmo sitio e á mesma hora, pero do sábado 5, será o "arpista pop" Roi Casal quen recale en Oleiros dentro da súa xira Ambos mundos. E fecharán o ciclo de concertos, o domingo ás 21.30, Brais Morán &amp; Nasaufunk, presentando os temas do seu último disco. Será despois dunha ruada do Grupo de Gaitas Santaia polo parque Luís Seoane, fronte ao castelo de Santa Cruz. Familia Caamagno: "Podes non facer un discurso político directamente pero referirte ao tema de xeito que deixes clara a túa postura" Obradoiros, maxia e clown Alfaroleiros tamén leva á vila maxia -co Mago Dani, que celebra os dez anos do seu espectáculo Don Gelati-, a quinta feira, ás 20 horas no parque Luís Seoane; o clown de Arturo Nono, a sexta feira, tamén no parque Luís Seoane ás 20 horas; e actividades para a cativada, como os xogos tradicionais que leva Eira Xandobeleira ou o obradoiro "A olaría nas túas mans", que inicia nos segredos do traballo en barro o público infantil.