A MIT Ribadavia aposta pola diversidade, a hibridación e o feminismo

Escenas en tránsito. Baixo este lema estréase na dirección da MIT Ribadavia Sabela Mendoza, Con Gena Baamonde como directora adxunta. O atraso en escoller a nova dirección -a convocatoria fíxose en febreiro- provoca que este ano a MIT celebre unha edición de transición que aposta "pola contemporaneidade e a diversidade, pola mirada feminista, polos formatos híbridos e a dilución das etiquetas", segundo declarou Mendoza onte, na presentación oficial do programa desta MIT 2025. Serán en total 35 actividades entre funcións, obradoiros, encontros, foros e accións abertas á comunidade, repartidas en máis dunha ducia de espazos escénicos. Desta actividades, 23 serán espectáculos escénicos de teatro, danza, performance, circo e artes vivas, coa participación de compañías procedentes da Galiza e do Estado español, ademais doutras procedentes de Portugal, Italia e Brasil. Estes espectáculos conforman unha programación atenta á diversidade formal e temática, onde teñen cabida desde propostas intimistas até espectáculos de gran formato, e que aborda cuestións como a memoria histórica e o seu vínculo coas historias íntimas e persoais, a identidade e o cuestionamento das fronteiras, a saúde, a disidencia, a ecoloxía ou o pensamento crítico. Compañías galegas Disiden.Cia presenta a estrea galega do seu espectáculo familiar Bipedestrucción que aborda a diversidade que compartimos todos os seres desde o humor, a diversión e a imaxinación; Ibuprofeno Teatro coa potente montaxe Reconversión, unha memoria escénica que enlaza historia política e persoal sobre a reconversión industrial do sector naval da Ría de Vigo; Furia Sotelo e a súa peza de danza-teatro Sobre o extravío ou a arte de perderse, un solo íntimo, delicado e irreverente de Nuria Sotelo dirixido por Ana Vallés; Ártika Cía con Non pasarán, unha metáfora contemporánea sobre o medo e o poder; Ítaca Teatro coa montaxe Profetas, sobre un texto de Ernesto Is gañador dun Premio Abrente de Dramaturxia 2021; La Guajira con Anfibia, un solo de danza sobre as transformacións vitais; Pistacatro, que trae a súa máis recente montaxe de novo circo e malabares, Sen Patrón. O colectivo A volátil, formado polos galegos Irene Moreira e Álex Sobrino e a andaluza Rosa Romero, preséntese por primeira vez na MIT, co seu proxecto en residencia Pan, nubes e chocolate. A estas cómpre engadir A derradeira leición do mestre, unha acción participativa de Chévere arredor do cadro de Castelao, que abre o proceso dunha nova creación. Santiago Cortegoso leva á escena a reconversión naval na Galiza dos anos oitenta Programa internacional No plano internacional, destaca a presenza da compañía italiana Parini Secondo co seu espectáculo HIT (out), unha vibrante performance coreográfica e musical. Desde Portugal, Circolando presenta Crátera, unha peza transdisciplinar inspirada nas xeopoéticas e na paisaxe volcánica que aposta por traer as cuestións ecolóxicas a un plano micro, o dos corpos e as relacións entre suxeitos e territorios. Tamén desde Portugal chega Patrícia Portela co seu traballo de residencia e mostra en proceso Os Passadores que aborda cuestións de nacionalidade e fronteiras. Ademais, a coreógrafa brasileira residente en Cantabria Mari Paula ofrece a súa peza Escambo, unha danza lúdica e tropical que aposta polo sensorial e o traballo cos obxectos para achegar tamén a expresión creativa ás nenas e nenos. Ela é unha das apostas fortes do festival, e ofrecerá tamén o obradoiro Bailar en la infancia. A programación estatal presenta proxectos novidosos. Na primeira fin de semana do festival chegan desde Cataluña dúas reputadas compañías que despregan, dende linguaxes e poéticas diferentes, códigos de humor e ironía. Cris Blanco presenta a estrea galega de Grandissima Illusione, espectáculo inaugural da MIT que é unha homenaxe ás convencións teatrais e ás dificultades do propio oficio escénico. Ao día seguinte, Societat Doctor Alonso presenta o seu último espectáculo, tamén estrea na Galiza, Hospital de Campo, que convida a reflexionar sobre a enfermidade, a idea de saúde e a sandación. A estas montaxes teatrais, súmase a potencia visual e poética de Kolektiv Lapso Cirk co seu espectáculo de circo contemporáneo OVVIO, e a danza paisaxística da coreógrafa e bailarina canaria Teresa Lorenzo, quen presenta unha versión site specific de Las Magias. A madrileña María Jurado presentará a súa peza Spooky, con estética trash e do cinema de terror, unha das apostas máis rompedoras da mostra. Sabela Mendoza na MIT de Ribadavia: falar do presente desde diferentes lugares e linguaxes Visitan a MIT pola primeira vez o dúo artístico Los Torreznos, formado por Jaime Vallaure e Rafael Lamata, coa súa mítica performance La cultura. Será tamén unha aposta grande a presentación de Tierras raras, último espectáculo de Luz Arcas/La Phármaco que reúne baile e cante en directo en escena e que contou coa complicidade da MIT para esta produción. A clausura do festival virá da man da reputada compañía Malpelo, quen tamén visita por vez primeira Ribadavia, e que pecha a mostra con Bach, o xa mítico solo de danza interpretado por María Muñoz. A este programa de exhibición se suman o programa de apoio á creación –con 3 residencias artísticas que abrirán procesos de traballo comunitarios e rematarán con mostras abertas–, o programa de formación –con 6 obradoiros e laboratorios dirixidos tanto a profesionais como a público xeral e público infantil– e o programa de mediación co que se busca xerar outros lugares de encontro e conexión entre artistas, públicos e profesionais das artes escénicas, e que inclúe conversas coas compañías e outras actividades paralelas. Os premios Tamén nesta edición se celebrarán as 20 edicións do Premio Abrente, cun acto especial e lectura dramatizada que homenaxea o legado dunha das convocatorias de escrita teatral en lingua galega máis significativas do país. Ademais anunciarase e entregarase do Premio Abrente 2025 e dos outros premios outorgados pola MIT: o Premio de Honra, que será anunciado o día da inauguración da MIT, e o Premio do Público, un premio consolidado dende o ano 2000 que tenta facer partícipe ao público de forma activa na propia programación.