Marián, Belém Tajes e Vimbio, finalistas do Fran Pérez "Narf"

O xurado do Concurso Fran Pérez "Narf" para grupos e artistas musicais que promove a Deputación da Coruña deliberou e fixo públicas onte as tres bandas finalistas na edición deste ano: Marián, Belém Tajes –crítica musical de Sermos Galiza– e Vimbio. A proposta gañadora será elixida durante unha gala final que terá lugar no Salón Teatro de Compostela o domingo 2 de novembro.

Formou parte do xurado, como presidenta, Natividade González, deputada de Cultura; ademais das músicas Ugia Pedreira –tamén ex directora da Central Folque– e Alberto Busto –Arrythmia–; o xornalista e músico Daniel Salgado; o programador da Mardi Gras, Tomi Legido, e a produtora e xestora cultural Noa Díaz. Como secretaria actuou Manuela Muñiz Souto, xefa de sección de Cultura e Deporte.

O Concurso "Narf" ten o obxectivo difundir, apoiar e promocionar grupos e artistas musicais da Galiza, así como lembrar e difundir a figura e a o obra do músico e compositor Fran Pérez "Narf". Algunhas das bandas gañadoras deste premio foron Caldo, Mounqup, Bala ou Familia Caamagno, entre outras.