'A luz resucitada' achega Manuel María a través da obra fotográfica de Manuel Lemos

Manuel Lemos (Vigo, 1958) comezou a súa actividade como fotógrafo afeccionado sendo moi novo e, desde entón, evolucionou cara á fotografía de autor, o retrato de paisaxes e o tratamento da natureza. Ten unha longa traxectoria no campo da fotografía, así como no audiovisual. Agora vén de publicar o seu novo proxecto, editado pola Casa-Museo Manuel María co apoio da Deputación da Coruña, A luz resucitada. Un achegamento imaxinario ao poeta Manuel María no que combina as súas fotografías co repertorio poético do autor. O contido do libro, que xa se pode mercar, tomará forma de exposición e de curtametraxe, tal e como explica Lemos en conversa con Nós Diario. “A idea deste proxecto xurdiu pouco a pouco. Eu traballo moito con contido de autor e co retrato das paisaxes e da natureza e, ademais, visitei moitos lugares de interese natural, entre eles A Terra Chá”, afirma. A iniciativa de Manuel Lemos naceu co obxectivo de facer unha exposición que recollese o seu traballo, mais finalmente decantouse por mostralo en dous formatos máis: un libro e mais unha curtametraxe, dándolle así tamén unha dimensión audiovisual. “É un traballo multidimensional. De feito, empecei facendo un dossier de ideas para a exposición. Presentei o tema na Fundación Manuel María coa intención de que me desen a súa opinión e, se lles gustaba, que apoiasen a iniciativa simplemente coa palabra; encantoulles”, salienta. O proceso creativo “O máis diferente deste proxecto é a curtametraxe, pois ao ser audiovisual interveñen outros factores. É un tema interesante para divulgar a palabra e a voz do poeta, que é cultura da Galiza é que, polo tanto, ten moita transcendencia”, explica o artista vigués, que leva máis de tres anos traballando nesta iniciativa; un desde que concretou toda a idea final. Tiña tamén en mente un proxecto coa obra de Uxío Novoneyra para traballar sobre O Courel, mais rematou decantándose polo proxecto de Manuel María “porque é unha figura que está menos traballada”. “Ao principio foi un traballo máis documental, pois comecei tomando notas sobre as miñas ideas e logo pensei na maneira na que podía darlle forma. Despois, foi aparecendo a idea de traballar coa obra do poeta e funo incluíndo no tema. E a partir de aí o proxecto foi derivando cara a algo máis centrado na interpretación do traballo poético de Manuel María”, explica. Manuel Lemos considera que o punto de inflexión deste proxecto foi, quizais, “a parte descritiva da súa poesía”, coa que puido facer “unha fotografía literal” do espazo paisaxístico da Terra Chá. "Este é un traballo no que o que máis me interesa é contar algo coas miñas fotografías desta comarca", continúa. “Identifiqueime bastante coas descricións de Manuel María, xa que a súa obra conta con precisión descritiva; é moi similar a como eu interpreto ás veces as paisaxes de forma visual e fotográfica. Foi a partir de aí cando quixen facer e retratar ese paralelismo de xuntar as dúas disciplinas, confrontando palabra e imaxe", analiza o fotógrafo. Ademais, tras revisar a obra poética de Manuel María, o vigués decatouse de que “había un tema de ciclo vital na súa obra”, polo que lle xurdiu a idea de estruturar o seu traballo “en catro partes: nacemento, tránsito, morte e resurrección”, para abordar o tema de forma "máis interesante" para as persoas que o visen unha vez rematado. A curtametraxe conta coa música de Rogelio Groba e "coas voces de profesionais" "Houbo mitos cambios e incorporacións neste proxecto. É un traballo no que o que máis me interesa é contar e transmitir algo coa miña fotografía. Escollín o traballo de Manuel María para facer a miña obra porque quería retratar a paisaxe natural da Terra Chá, e aínda que hai moitos poetas desa terra, para min el é o máis representativo", sentencia o autor deste traballo. A curtametraxe Para realizar a curtametraxe empregou recursos visuais e sonoros. Contactou con Rogelio Groba para exporlle a idea. “Gustoulle moito, así que introducimos música de diferentes obras do seu pai [Rogelio]. Traballei conxuntamente os textos e as imaxes da curtametraxe, na que aínda estamos a traballar e que seguramente non superará os 20 minutos”, apunta. Na parte sonora narrativa, o relato en off realizárono Eva Veiga e Santiago Fernández: “Escollemos uns textos de maneira que semella que se estabelece un diálogo entre ambas as dúas voces para imitar unha conversa con textos confrontados mais ao mesmo tempo asociados”. Para iso, Manuel Lemos incorporou fragmentos dos prólogos da poeta Pilar Pallarés nos que interpela Manuel María. “Deste modo, as voces de Eva Veiga e Santiago Fernández van intercaladas durante toda a curtametraxe e mantense a atención do público, ao que queremos emocionar”, conclúe. Ademais, entre os focos de atención do Executivo tamén se atopa o acceso á vivenda ou o aumento da renda dispoñible real dos fogares. A presentación do proxecto aínda non ten lugar nin data Lemos confirma a Nós Diario que, no plan de difusión deste traballo, el e máis seus compañeiros de proxecto teñen pensado facer a presentación do libro, da exposición e da curtametraxe nunha mesma data e lugar. "Estamos buscando o lugar idóneo para facer todo xunto. Posibelmente a presentación decorrerá nunha sala de exposicións que ao mesmo tempo teña a posibilidade de proxectar a peza audiovisual", indica, sen concretar aínda a data. A traxectoria profesional de Manuel Lemos Manuel Lemos ten tras de si unha longa carreira profesional, recibindo varios recoñecementos pola realización de diversos proxectos, publicacións e exposicións. Desde os seus comezos pertence ao colectivo 'Portfolio Natural', no que priman sobre todo os valores sociais e ecolóxicos difundidos a través da fotografía de autor e a consciencia da necesidade de preservar os espazos naturais de toda Galiza. Lemos Combina a súa fotografía coa obra de Manuel María O fotógrafo ten participado en varios proxectos como director e produtor de videoclips como Ciclorama Paisaxe e Natureza, da Orquestra da Cámara Galega; Astrea, do grupo de folk Berrogüetto; Holdon, da banda británica Immaculate Fools, ou Renaissance, do compositor de jazz Nani García Tríoa, entre outros proxectos audiovisuais.