Isabel Risco, actriz: "A situación fixo que se programe máis cultura nas festas"
Forma parte dun sector especialmente danado pola crise sanitaria, mais está tendo actuacións...
É un verán anómalo e o sector cultural é un dos principais ámbitos nos que está a repercutir. Non entendemos moi ben por que se toman medidas de restricións de espectáculos porque é onde máis garantida está a seguridade. Creo que hai unha especie de criminalización dos eventos culturais e do ocio nocturno. O masivo claro que supón un risco pero tamén incluíron bares ou locais pequenos que programaban actuacións. A miña tempada non arrancou até xa entrado o verán pero tiven algo de sorte coa axenda, aínda que non é o mesmo volume que outros anos. Estamos a entrar en concellos máis pequeniños.
É positivo ese acceso a outras vilas?
Estamos a notar unha cousa que é de reivindicar: esta situación fixo que se programen contidos máis culturais e de pequeno formato, fuxindo un pouco da festa tan masiva na que todo está arredor das orquestras. Se quedase ese pouso aí e se esta dinámica de programar se fose incorporando sería estupendo.
Moitas bandas din que é o verán do recoñecemento na casa. Coincide?
Creo que esta é a oportunidade de tomar conciencia e potenciar a parte positiva. Estamos facendo cousas interesantísimas; sen desestimar o que hai fóra, que tamén vale, pero tendo en conta que nós tamén valemos.
Verémola pronto na serie 'Mataría'.
Colaborei nun dos capítulos e é un formato moi agradábel. Hai xente nova que está agardando para poder facer cousas no eido do audiovisual ou da música e, igual, non se lle está a dar o recoñecemento que merece.
En que outros traballos audiovisual anda?
No último ano ou ano e pico non teño moito traballo no audiovisual pero é certo que está moi afectado. Somos unha potencia que non se está a aproveitar e non ten só que ver coa situación na que vivimos, senón que arrastramos unha crise máis ou menos provocada.
Que proxectos ten?
Á parte de seguir cos bolos con Nabiza Girl e Papar sen cancelas, recuperamos algún de Os nenos da varíola. Con Culturactiva imos reivindicar as mulleres do país.