A insignia de ouro da USC a Manuel Lourenzo inaugura a Cátedra Otero Pedrayo

O actor e dramaturgo mariñán Manuel María Lourenzo Pérez (Ferreira, O Valadouro, 1943) e o profesor, escritor e político Ramón Otero Pedraio (Ourense, 1888-1978) unirán esta cuarta feira os seus nomes no Paraninfo da Universidade de Santiago (USC) da Facultade de Xeografía e Historia. Será no acto de imposición da Insignia de Ouro desta institución que inaugurará, tamén, a Cátedra institucional Otero Pedrayo. No acto intervirán os docentes responsábeis da dirección da cátedra, Francisco Durán e Dolores Vilavedra; ademais do reitor da Universidade de Santiago de Compostela, Antonio López; o director da Aula de Teatro da USC, Roberto Salgueiro, e a secretaria xeral da Universidade, Dulce María García Mella. Asistirán ao acto o presidente do Parlamento da Galiza, Miguel Santalices, e o secretario xeral da Lingua, Valentín García Gómez. Tamén confirmou a súa asistencia a portavoz nacional do BNG, Ana Pontón. 'Miñatos de verán', a zarzuela escrita por Otero Pedraio que recuperan os Amigos da Ópera de Santiago "Para min é unha honra que recibo con orgullo posto que para min Otero Pedraio é unha figura moi grande en todos os aspectos", asegura Lourenzo a Nós Diario. A figura do ourensán, na súa opinión, "é impresionante". Lembra para este xornal o seu estudo sobre o Teatro de máscaras (1934), unha obra na que atopou condensada "toda a filosofía, a vida e a arte do home", e practicouno nas aulas e nos escenarios. Segundo Lourenzo, o intelectual de Auria "coñecía ben o teatro europeo, sobre todo o francés, e na súa obra non hai que botar en falta nada a respecto das outras literaturas". "É unha obra inmensa, entre Otero e Cunqueiro cobren a dramaturxia dun país moi elevado na súa literatura", considera Lourenzo que entende que "na Galiza tivemos moita sorte de comezar na poesía con Rosalía de Castro e no teatro e narrativa con estes dous xenios". Sobre a Cátedra Otero Pedrayo que comeza a súa actividade esta cuarta feira, Lourenzo desexa e coida "normal" que dea a coñecer máis a obra de Otero Pedraio mesmo no exterior. "No seu caso vai sendo hora, quizais hai demasiadas reticencias sobre diversos aspectos relacionados co seu catolicismo ou coa súa orixe fidalga, mais hai aristócratas na literatura universal que son excelentes literatos", aclara. Visibilizar a Otero Pedraio En representación da cátedra participaron Dolores Vilavedra e Francisco Durán, docentes responsábeis da súa dirección. A iniciativa parte dun programa de catro cátedras institucionais nas que figuran, ademais, a de Rosalía de Castro, a de Castelao e a de Carvalho Calero. Todas están adscritas á Facultade de Filoloxía da USC e partiron, como sinala a Nós Diario Dolores Vilavedra, do seu actual decano, Elias Torres. "Decatouse que non era moi coherente que a Universidade de Santiago non tivese eses espazos dedicados ao estudo e difusión de autores galegos", indica Vilavedra. A RAG editará as cartas entre Del Riego e Otero Pedraio Escoller a figura de Manuel Lourenzo para que "apadriñe" a cátedra é, para a filóloga, unha proposta que recoñece "a súa contribución á difusión da obra de Otero Pedraio, non hai tanta xente que fixera tanto neste sentido, especialmente no ámbito dramatúrxico, como el". O obxectivo da cátedra será, de inicio, xenérico: promover a difusión, o estudo e o coñecemento da obra do autor. No caso de Otero Pedraio a iniciativa aproveitará unha serie de conmemoracións que decorrerán en breve os vindeiros anos. "En 2026 coincidirá os 50 anos da súa morte e cremos que será unha oportunidade para conmemorala dunha forma creativa, produtiva e contribuíndo a que as rapazas e os rapaces coñezan mellor unha figura que está algo lonxe deles", sinala a codirectora da cátedra. Ademais, ese mesmo ano será o centenario da obra Síntese xeográfica de Galicia, publicada en 1926 polo Seminario de Estudos Galegos (SEG), e da súa Guía de Galicia. "De entrada poremos o foco nestas dúas efemérides sen excluír outras que se engadan", explica Dolores Vilavedra. Diálogo cosmopolita Alén de dar a coñecer a obra en si de Otero Pedraio, a cátedra contará con outras actividades. Entre elas está desenvolver un programa que fomente a presenza de escritoras e escritores da Galiza ou traducidos ao galego na Universidade. "Queremos lembrar o carácter cosmopolita, universalista e europeísta de Otero, o primeiro en traducir o Ulises de James Joice a unha lingua peninsular, e traer á actualidade ese diálogo seu coa literatura universal", indica Vilavedra. A idea parte de que o alumnado universitario poida ter "un encontro directo nas aulas coas autoras e cos autores que len e estudan". Carlos Mella, homenaxeado pola Fundación Otero Pedraio A cátedra, ademais quere impulsar a colaboración tanto con institucións e entidades públicas como outras emanadas da sociedade civil, tal como as fundacións ou as casas-museo. "Coa Fundación Otero Pedrayo abrimos unha liña de diálogo desde o momento en que tivemos a idea", explica a co responsábel da iniciativa institucional. Con todo, recoñece que a fundación "ten moitas frontes abertas, moitas prioridades como é a xestión e o coidado da súa Casa-Museo que lles representa un esforzo enorme, ademais de ser legatarios da súa obra". A gratitude da Aula Galega de Teatro da USC co dramaturgo A forte relación de Manuel Lourenzo coa Aula de Teatro da USC na década dos 90 tamén será motivo esta cuarta feira de lembranza na homenaxe ao dramaturgo. No acto intervirá o director desta actividade, Roberto Salgueiro, e leranse textos de Otero Pedraio como A derrota do protomedicato. Salgueiro coñeceu Lourenzo en 1988 despois de gañar o Premio Álvaro Cunqueiro. Cando naceu a Aula de Teatro en 1990, o homenaxeado iniciou a súa colaboración con esta iniciativa, fundamentalmente no programa formativo. "Deu seminarios e cursos regulares durante todo o ano aquí e estreamos tamén a súa obra Cando chega decembro en 1993 e A velada espectral de míster Peabody en 1995, que despois levarían o Premio Nacional de Teatro", lembra Salgueiro a Nós Diario. Ramón Otero Pedrayo, derradeiro presidente do Seminario de Estudos Galegos Insignia merecida A vinculación de Manuel Lourenzo coa Aula de Teatro foi constante. Por este motivo, para o seu director esta homenaxe en forma de insignia de ouro cre que é "totalmente merecida, é unha persoa xenerosa e botaba unha man en todo". Alén diso, a responsábel da Aula recoñece que sempre contou co seu asesoramento. "Cómpre destacar a súa honestidade, hai tempo que merecía este recoñecemento", conclúe.