O galego Eloy Enciso, premio da crítica no Festival de Locarno por “Longa Noite”
Un total de 16 películas aspiraban ao premio da crítica do Festival de Locarno, en Suíza. Un prestixioso certame do que saíu vitorioso o cineasta galego Eloy Enciso co filme Longa Noite.
Silencios e feridas, ocultacións e certa poética do desarraigo protagonizan un filme en que a maior parte dos actores e actrices non son profesionais. Longa Noite, o último filme de Eloy Enciso, vén de lle dar un novo premio ao cinema galego: o da crítica, que outorga a Asociación da Crítica de Cinema Independente do prestixioso Festival de Locarno, en Suíza.
Non é a primeira vez que Enciso asiste a Locarno. A súa anterior longa, Arraianos, estreárase na sección paralela Cineastas do presente. De Longa Noite, construída a partir de textos literarios de Ramón de Valenzuela, Max Aub, Jenaro Marinhas del Valle ou Alfonso Sastre, a organización do certame salientou a capacidade por “afondar nos pregos a memoria e da historia co fin de sacar á luz os perpetuos mecanismos da opresión e a dominación”.
Após Locarno, Longa Noite proxectarase no Festival de Toronto, que suma 44 edicións, e no de Nova York, que suma 57. Na Galiza, estrearase en Numax o 5 de decembro.
Nado en Meira, Enciso graduouse en Ciencias Ambientais e posteriormente estudou dirección de documentario na Escola Internacional de Cine de San Antonio dos Baños, en Cuba. Logo das súas primeiras curtas, estreou a súa longa Pic-nic. Con Arraianos (2012) percorreu festivais de referencia internacional como a Viennale, Doclisboa, Montreal, BACIFI ou Sevilla.