O festival Resis estrea música contemporánea con selo galego na Coruña

Para gustar, nada mellor que darlle de comer ao público. O festival Resis de Música Contemporánea e Artes Vivas comeza hoxe a súa sexta edición cun concerto no restaurante celebra en Árbore da Veira, o restaurante do chef con Estrela Michelín Luis Veira. Pero o menú importante é o que servirán os membros do Arxis Ensemble -unha formación coruñesa de música contemporánea nacida ao amparo do festival- que propoñen a degustación de Dust: bass storm, da londiniense Rebecca Saunders, Latitudes, da croata Sara Glojnarić e unha improvisación sobre Grapefuit book, o xa lendario libro de Yoko Ono, "en clara referencia á inminente celebración do Día do Libro", aclaran desde o festival. Será o comezo dunha edición que, entre outras cousas, lembra o centenario de György Ligeti, o cincuentenario da morte de Picasso ou cinco estreas absolutas. "Esta sexta edición do festival continúa a liña dos anos anteriores, combinando concertos, a segunda edición do proxecto didáctico inclusivo, instalacións, charlas e encontros cos artistas... Creo que é unha progrmación moi completa que abarca multitude de estéticas actuais e que traballa con formacións galegas, estatais e internacionais", explica Hugo Gómez-Chao, director do festival, en conversa con Nós Diario. Varios compositores galegos estrean obra en Resis, algunhas delas asociadas a distintas residencias artísticas. Carme Rodríguez estrea A cova sumerxida coa Banda Municipal da Coruña. Coa Orquestra Sinfónica de Galiza estrea Juan Vara Só hai horizonte, unha creación que aglutina música, cinematografía e poesía. Pedro González estrea Plasma, unha obra que nace da residencia que o Festival Resis celebra en colaboración co Gaiás-Cidade da Cultura. O traballo do compositor Mario G. Cortizo Só un solo, unha proposta escénica cun percusionista como único intérprete ou performer, froito da colaboración do Resis coas Residencias Artísticas Mariñán, tamén verá a luz no festival. E, finalmente, Libro delle Immagini V, do propio Hugo Gómez-Chao, Hugo Gómez-Chao, que na actualidade é compositor residente na Real Academia de España en Roma. Hugo Gómez-Chao: "A música contemporánea vive un momento fantástico, con compositoras incríbeis" O público e a música contemporánea O director do festival revela que as entradas están esgotadas para case todos os concertos. "Iso demostra que existe moito público para a música contemporánea. Por razones históricas, este tipo de música, no Estado español, estivo moi á marxe das programacións dos ciclos de cámara e sinfónicos que se programan habitualmente. É certo que hai que facer un maior esforzo para atraer público a este tipo de concertos, pero a miña experiencia no festival di que non é público o que falta. O que falta é un compromiso serio das institucións musicais, que deberían poñer en valor a creación musical contemporánea en pé de igualdade con outras ramas da música". A conversa deriva cara á falta de agrupacións especializadas en música contemporánea na Galiza e no Estado, o cal resulta unha anomalía dentro do contexto europeo. "Temos unha institución moi próxima, a Casa da Música do Porto, que creou o Remix Ensemble e que ten unha programación de música contemporánea espectacular, mesmo con compositores residentes de ámbito internacional", comenta Gómez-Chao. "Parece mentira que exista unha diferenza tan gran de entre o que sucede a tan poucos quilómetros de distancia. Pero claro, se non se programa música contemporánea, non haberá nunca público para ela". Para paliar esa carencia no posíbel, o Resis creou o Arxis Ensemble, que interpretará os dous primeiros concertos do festival, hoxe e o vindeiro sábado. David Durán: "A música contemporánea responde ás inquedanzas actuais que temos" Cambiar o paradigma Gómez-Chao opina que o panorama da música contemporánea na Galiza "é absolutamente espectacular". "Tendo en conta a dimensión deste país, o nivel de compositores, de instrumentistas e de formacións, non hai moitos territorios que teñan unha cantidade e unha calidade semellantes", reflexiona o director do Resis. O papel de festivais como este contribúe a cambiar o panorama. "Indiscutibelmente. Cada vez, as dúas orquestras sinfónicas galegas están programando máis música contemporánea, cada vez se involucra máis compositores e compositoras e, polo tanto, cada vez hai máis público. Agora hai moito alumnado dos conservatorios que decide estudar contemporánea como unha forma de especialización. Iso non sucedía, ou non nesta medida, hai seis anos. Iso non é azar. É froito do traballo serio e profundo dun festival como o noso. Os festivais axudan a que as cousas se mobilicen na sociedade, que se cambien os paradigmas. Hoxe en Alemaña, por exemplo, hai toda unha pléiade de festivais de música contemporánea, pero todo comezou cun festival moi pequeno que se celebraba en Donaueschingen. Estas cousas provocan que se vaia gañando terreo e que vaian creándose proxectos cada vez máis ilusionantes". Donaueschingen vén de celebrar o seu centenario en 2021. Se cadra, non temos que esperar tanto para ver abrollar todo ese talento do que fala Gómez-Chao. Juán Durán estrea unha obra que lembra os sucesos de marzo de 1972 Homenaxe a Ligeti no centenario do compositor O vindeiro sábado será a segunda cita co Resis. Arxis Ensemble será a agrupación encargada do programa, baixo a batuta do director Nacho de Paz. O ovetense, dirixirá a formación interpretando pezas de Beat Furrer, Alberto Posadas, Claudia Cañamero e Hugo Gómez-Chao. Resis tamén lembrará o centenario de Ligeti -un dos compositores máis influíntes do século XX- en dous concertos: O que dará o Quatuor Diotima, que interpretará o segundo Cuarteto de corda -unha das obras máis emblemáticas do mestre húngaro- e o da Sinfonietta da OSG, que inclúe no programa a obra Ramifications. O festival únese á celebración do Ano Picasso, coa primeira execución en vivo na Galiza (110 anos despois da súa estrea!) do Pierrot Lunaire de Arnold Schoenberg, interpretado porlo Plural Ensemble baixo a dirección de Fabián Panisello. E, ademais, presentará dúas instalacións: Organismo / Organscape, de Xoán Xil López, artista sonoro e investigador cuxo traballo vira ao redor da experimentación sonora, na Casa Museo Casares Quiroga; e Faro Horizontal / 7, do artista visual Juan Lesta en colaboración co deseñador sonoro Marco Maril , na Fundación Luis Seoane. A ópera distópica de Fernando Buíde