O Festival Atlántica homenaxeará Castelao na súa 13ª edición

O Festival Atlántica presentou onte en Compostela o programa da súa décimo terceira edición, que decorrerá entre o 28 de xuño e o 6 de xullo. Nesta edición, Atlántica renderá homenaxe a Castelao no 75º aniversario do seu pasamento, recoñecendo o seu papel clave na recuperación da cultura galega e o seu talento como narrador de historias. As testemuñas orais lembran a súa capacidade para emocionar co verbo, co conto breve e coa palabra viva. Esta reivindicación materializarase en dúas actividades: unha lectura pública da obra de Castelao aberta á cidadanía no Panteón de Galegos Ilustres (Como dicía Castelao, 1 de xullo) que terá un feche festivo cun concerto das Bouba Pandeireteiras (CSC Maruxa e Coralia). E un roteiro polas rúas de Santiago da man de Quico Cadaval e mais Carme Varela que rememorará os nove anos de Castelao na cidade (A pegada de Castelao, 3 de xullo). Ademais, o festival abre outra vía de traballo con proxectos como o recente Mapa de Seres Máxicos do Reino de Galicia, con guión de Manuel Gago e ilustracións de Leandro Lamas. Un proxecto para todos os públicos, divulgativo e visual que dá conta da riqueza e diversidade da tradición oral galega a través de 34 seres máxicos. Deseñado para ser contado e reimaxinado en familia, o mapa axuda a manter viva esa parte do patrimonio inmaterial galego, contribuíndo a evitar a súa desaparición pero tamén a atopar un oco na nosa nova sociedade. Ademais, por primeira vez, o festival estabelece acordos coas universidades galegas para impulsar accións formativas e abrir espazos de formación artística e de xestión cultural arredor da narración oral. Unha colaboración que se engade ás que xa mantén con máis de 30 entidades culturais e museos, tecendo unha rede de sinerxías que reforzan o vínculo co territorio e coas súas comunidades. O Festival Atlántica reivindica a narración oral como disciplina artística Tamén nesta edición Atlántica inaugura sesións mixtas interxeracionais nas que artistas sobranceiros compartirán escenario con novos talentos que, en moitos casos, contarán nun festival profesional por primeira vez. Estreas As 80 funcións programadas inclúen estreas absolutas como Fare le corna do italiano Simone Negrin, un espectáculo creado para botar lonxe a mala sorte nesta 13ª edición; as Novas historias do filandar do zamorano "Don Guti"; o Contara de Celso Fernández Sanmartín; e Memorias do lume, un exercicio de autonarración de Soledad Felloza, directora do encontro. O festival trae tamén historias que se escoitarán por primeira vez no Estado español como as de Inés Álvarez, una asturiana asentada desde hai máis de dúas décadas en Escocia e integrante do Scottish Storytelling Forum, ou as do portugués Miguel Gouveia. Todo isto sen esquecer as estreas na Galiza, caracterizadas pola súa variedade: a mestura de poesía e robótica que destilan os Artiloxios do aragonés Oswaldo Pai, o bo facer cos máis pequechos da valenciana Paula Carbonell, o sotaque isleño que regalan as canarias Loreto Socorro e Laura Escuela e as emocións agochadas nas Historias de ida e volta de Larraitz Urruzola. A alquimia dos contos Volven nesta edición as fórmulas gañadoras de anos previos e que demostraron que todo mellora cos contos. Son bos exemplos os roteiros, que xa chegan a cinco concellos e que saen dos espazos urbanos (Rótulas urbanas con Elvira Carregado en Ourense ou Ferrol na historia con Margarita Sánchez) para pasear por castros (como o das Barreiras de Vimianzo con Tito Concheiro), petróglifos (os de Bouza Badín de Dodro con Manuel Santos Estévez) e mesmo montan en barco para visitar a ría de Ferrol (O porto ilustrado con Guillermo Llorca). O Festival Atlántica reúne nun mapa os seres míticos do imaxinario tradicional A arxentina Carolina Arabia, autora do exitoso De cantos y animales, será tamén quen de amosar o poder alquímico das historias na transmisión do coñecemento, ao igual que o antropólogo Rafael Quintía (No país das cousas marabillosas, coas caldupeiras da A.V. Porto do Cabo). Atlántica Miúdo Como en anos anteriores, o Atlántica Miúdo opera como a inauguración oficiosa do festival levando as historias até as escolas nos últimos días do curso. Así, desde o 13 de xuño estase a desenvolver un programa especial concibido para alumnado de centros de Ordes, Brión e Pazos de Borbén. Tamén están previstas funcións nas bibliotecas públicas de Santiago e Vigo e mais no Hospital Clínico Universitario de Santiago (CHUS). E, por suposto, durante as datas oficiais do festival, Atlántica inclúe unha grande oferta para a cativada e as súas familias. Repensar a tradición Na rolda de prensa participaron Anxo Luorenzo, director Xeral de Cultura da Xunta da Galiza; Xosé Penas, deputado de Patrimonio da Deputación da Coruña; Míriam Louzao, concelleira de Capital Cultural, Turismo, Educación e Memoria Histórica do Concello de Santiago; e Soledad Felloza, directora de Atlántica. Ademais, tamén acudiron ao evento numerosos representantes de concellos e entidades colaboradoras do festival. Míriam Louzao amosou a súa ledicia pola nova edición do festival que acollerá 51 artistas que describiu como "alquimistas da palabra que nos amosarán como empregala para imaxinar outros mundos posíbeis, para exorcizar as dores e construír espazos seguros onde gorecernos fronte o balbordo e o caos, fronte aos discursos totalitaristas que, cada vez máis, nos arrodean". Contar historias para conservar a memoria no Día da Narración Oral Anxo Lorenzo vinculou directamente o labor do festival coa "Galiza que leva moito tempo, cultivando, mantendo e transmitindo unha maneira de comunicar a través da narración oral. Xosé Penas non dubidou en incluír Atlántica entre os festivais capaces de transcender as fronteiras para converterse nun referente do país". Na súa intervención Felloza compartiu coa audiencia a necesidade de "pensar e repensar o futuro da narración oral e das novas formas desta arte" nunha sociedade galega cada vez máis urbana. "Como incluír as novas xeracións na arte de contar historias?", preguntou a directora do festival. "É imperativo achegala ás novas xeracións e garantir a súa continuidade como parte activa da cultura contemporánea galega".