Felisa Segade abriu o Festival Maré, a mostra das artes e as músicas atlánticas

OFestival Maré acolle desde esta cuarta feira en Compostela as actuacións de artistas cuxa música está vencellada con distintas culturas do mundo, dando especial atención a aquelas que se atopan minorizadas ou en conflito. Como menciona Vítor Belho, director artístico do festival, o evento faise “co punto de vista de estabelecer conexións que, desde Galiza, danse con culturas diversas”. No manifesto do propio festival menciónase o punto común de todos os artistas do cartaz: “territorios e persoas que compartimos que a cultura é un dereito”, é por isto que se define a selección das artistas e actividades como “unha toma de posición”. Outro dos puntos que caracterizan o Festival Maré é a dinamización da cidade de Compostela. Os distintos concertos e actividades que conforman o seu cartaz desenvólvense en escenarios de programación habitual, como poden ser a Sala Capitol ou o Teatro Principal; espazos privados que inclúen actividades culturais, mais tamén teñen outros propósitos, como é o caso da Casa das Crechas e o Modus Vivendi; centros socioculturais entre os que se atopan o Centro Xove Almáciga e o Maruxa e Coralia; e dous espazos públicos: as prazas de Mazarelos e Praterías. Tamén se poderá desfrutar de distintos concertos na Igrexa da Universidade, como os de Judit Nedermann e Pau Figueres ou Divide Salvado. O emprego desta diversidade de escenarios é un dos factores que permiten que se dean distintas actividades dentro do festival, implicando, como explica Vítor Belho, a cidadanía de Compostela no evento. Fronte ao modelo dos macrofestivais, o Maré propón “un modelo que respecte as dinámicas e pequenos negocios locais”. Deste modo, ademais dos distintos artistas, no Festival Maré haberá actuacións de formacións como a da Banda de Música de Santiago con Carapaus, na Praza de Praterías este domingo, e ruadas como a de Marexada Perkuta con Trópico de Grelos e Circonove, o sábado en Mazarelos. Outras actividades son os obradoiros de danzas africanas que se desenvolverán, con inscrición aberta, no Centro Xove Almáciga esta quinta feira e esta sexta no CSC A Gracia, ou o obradoiro 'Coa forza no falar', o sábado 27 na Praza de Mazarelos. Que moitas actividades sexan realizadas en espazos públicos, sendo, nalgúns casos, gratuítas, é tamén un modo de facer honra ao manifesto, que as define como “espazos de pensamento, encontros, obradoiros e accións paralelas que outorgan contido e contexto ao que vivimos como público”. Segade e Carabela Felisa Segade, cofundadora da emblemática formación Leilía, foi a artista que inaugurou esta cuarta o festival. Minutos antes de subir ao escenario declarou a Nós Diario que o Maré implica “toda a cidade”, sendo Compostela, á súa vez, a localidade axeitada para acollelo. Tamén Ana Moas, compoñente da banda Carabela, que esta cuarta abriu o Maré, sinalou a este xornal a importancia da selección duns espazos “nos que se xera un vínculo especial entre as artistas e o público, facilitando a atención e a escoita activa”. Artistas emerxentes A participación de artistas emerxentes non só é insignia e reflexo dos valores do Festival Maré, senón tamén un atractivo para algún dos compoñentes do cartaz. Nomeadamente, Pablo Agra e Ana Moas, da banda Carabela, destacan a “coidada selección do cartaz”. Sofía Espiñeira, artista que tamén participará no Festival, destaca o seu carácter intercultural e interdisciplinar como un foco de interese. Nunha liña similar, Felisa Segade gaba o “completo” que lle semella o festival, incluíndo actividades para “todo tipo de público, de distintos gustos e distintas idades”. O mesmo destaca Ugia Pedreira, artista que fai parte do cartaz, que define este festival como “exploratorio”, ao dar pé ao coñecemento de novos artistas de distintos países. Felisa Segade confesou a este xornal que considerou “unha responsabilidade” abrir o Maré facendo unha homenaxe ás pandeireteiras, ao ser este o seu ano. Escolleu para isto, a presentación dunha nova proposta de espectáculo musical, contando, maioritariamente, con músicos de jazz, tendo, como excepción, o gaiteiro Pedro Lamas. Os teloneiros desta actuación foron a Banda Carabela, que declaran ter “un especial vencello” coa propia Felisa Segade e, por tanto, alén da importancia que ten para eles tocar no Festival Maré e, nomeadamente, na Sala Capitol, supón "unha ilusión poder tocar precedéndoa". O seu espectáculo de onte destacou pola inclusión novedosa dun xogo de iluminación e sombras a mans de Candela Díaz. A proposta desta actuación foi unha pequena viaxe chea de contrastes, tanto emocional como musical con momentos máis íntimos, con sons cálidos e suaves; e momentos de desinhibición, musicalmente máis fortes, de máis volume. A Sol Band une as artistas galegas contra o xenocidio Na liña dos valores do festival, o domingo celebrarase na Sala Capitol un concerto que amosa solidariedade con Palestina. Baixo o título de “Flotilha de artistas contra o xenocidio”, o Festival Maré dá lugar á banda gazatí de folk-pop Sol Band, que protagonizará, xunto con outros artistas, o concerto que clausurará o evento. Baixo a dirección da artista galego-palestina Najla Shami, este concerto contará coa colaboración de músicos galegos e lusófonos como Quim Farinha, Alejandro Vargas, Manuel Amigo ou Mauricio Caruso. O resultado será un espectáculo de música tradicional galega e árabe que será un espazo para a unión, a denuncia e a solidariedade coa causa palestina. A banda Sol Band naceu en Gaza no ano 2012 e, a través da súa música, que combina produción propia con interpretación de temas clásicos da tradición musical árabe, xuntan a “resistencia cultural” e a “celebración sonora”, como describe o Festival Maré. A súa traxectoria estivo fondamente marcada polo xenocidio, posto que fuxiron de Gaza nos primeiros meses de ofensiva israelí, e tiveron que pasar por varios países até que, finalmente, grazas a unha rede de axuda de Euskadi, foron acollidos no Estado español.