Que é o 'político' na Galiza de hoxe? Clara Corbelhe cita investigadoras, activistas, académicas e estudantes para debatelo

Que é o político na Galiza de 2023? Esta é a proposta de reflexión que, partindo da filosofía política marxista que sinala que o político e indisociábel da emancipación, lanzan desde o Espaço Clara Corbelhe para a súa II Jornada de Estudo que decorrerá este sábado, 7 de outubro, no Pazo da Cultura de Pontevedra. O evento, organizado polo propio Clara Corbelhe, conta coa colaboración da Fundación Galiza Sempre, a editorial Edicións Laiovento e o Concello de Pontevedra. O Clara Corbelhe xorde hai dous anos, en 2021 e en lembranza das "caseteiras" da Terra Chá –familias conformadas por mulleres solteiras e as súas crianzas que no século XIX eran alleas á comunidade mais necesarias para ela–, respondendo a unha percepción compartida sobre o estado das esferas política e intelectual na Galiza de hoxe. Así, seguindo esta premisa, investigadoras, militantes de movementos sociais e políticos de base, académicas e estudantes de todas as áreas de coñecemento daranse cita na cidade do Lérez para abordar de maneira multidisciplinar un conxunto de cuestións "de máximo interese nun contexto de polarización política como o actual". "Na era da postdemocracia, a tese de Rancière dinos que o político está a ser deslocado e despolitizado. Como alternativa ás formas modernas de despolitización e consenso racional, podemos pensar, como o filósofo francés, un novo tipo de racionalidade –a racionalidade do disenso– que relaciona a acción realmente política como aquela que é capaz de abrir espazos imprevisíveis de tensión antagonista e, á súa vez, producir unha nova subxectividade política", reflexionan desde o Espaço. Investigadoras, activistas, académicas e estudantes de todas as áreas de coñecemento danse cita na cidade do Lérez En que aspectos do político se tería que concentrar unha política soberanista galega chamada a confrontar de maneira efectiva o capitalismo? Que é o político, a día de hoxe, nas loitas galegas polo territorio, pola seguridade laboral e contra a precarización, ou pola supervivencia da lingua? Como podemos concibir unha política antagonista para a defensa da soberanía social, cultural e nacional ante un españolismo radicalizado? Estas son as preguntas con cuxas respostas o Espaço Clara Corbelhe busca situarse entre a produción teórico-crítica e a intervención social, e entre o traballo intelectual-cultural e a experiencia política práctica. Helena Miguélez: "Queremos fuxir dos textos escritos de maneira opaca ou que non teñan unha tese crítica" Olladas desde a Galiza contemporánea Desta maneira, a II Jornada de Estudo do Clara Corbelhe contará entre os participantes do evento, que decorrerá baixo o título "O político e os seus limites: olhadas desde a Galiza contemporânea", con representantes de diferentes eidos dos ámbitos académico, político e social da Galiza. Borxa Colmenero, doutor en Dereito pola Universidade da Coruña (UdC) e doutor en Teoría Política pola Universidade de Santiago de Compostela (USC), avogado, profesor de Dereito na Universitat Oberta de Catalunya abrirá o congreso dando a benvida cunha palestra titulada "Abalarmos o político: da radicalidade duns estudos emancipatorios galegos", na que tratará "o político" como unha categoría que excede "a política". A seguir, a conferencia inaugural correrá a cargo do doutor en Xeografía pola Universitat Autònoma de Barcelona (UAB) e investigador da USC Brais Estévez Vilariño. Estévez abordará a habitabilidade e o cambio climático en "Aclimatar o político, aterrar a habitabilidade: a Galiza no Novo Réxime Climático". Ante a suba das temperaturas medias globais, "como integrarmos a Terra do Antropoceno na construción do político?", pregunta o doutor . Botrán, Santos, e Estévez participan das xornadas en Pontevedra Baixo o título "As teses autodeterministas e os límites do político no Estado español", o último relatorio da mañá do sábado será impartido por Albert Botran e Antom Santos, e moderado por Daniela Ferrández Pérez, doutora en Historia Comparada pola USC. Botran –ex deputado no Congreso español pola CUP e mestrado en Historia Comparada pola UAB, autor do libro Independencia é revolución: a soberanía nun mundo en crise (Tempo Galiza, 2022)– e Santos –doutor en Historia pola USC– reflexionarán ao redor do concepto de autodeterminación aplicado aos casos catalán e galego, respectivamente. Sobre a acción social no rural galego desde 1939 intervirán Helena Martínez –politóloga e economista– e Ana Cabana –doutora en Historia Contemporánea e profesora na universidade compostelá–, reflexionando sobre a relación do pasado co presente e as perspectivas de futuro no rural. A sesión, titulada "O futuro é político: olladas da Galiza rural das perspectivas histórica e socioeconómica", estará moderada pola etnógrafa, licenciada en Dereito e en Historia pola Universidade de Vigo, Ana Durán Penabad. Pablo García, investigador do Ministerio de Universidades co Programa Margarita Salas, será o encargado de pór o ramo á II Jornada de Estudo do Espaço coa palestra "A memoria do futuro, na saída aos momentos de perigo. Unha lectura guiada d'A Soldadeira, de Luís Seoane", traendo o pensamento do romántico Seoane para "pensarmos o presente en crise". Borxa Colmenero: "A ideia última seria abrir a possibilidade de criar uma espécie de estudos emancipatórios galegos" Tempo Galiza trae ao galego a obra de Albert Botran Precisamente cando veñen de facerse seis anos desde que o pobo catalán exerceu nas urnas o dereito a decidir sobre o futuro da súa nación, Albert Botran Pahissa, ex deputado no Congreso español pola Candidatura d'Unidat Popular (CUP) até as pasadas eleccións estatais do 23 de xullo, presenta esta semana na Galiza o seu libro titulado Independecia é revolución. A soberanía nun mundo en crise (Tempo Galiza, 2023), publicada orixinalmente por Edicións Tres i Quatre en 2022 e traducida do catalán ao galego por Carlos García Vieito. O libro, que busca rexeitar a ideas de que a independencia se pode conseguir no marco lexislativo actual e que é contraria a movementos sociais como o ecoloxismo ou o feminismo, relata tanto os feitos acontecidos o 1 de outubro de 2017 –o día que decorreu o referendo de autodeterminación en Catalunya– como os acontecementos históricos que levaron a ese proceso e os fitos que lle agardan no futuro pobo catalán. O espazo enocultural de Compostela Vide, Vide! acollerá esta quinta feira o acto de presentación da obra, mentres que a libraría Cartabón de Vigo fará o propio na sexta feira, nuns eventos nos que tamén participará o deputado do BNG no Congreso, Néstor Rego Candamil. Daniela Ferrández, historiadora e activista trans: "As conquistas sociais non se manteñen por si mesmas"