Un escaparate para as artes escénicas: 22 espectáculos en Galicia Escena Pro

Compostela é agora mesmo o lugar onde se xuntan compañías de artes escénicas, distribuidores, programadores e, en xeral, todos os participantes no sector, para concertar acordos que fagan posíbel que os espectáculos de teatro, danza, circo ou maxia cheguen ao público. Veñen até aquí cun obxectivo: coñecer as propostas para a próxima temporada e pechar os contratos que conformarán a oferta escénica da vindeira temporada. Un total de 225 profesionais están reunidos desde esta segunda feira na capital galega con motivo da 12ª edición do mercado Galicia Escena PRO, organizado pola Consellería de Cultura, Lingua e Xuventude e a asociación empresarial Escena Galega. Oito espazos e prazas da cidade acollen do 2 ao 5 de xuño o conxunto das actividades programadas este ano, que inclúen 21 funcións de teatro, danza e circo contemporáneo, 12 presentacións de proxectos en formato pitching, dúas mesas redondas e un concerto. Os límites da civilización: Talía Teatro rézalle a "un deus salvaxe" Ademais, nestes momentos está fechado xa o intenso calendario de reunións que as compañías galegas inscritas manterán con máis de oitenta responsábeis de mostras, circuítos e espazos escénicos tanto da Galiza como doutras sete comunidades autónomas e de Portugal co fin de favorecer a contratación de espectáculos de produción galega. Este é o obxectivo prioritario do encontro, que tamén ofrece un escaparate cara ao público para unha escolma de 21 montaxes de teatro, danza e circo contemporáneo, das que 18 son galegas. Así, as persoas non acreditadas poderán asistir a estas representacións segundo a dispoñibilidade en cada espazo e previa retirada dos convites na oficina de coordinación da feira, situada no Museo das Peregrinacións e de Santiago. Espectáculos galegos e de fóra Os espectáculos galegos de teatro para público adulto seleccionados para Galicia Escena PRO 2025 son As gardiás ou o nó do tecelán de Teatro de Ningures, María Visitación Consolación Amadora, de Loia Producións, O proceso de Malasombra, Reconversión de Ibuprofeno Teatro, Tromsø de Morraoconto, Ubasute de Berrobambán, Un deus salvaxe de Talía Teatro e Vitória de Iria Pinheiro. En danza, poderán verse as pezas Anfibia de La Guajira, Aurora Boreal de Paula Quintas Cía., Cicatriz de Kirenia Danza, Transeúnte de Daniel Rodríguez e Trïade de Colectivo Glovo, mentres que Rogelio III. La fête de AsSircópatas encádrase no apartado de circo. Ademais, inclúense nesta carteleira catro propostas pensadas para público familiar da man de Os Náufragos Teatro con Bulebule, Xampatito Pato con Compaña, Aurora Artes Escénicas con Maruxiña e Redrum Teatro con Os contos do Lobicán. Santiago Cortegoso leva á escena a reconversión naval na Galiza dos anos oitenta A estes títulos súmanse outros tres espectáculos doutras tantas compañías convidadas dentro do acordo de colaboración con MADferia e Dansa Valéncia: a madrileña Nueveuno Circo con Todo lo posible, a valenciana Cía. Kiko López con Honest e o dúo gaditano Jessica Castellón & Boris Orihuela con Cuentas corrientes. Programación profesional Xa dentro da programación exclusiva para profesionais con inscrición en Galicia Escena PRO, na segunda feira desenvolveuse a primeira das sesións de presentacións en formato pitching de 12 proxectos que aínda se atopan en proceso de preparación. Nesta primeira data presentáronse A derradeira leición do mestre de Chévere, A metamorfose de Sarabela Teatro, Manual de patronaxe de Teatro do Noroeste, Oh, mammi blue! de Cinema Sticado e Xoguetes rotos de Barrosanta e ButacaZero. Esta terza feira terá lugar a segunda das sesións de pitching, na que se darán a coñecer Galerock 'N' Magic do Mago Teto, Monte de Laboratorio Escénico, Ninguén tira fotos nos enterros de Carlota e Compañía, O arcón de Noa de Amarelo Cía., O espírito de Vania de Machi Salgado, Os Senteito de Caramuxo Teatro e Todas temos a mesma historia de LaGriot'te. A feira propón tamén un espazo para a reflexión e o debate arredor da situación actual do sector, que desta volta acollerá unha mesa redonda sobre as boas prácticas na distribución e outra sobre o relevo profesional e xeracional no ámbito da programación escénica. Na primeira delas participarán Daniel Juste, programador do Teatro José María Rodero de Torrejón de Ardoz (Madrid); Helena Ordóñez, codirectora de Contorsions-Festival Internacional de Circ de València, e Susana Rubio, presidenta da Asociación de Empresas de Distribución y Gestión de las Artes Escénicas, mentres que para a segunda se contará con Miguel Ángel Barreales, programador do Teatro El Albéitar de León; Pol Gil, director executivo da Mostra Igualada-Fira d’espectacles infantils i juvenils e membro da Xunta Directiva da Coordinadora de Feiras de Artes Escénicas e Paloma Morcillo, programadora do Teatro López de Ayala de Badaxoz. Paula Quintas estrea a súa última obra, 'Aurora Boreal' en Santiago Gustavo del Río, do equipo da organización de Galicia Escena PRO, será o moderador en ambos os casos. Completa o programa desta 12ª edición o concerto que a banda Capital Voskov ofrecerá esta noite na Sala Riquela, que repite como espazo Galicia Escena PRO. Pola súa banda, Auditorio Abanca, Igrexa da Universidade, Salón Teatro, Teatro Principal e as prazas de Mazarelos e da Quintana serán os escenarios para as representacións dos espectáculos, mentres que o Museo das Peregrinacións e de Santiago acollerá as reunións profesionais. Accesibilidade e inclusión Desde que Escena Galega -a Asociación Galega de Empresas de Artes Escénicas- se responsabiliza da coorganización de Galicia Escena Pro, a feira apela á interacción persoal, dándolle protagonismo á figura da facilitadora, unha coordinadora que pon en contacto a programadores e compañías e que xestiona encontros entre profesionais para propiciar intercambios. A asociación, prepara, en paralelo, unha xornada profesional sobre accesibilidade e inclusión nas artes escénicas para o vindeiro 17 de xuño. Escena Galega creou o Grupo de Traballo de Accesibilidade e Inclusión, que serve como espazo de asesoramento a compañías e outros axentes do sector escénico profesional para implantar medidas efectivas de accesibilidade e inclusión.