David Amoedo: "Ao perdermos edificios de fábricas e polígonos, perdemos parte da esencia e do carácter de Vigo"

—Como naceu a iniciativa? O principal obxectivo é conservar os edificios que fan parte do patrimonio industrial de Vigo. Nun primeiro momento intentouse a través de alegacións ao PXOM, mais non se conseguiu nada. Unha vez que vimos que esa vía estaba esgotada pensamos que a única solución era saír á rúa e ver se alí conseguiamos xerar debate. Non é unha cidade cunha catedral gótica, mais si hai fábricas modernistas, porque a cidade é eminentemente industrial. Hai que aproveitar os edificios antes de que os tiren, como xa aconteceu no barrio do Areal. Todas as fábricas que están na zona na que nos movemos, o polígono Jacinto Benavente e Bouzas, formaron parte do segundo ou terceiro polígono da cidade. O primeiro foi o do Areal e aí xa non queda practicamente nada. Isto debería servirnos de exemplo para que non se repita o mesmo erro no noso barrio. Os edificios de frío, antigos almacéns de conxelado, por exemplo, son perfectamente aproveitábeis para vivendas, non hai que tiralos para volver construír. Por outra parte, o noso barrio carece de moitas dotacións: non temos biblioteca a menos de dous ou tres quilómetros, tampouco piscina. O que propomos tamén permitiría darlle contexto a eses edificios e unha nova vida. No momento actual, de emerxencia climática, deberiamos intentar reutilizar edificios e espazos. —Ademais falando, como é o caso, de naves que actualmente están sen uso. É parte da roda do abandono. Primeiro hai que deixar que apodrezan para que se degraden e poder dicirlle á xente que non serven para nada. Pero foi así toda a vida, se lemos a prensa dos anos 60 facían o mesmo. No caso concreto de Beiramar, na que por problemas de espazo as naves de frío son en altura, son edificios de formigón e están preparados para aguantar grandes cargas. Simplemente con darlle un lavado de cara ao edificio e facendo unha redistribución pode ser un edificio de vivendas, ademais co contexto que ten. Esta é unha zona que ten moito valor porque foi onde se inventou a aplicación de frío á pesca cando chegou Pescanova. É un novo sector industrial que creamos na Galiza desde cero, co que cambiamos a pesca a nivel global, e non lle damos a importancia que merece. Cando perdemos estes edificios, perdemos tamén o carácter da cidade, a esencia do que é Vigo. —Unha das actividades de Beiramar da xente foi un roteiro reivindicativo. Cal foi a resposta da xente? Estamos moi contentos porque estamos conseguindo bastante repercusión. Tamén están chamando doutros colectivos da cidade para falar con nós e secundar as propostas. O obxectivo, que era xerar debate, parece que se está logrando. Agora temos que seguir facendo cousas para que isto non quede simplemente neste roteiro. Tamén estamos pedindo á xente que envíe as súas propostas, alén das que nós fixemos, para que desde o Concello, a Deputación ou a Xunta vexan que a veciñanza quere conservar eses edificios e que precisamos cousas no barrio que non temos. No verán temos pensado facer máis actividades na rúa, porque a xente está máis dispersa, mais a partir de setembro queremos facer máis roteiros e incluso exposicións de fotografía. A idea é que haxa actividades de maneira continua.