Culturicidio na Palestina

En paralelo ao verdadeiro e insoportábel xenocidio que o Estado de Israel está a cometer nos territorios palestinianos, os letais bombardeamentos sionistas están tamén a provocar un verdadeiro masacre, humano e material, muito para alén dos mal chamados danos colaterais, na cultura daquela nación. Certo é que, da mesma maneira que acontece coas crueis matanzas masivas que estamos a contemplar de forma angustiosa e chea de carraxe desde que comezou a actual operación de exterminio, a destrución de bens e infraestruturas culturais, e o asasinato de representantes do sector, é un proceso que comezou no momento en que a organización terrorista que foi o xermolo da actual Israel iniciou o seu plano de aniquilamento do pobo palestiniano, e da instauración do seu réxime de apartheid. Como mostra de macabra coincidencia, o neto do terrorista que bombardou o Cinema Vermello de Jafa hai setenta e cinco anos, destruíu agora o Centro Cultural Rashad Al-Shawwa en Gaza. Mal que ben, o espírito empreendedor e resistente que non se rende ao desalento fixo que, durante perto de oitenta anos, unha vez tras doutra Palestina conseguise renacer das súas cinzas e, co seu propio empeño e coa axuda internacional, voltase a levantar escolas, universidades, museus e todo canto elemento cultural fora esnaquizado polo odio sionista. Porén, a magnitude do actual ataque está a deixar o sector tamén ferido de morte e, de se albiscar un futuro proxecto de reconstrución, abofé que a primeira prioridade terá que estar centrada nas vítimas humanas, na súa subsistencia material, tan ameazada nestes momentos pola fome, as enfermidades e as secuelas desta agresión inhumana. Nun segundo relatorio oficial, que abranxe até ao 7 de decembro, o Ministerio da Cultura palestiniano fai reconto da devastación humana e material que no campo da cultura está a sofrer a Palestina, maioritariamente, mais non só, en Gaza. A comezar polas persoas, artistas, intelectuais ou xornalistas que foron asasinadas, ou das que foron forzadas a se deslocaren cara ao sur, deixando atrás as súas moradas, posesións e memorias. Tras delas, ficaron tamén atrás as súas bibliotecas, legados literarios, rituais, instrumentos musicais e outras ferramentas que constituían o seu medio de traballo e de vida. Asasinatos e destruición Segundo o referido informe, até ao 7 de decembro, a agresión israelí matou vinte e oito grandes vultos do sector cultural, entre eles Sufian Taieh, catedrático de Física Teórica e Matemática Aplicada e da cátedra Unesco en Física e Astrofísica e Ciencias do Espazo, e reitor da Universidade Islámica de Gaza, xunto con toda a súa familia. Ou o escritor e xornalista Mustafa Al-Sawwaf; o fotógrafo Marwan Tarazi; o historiador Jihad Al-Masri; o artista folk Mahmoud Al-Jubairi (Al-Nabtashi); a escritora e poeta Heba Abu Nada ou a artista visual Nesma Abu Sha’ira, profesora e directora do Departamento de Belas Artes da Universidade Al-Asqua... e así un longo e magoante etcétera. A agresión israelí matou vinte e oito grandes vultos do sector cultural No entanto, a vinganza sionista non só procura a eliminación física do pobo palestianiano e dos seus referentes culturais, mais tamén do seu patrimonio e infraestruturas levantadas con tantas dificuldades. Así, xa levan destruído nove editoras e bibliotecas, danado total ou parcialmente os vinte e oito centros cultuais existentes e causado a destrución de 20 edificios históricos (museus, mesquitas, igrexas e xacementos arqueolóxicos) ou tres estudios de produción artística e audiovisual, para alén da destrución da maior parte do centro histórico da cidade de Gaza, incluídas ducias de edificios históricos. Entre todos eles, a mesquita Omari, a maior e mais antiga de todas elas, que data do século sétimo; a igrexa de San Porfirio, considerada a terceira maior do mundo; un xacemento de carácter funerário da época romana que se descubrira hai un ano no norte de Gaza; o Museu Cultural Al Qarara e o Museu Deir Al Balah; o Porto Anthedon, o primeiro porto de mar de Gaza, habitado desde o século 800 a.C ao 1100 d.C., e un dos tres lugares de Gaza proposto como Patrimonio da Humanidade por parte da UNESCO; o Centro Cultural (teatro, biblioteca e imprenta) Rashad Al-Shawa, ou a Universidade Al-Azhar. A todos eles únense outras igrexas, mesquitas, centros culturais, museus, bibliotecas, edificios históricos, xacementos arqueolóxicos... até un total de mais de cen. A pesar de todo, por palabras cheas de futuro do ministro da Cultura, Atef Abu Saif, "o noso pobo continuará a contribuír á civilización humana, restaurando a alegría e a esperanza".