Chanfaina Lab, un certame de audiovisual para construir comunidade

Unha iniciativa “que fomenta a liberdade creativa e favorece a convivencia, unindo a cineastas de calquera idade, xénero, procedencia ou traxectoria para compartir experiencias arredor da obra cinematográfica. Unha proposta que reivindica a súa alma rural e o seu espírito comunitario, sendo quen de implicar veciñas e veciños e de inspirar as vocacións de novas xeracións de cineastas”. Así xustificaba a Academia Galega do Audiovisual a concesión, o pasado decembro, do Premio Especial José Sellier ao Chanfaina Lab, un proxecto de creación audiovisual que se realiza no concello de San Sadurniño e no que participan autoras e autores consagrados a carón de homes e mulleres de todas as idades e condicións, sen experiencia previa no cinema. O primeiro obxectivo desta novidosa experiencia de creación colectiva é pór en valor o territorio do concello a través das diferentes miradas das persoas participantes: as autoras e autores teñen 48 horas para gravar no territorio e coas xentes da localidade as imaxes que comporán a súa curtametraxe. Mais alén diso, existe outra finalidade: servir de punto de encontro, de debate e de coñecemento mutuo entre persoas e xeracións diversas. En definitiva, facer comunidade. De Ledo a Laxe "A filosofía do festival é xuntar algunhas persoas que acaban de rematar o bacharelato, un par de persoas recentemente tituladas en Belas Artes ou Audiovisual, cineastas recoñecidos de entre 30 e 50 anos e algunha figura veterana. Mais a veciñanza de San Sadurniño non ten que cumprir ningún requisito, queremos potenciar que participen sen ningunha restrición", explica Manolo González, ideólogo e impulsor do Chanfaina Lab. O impresionante catálogo de participantes do certame inclúe nomes como os de Margarita Ledo, Oliver Laxe, Alfonso Zarauza, Xurxo Chirro, Jaione Camborda, Marcos Nine, Xacio Baño, Sonia Méndez, Alberte Pagán, Xisela Franco, Diana Toucedo, Jorge Coira, Eloi Domínguez Serén, Ángeles Huerta..., mais González insiste en querer "incorporar o local en igualdade de condicións. O espírito do festival baséase en comprender que existen moitas maneiras de facer cinema. Conviven obras moi sofisticadas con outras máis elementais, pero esa convivencia é moi educativa, explica que o audiovisual consiste, sinxelamente, en expresarse a través de imaxes en movemento". Outes invita a navegar os mares a través do cinema Equipo de cociña A chanfaina é un tipo de embutido que se elaboraba con partes diferentes do porco. Esa mestura de ingredientes é, precisamente a que lle dá sentido e nome ao proxecto, e mesmo a que rexe a súa organización, que se estrutura como un equipo de cociña, comezando polo Master Chef, que é o alcalde de San Sadurniño, Secundino García Casal, e rematando polos diversos pinches que se reparten polas sete parroquias do concello e que fan o labor de auxiliares de produción, axudando os cineastas nos seus respectivos territorios. Manolo González exerce de sous-chef e insiste en que o espírito comunitario comeza pola propia organización: "cada un fai o seu, mais todos botamos unha man no que sexa preciso". O Chanfaina Lab non quere medrar, prefire manter a súa dimensión local. "Algúns poden pensar que se trata de falta de ambición, mais iso fainos máis libres, non precisamos de ningunha axuda da Administración", aclara González. "Ademais, cando optas a algunha das subvencións para festivais decátaste de que a participación internacional sempre puntúa moito, e nós nese apartado temos cero puntos, seguimos moi ligados ao que se fai na Galiza. Non sei por que se valora máis o de fóra que o que se crea aquí". Tolerancia No sete anos de vida do Chanfaina Lab xa existen participantes locais que non faltan nunca á cita, como Abel Vega, un albanel xubilado que participa en cada edición, NaraíoMedia, un colectivo de mozos da parroquia de Naraío, as labregas de "Teño unha horta en San Sadurniño", (Consuelo Picos, Cruz Piñón, Carmen Couce e Carmen Bouza) e as divertidas "donas" de The Sungirls, (Graciela Galdo, Mónica Cibreiro e Olga Vigo). "Para nós a maior alegría é ver que algunha persoa do concello se decide a participar por primeira vez", di González. "Hai historias que son moi reveladoras, como a de Catalina Rodríguez Rico, que fixo unha peza preciosa sobre cabalos cando aínda era moi nova e que agora está estudando veterinaria. Son anacos da historia íntima do concello". A tolerancia coas distintas formas de narrar coas que profesionais e afeccionados se enfrontan á hora de rodar unha curta esténdese tamén ao público, que aprende a lidar con diferentes estéticas e diferentes rexistros narrativos. "Ás veces levas sorpresas coas opinións da xente", relata González. "Cando invitamos a Alberte Pagán, que é un cineasta moi radical, moi da escola de Nova York, fixo unha curta na parroquia de Forgoselo que se titulaba así, Forgoselo. É un filme moi contemplativo, moi abstracto, xogando con imaxes do granito presente na parroquia case co estilo do cinema de Andy Warhol. Despois da proxección, cruzámonos cunha veciña moi maior -con seguridade completamente allea á sofistificación desas estéticas das vangardas- e pregunteille que lle parecera a película. A señora mirounos e contestou: 'entender non entendín moito, pero Forgoselo é así'. O Primavera de Cine de Vigo sitúase na primeira fila dos festivais da Galiza Medio cento de creadoras na VII edición da Maratón Chanfaina Lab Este sábado, 11 de febreiro, a partir das 17:30 horas, terá lugar na Casa da Cultura de San Sadurniño o Maratón VII Chanfaina Lab, no que se proxectarán as 22 curtas resultantes do traballo levado a cabo no concello, a principios do mes de setembro, e no que se implicaron perto de medio cento de cineastas locais e doutras partes da Galiza e do Estado. O Chanfaina Lab fai honor ao seu nome mesturando nomes consagrados -como os de Alberto Gracia, Toño Chouza, Rubén Coca, Dani Viqueira, Domingo Díaz ou o do pioneiro do cine galego moderno Xavier Villaverde- cos de profesionais con experiencia en ámbitos diversos do audiovisual -como os da cineasta e montadora Iria Silvosa, o actor Kevin Lorenzo, a xornalista e creadora Ary López ou a videopoeta Celia Parra- e os de novas promesas recentemente tituladas en Belas Artes ou Audiovisual como Raquel Álvarez, Sofía Naseiro, Claudia Pineda, Ariadna Silva ou a científica Ángela Arnosa. Nomes que compartirán escenario e pantalla cos valores locais do colectivo NaraíoMedia, The Sun Girls, Carmen Bouza, Carmen Couce, Consuelo Picos, Cruz Piñón, Kevin Lorenzo, Fran Bermúdez, Abel Vega, Ángela Arnosa, Ary López e Bieito Beceiro, ademais das promesas máis novas: Andrea Fernández, Andrea Pena, Pablo Martínez e Paula Vilariño. A partir da semana seguinte, como é tradición no encontro, irá estreándose unha curta cada sexta feira na canle de Youtube de Fálame de San Sadurniño, xunto cunha breve sinopse e unha reseña biográfica e artística da súa autora ou autor.