O Camiño de Santiago, vía de intercambio para as artes escénicas

O Camiño de Santiago foi unha vía de intercambio cultural que contribuíu a a crear a idea de Europa. Talvez desa tese partiron as entidades que crearon Camiño Escena Norte para crear un itinerario cultural polo que transitan creacións escénicas da Galiza, Asturias, Cantabria, Euskadi e, desde este ano, Nafarroa. En realidade, a necesidade de intercambio entre as artes escénicas de territorios limítrofes -mais que permanecían alleos á produción dos seus veciños- foi a que inspirou o proxecto, que chega neste 2023 á súa quinta edición, do 17 de setembro ao 22 de outubro. Promovido polas asociacións profesionais de produtoras de artes escénicas Escena Galega (Galiza), EscenAsturias (Asturias), ACEPAE (Cantabria), Eskena (Euskadi) e ESNA (Navarra). Camiño Escena Norte (CEN) chega con importantes novidades, como a incorporación definitiva ao proxecto de Nafarroa; o aumento da programación en todos os territorios, ao pasar de 38 a 57 sedes (no caso galego, pasa de 7 a 11 localidades); a estrea de Vieiros, unha rede de colaboración con proxectos locais, que na Galiza será o Festival Internacional Outono de Teatro de Carballo (FIOT), que xa colaborara anteriormente con CEN; e un programa de conversas e mesas redondas coorganizado e financiado pola asociación Te Veo de Artes Escénicas para la Infancia y la Juventud. "Cremos que o proxecto está xa consolidado", declara Diego Meizoso, coordinador do proxecto, en conversa con Nós Diario. "Hai que ter en conta que Camiño Escena Norte ten só cinco anos de vida e que dous deles estiveron moi marcados pola pandemia, que tivo unhas consecuencias nefastas para as artes escénicas. E , non obstante, logramos medrar en cantidade e profundidade das actividades, e conseguimos ampliar as fronteiras do proxecto. Se a iso lle sumas que a acollida tanto do público xeral como dos profesionais está sendo realmente boa, temos motivos para sentirnos moi satisfeitos". As artes escénicas dialogan no norte penínsular Intercambio de espectáculos Itinerario Constelación, o programa central do proxecto, no que diferentes compañías de cada territorio xiran polas sedes veciñas, presentará este ano 15 espectáculos nos que prevalece a diversidade estética e lingüística. Na Galiza, as funcións decorrerán nun total de 11 localidades, catro máis que no 2022: Ames, Arzúa, Carballo, Lugo, Melide, Mondoñedo, Portomarín, Ribadeo, Santiago de Compostela (que acollerá a apertura e clausura da programación), Vimianzo e Viveiro. Nestas localidades poderán verse os espectáculos asturianos Misery, de Saltantes Teatro; Luna, de Luz de Gas e La bestia negra de Proyecto Piloto. Desde Cantabria chegarán Ábrego Teatro con Lear en las catedrales; Malabaracirco Producciones Artísticas con Circus magníficus; e Mari Paula Dance &amp; Performance que presenta Fronterizas. Euskadi achega Baby esferic, de Aboon Teatre; Gorpuztu, da compañía Eva Guerrero e Sexpiertos de Tanttaka Teatroa. Finalmente, Nafarroa estréase como nova socia de CEN coas obras El rey tuerto, de Inextremis; Los perros, de Led Silhouette; e Portamundos, de Levelibular. No camiño de volta, as compañías galegas que actuarán no circuíto serán Caramuxo Teatro co seu espectáculo Crisálida; Rebordelos con Amantis, e Xampatito Pato con Só. Mais a colaboración á que dá lugar Camiño Escena Norte vai máis alá da exhibición de espectáculos. O programa Cruzamentos, por exemplo, crea unha rede de estancias de intercambio profesional entre artistas dos diferentes territorios. "Este é outro progama ben asentado e, nesta edición, que se desenvolve do 4 de setembro até o 30 de novembro- participan tres compañías galegas", comenta Meizoso. "Marta Alonso Tejada (que traballará coa vasca La Sala os proxectos Shine + Dancin’ Queen) e Paula Quintas Cía. (quen traballará tamén coa vasca Node sobre Me arrepiento) e a compañía Náufragos Teatro, que intervirá sobre o espectáculo inmersivo Meeting Baby da cántabra Escena Miriñaque". De igual maneira, o programa Habitación Peregrina PRO defínese como un espazo de convivencia profesional para que as compañías entren en contacto, coñezan as súas respectivas liñas de traballo e propostas estéticas, afonden na realidade dos distintos circuítos de programación, exploren vías de coprodución e accedan a propostas de formación que sexan de interese para o seu desenvolvemento profesional. O encontro deste ano terá lugar no Centro Cultural O Vello Cárcere de Lugo entre o 19 e o 21 de setembro. "Este ano, cambiamos un pouco o enfoque destas xornadas", explica Meizoso, "para centrarnos na distribución profesional. Cada vez é máis necesario acudir a empresas especializadas para vender os espectáculos, sobre todo se queres saír do teu territorio. E propiciar encontros nese sentido pode ter moitas vantaxes para as compañías galegas". O Festival de Teatro de Carballo outorga á escritora Ana Romaní o premio 'xograresa de outono' Colaboracións Camiño Escena Norte foi medrando desde a súa primeira edición para xerar diferentes colaboracións con outras entidades que visan a ampliar a proxección do proxecto e a dar visibilidade aos espectáculos seleccionados en cada unha das edicións. Nesta edición inaugúrase Vieiros, unha iniciativa que une CEN con proxectos culturais de cada comunidade, co obxectivo de dar forza e contexto ao CEN, ademais de visualizar fóra do territorio os proxectos locais. Así, traballarase co Festival Internacional Outono de Teatro de Carballo, o FIOT (Galiza); Danza Xixón (Asturias); o programa Mujeres y Cultura (Cantabria); Bideart Zigoitia (Euskadi), e Ribera en Danza (Nafarroa). Ademais, tamén terá lugar a segunda edición ESDADs en Camiño, un proxecto de colaboración e intercambio profesional e educativo coas escolas superiores de Arte Dramático de Galiza, Asturias e Euskadi (Dantzerti). En tres das funcións do Itinerario Constelacións, o alumnado dos centros participantes entrará en contacto coas compañías profesionais en xira en encontros, accións compartidas, visitas ou obradoiros, para tender pontes entre o campo educativo e a acción escénica profesional. Redrum Teatro, a escena contra a intolerancia