Caeron as máscaras

Temos contemplado con asombro a queda da Unión Soviética e o avance dos EEUU rampante polo mundo como potencia imperial. Agora asistimos precisamente ao cuestionamento dese poder obsceno. E como esa potencia baseada no dominio militar está a verse acurralada pola evidencia de que hai outras potencias, deixa de lado o dominio ideolóxico co que encubría a ocupación militar do planeta, e móstrase espida como é, unha potencia militarista e ladroa. A guerra en Palestina puxo en evidencia a trapallada que levaba facendo Estados Unidos e a súa OTAN na Ucraína desde había anos e a destrución política e ruína económica da Europa. A posición de Israel e Estados Unidos, que aparecen xa claramente como unha mesma cousa, é a dos verdugos da poboación palestina. É significativo que até a Organización de Nacións Unidas (ONU), que ten a súa sede en New York e que leva tragando as humillacións de Israel / Estados Unidos desde que se fundou Israel, desta vez, a través do seu secretario, dixo o evidente: o que lle están a facer aos palestinos é un xenocidio, planificado e executado friamente. Así pois o imperio aparece igualado na súa conduta coa Alemaña de Hitler. Demócrata e moderno Agora a factoría de Hollywood terá que fabricar novos filmes, novos relatos. O de O pianista, o pobre xudeu entre decorado de ruínas, xa o asimilamos ás persoas de Palestina entre as súas ruínas reais. E A lista de Schindler é cousa que facemos en falta, non vemos empresario xudeu que salve palestinos. Non é completamente xusto, dentro de Israel hai opinións diverxentes e algunhas profundamente comprometidas coa causa das vítimas do seu propio Estado. Esas persoas merecen o respecto e a nosa atención, pois tamén están a ser perseguidas alí. Caeron as máscaras todas. A OTAN non nos protexe do "comunismo", polo contrario fainos ser un albo das potencias contrarias ao eixo anglosaxón. A "democracia americana" nunca foi tal e agora menos que nunca, é propaganda. Aínda non hai moito asistimos ao relato nos medios das eleccións norteamericanas. As televisións e os medios relataban un enfrontamento entre unha persoa atolada, reaccionaria e machista, Trump, e un candidato "demócrata" que disque era realmente demócrata e sensato. E así pois a opción coa que nos debiamos identificar. Ademais tiña con el a unha muller, a tal Kamala Harris, que era "feminista" e moderna. Así que quen se considerase aquí "demócrata", "moderno", "sensato" e mesmo "feminista" debía ver en Biden o seu candidato, o noso candidato. Finalmente Biden e o seu fillo son tan corruptos e de conduta tan reprobábel como Trump, e Kamala Harris é unha belicista ao servizo dos intereses do lobby da industria militar. A súa política foi afogar Europa economicamente espreméndoa. A súa política no mundo é construír novas bases militares e estender a súa OTAN até a fronteira rusa no continente europeo e na fronteira con China no continente asiático. Ningunha presidencia norteamericana fixo tanto mal a Europa como a "demócrata" de Biden. Nunca se mostraron tan desprezativos e declaradamente inimigos dos nosos intereses, até agora disimulaban. Temos que optar entre uns amos ou outros? Israel é un Estado racial por propia definición e racista na súa ordenación social, adxudicando categorías á poboación segundo a súa orixe árabe, drusa ou xudía Un continente ocupado Non, Trump non é "noso", Biden ou Kamala tampouco. Se fomentan en nós que nos identifiquemos con un ou outro porque son menos malos é porque nos queren escravos. Os Estados Unidos non son o simpático Woody Allen tocando no clarinete pezas de jazz. Nin os inmigrantes europeos en Manhattan, os xudeus emigrados alí, os simpáticos irlandeses policías coas súas gaitas, os italianos tan humanos e parecidos a nós e a pollarecords... Son unha empresa desapiadada inimiga nosa. E quen queira ver a Israel como un Estado democrático pode seguir véndoo, mais coas realidades que xa ninguén pode negar, entendo que a súa conducta é cómplice. Todos e todas temos responsabilidades no mundo e no tempo que nos toca. Israel é un Estado racial por propia definición e racista na súa ordenación social, adxudicando categorías á poboación do propio Estado segundo a súa orixe, árabe, drusa ou xudía. E aínda practica o racismo dentro da poboación xudía segundo a súa procedencia e cultura. Esta crise debera fundar unha recuperación da conciencia europea. Somos un continente ocupado militarmente, dependente economicamente do dólar e os seus instrumentos, FMI, e colonizado culturalmente. E non, non somos "Occidente". "Occidente" son os anglosaxóns, o eixo político e militar "Echelon". Nós somos Europa. Ou deberamos ser.