O protagonista Amador Arias, mellor actor
'O que arde', mellor filme no festival grego de Tesalónica
11 de novembro de 2019 (14:34 h.)
O percorrido de O que arde polo mundo segue a colleitar parabéns e recoñecementos. Este 10 de novembro obtivo o de mellor filme no Festival Internacional de Cinema de Tesalónica, en Grecia.
O veterano certame, que celebrou a súa edición número 60, tamén distinguíu o protagonista da terceira longametraxe de Oliver Laxe, o fonsagradino Amador Arias, como mellor actor.
O filme xa é o segundo en galego máis visto da historia, apenas detrás de Sempre Xonxa (1989, Chano Piñeiro). Estreouse no Estado español o pasado 11 de outubro e aínda se mantén en carteleira nun bo número de salas, 17. As últimas cifras públicas situaban en máis de 50.000 as espectadoras e espectadores que o viron en cinemas.