Verdura e peixe para despois do Entroido

Alcachofas asadas Este é o modo máis sinxelo de cociñar as alcachofas: só precisamos metelas no forno para poder desfrutalas. Elaboración: Comezamos quentando o forno a 180 graos. Mentres, cortámoslles o talo ás alcachofas e imos, unha por unha, agarrándoas pola base e golpeándolles a cabeza contra o mesado para que abran un pouco. Logo colocámolas nunha bandexa apta para o forno co talo cara abaixo e botámoslles sal e un chorriño de aceite no centro a cada unha. Metémolas no forno cando estea temperado e deixámolas uns 45 minutos. Pasado este tempo retirámolas do forno e botámoslles un chorriño de vinagre por enriba. Para comelas só precisamos tirarlles as follas exteriores e desfrutar da parte tenra das interiores. Cómense coma pebidas! Dourada ao forno Aproveitando que o forno está temperado xa, imos preparar nel unhas deliciosas douradas. Só precisamos facer unha cama de patacas e cebola e colocar o peixe salpementado sobre ela cun chorriño de limón por enriba. Elaboración: En primeiro lugar, pelamos as patacas e cortámolas en toros de grosor medio cunha mandolina. Cubrimos o fondo dunha bandexa apta para o forno con elas. Cortamos a cebola tamén en toros e colocámola sobre as patacas. Botámoslles sal e un chorriño de aceite por enriba e metemos no forno a 180 ºC, durante uns 15 ou 20 minutos. Pasado este tempo sacamos do forno, salpementamos as douradas e colocámolas sobre a cama de patacas e cebola. Para darlles un toque de sabor cortamos 4 toros de limón, partímolos pola metade e colocámolos sobre as douradas. Engadímoslles un chorriño de aceite e co resto de limón espremémolo por enriba dos peixes e das patacas. Finalmente, metemos no forno durante uns 20 ou 25 minutos até que se douren un pouco. Pasado este tempo xa poderemos desfrutalas cun albariño ben fresquiño. Orellas Aínda que hai moitas versións deste doce típico do Entroido, faise principalmente con fariña e ovos. O seu curioso nome débese á semellanza que ten a súa forma coas orellas do porco. Elaboración: En primeiro lugar lavamos o limón e relamos a súa pel o máis fino posíbel. Nun cunco grande, botamos a fariña, a culler de azucre, o lévedo en po e unha culleriña de sal. Engadimos a reladura de limón tamén e mesturamos todo ben. Facemos un burato no medio da montaña de fariña e imos engadindo os ingredientes líquidos: os ovos ben batidos, o anís e un chorriño de zume de limón. Continuamos mesturando a fariña dos bordos cara ao centro, pouco a pouco, até ter unha mestura homoxénea. Amasamos uns 5 minutos coas mans e facemos unha bóla. Se vemos que a masa se pega moito podemos botar pouco a pouco, por enriba, un pouco máis de fariña até que quede máis solta; pola contra, se vemos que está moi dura podemos botarlle un chorriño pequeno de leite morno. Dependerá do tipo de fariña e do tamaño dos ovos. Cando a teñamos pronta, empoamos cun pouco de fariña o fondo do cunco e deixamos repousar a bóla, tapada cun pano limpo durante unha hora aproximadamente. Pasado este tempo, precisaremos un rolete e unha táboa para estender as orellas. Podemos facelo tamén sobre o mesado. Untamos ben o rolete e a táboa con aceite de oliva para evitar que se pegue a masa; repetiremos este paso cada vez que notemos que se comeza a pegar. Botamos abundante aceite nunha pota pequena, o suficiente para ter uns tres dedos de profundidade. Quentámolo ben e comezamos a fritir as orellas. Imos collendo pequenos anacos da masa e estendéndoa co rolete até que quede ben fina. Temos que ver a luz a través da masa. Unha vez estendida, enrolámola sobre o rolete para collela e botámola no aceite. Cando comece a dourarse dámoslle a volta e, cando colla cor polos dous lados, sacámola do aceite, escorrémola e colocámola nun recipiente sobre papel absorbente. Repetimos con toda a masa até rematala: teremos que ter coidado de ir temperando o aceite para que non se nos queimen. Despois de telo quente podemos poñer o lume ao mínimo para controlar mellor a temperatura. Colocámolas nunha bandexa e botámoslles por arriba abundante azucre glas.