Receitas para despois do entroido

Primeiro prato: Sacos de cabaciña recheos de espinacas e queixo de cabra Os sacos de cabaciña son un xeito ben orixinal e vistoso de comer verduras, e, grazas ao queixo de cabra, teñen un sabor intenso e delicioso. Ingredientes (18 unidades) 1 cabaciña mediana 100 g de queixo madurado de cabra 300g de espinacas 1 allo aceite Elaboración: Lavamos as espinacas e salteámolas con aceite e o allo cortado en láminas finas. Cando estean cociñadas engadimos o queixo en tacos e remexemos até que se derreta e se mesture coas espinacas. Resevamos. Lavamos a cabaciña e sen pelala cortámola en láminas non moi grosas polo lado máis longo; o ideal é empregar unha mandolina para que saian co mesmo grosor pero podemos facelo cun coitelo. Empregaremos as láminas máis anchas, e deixamos o resto para outra ocasión. Collemos dúas e colocámolas sobre unha superficie formando unha cruz; no centro botamos cunha culler un pouco do recheo e pregamos as puntas cara o centro para pechar o saquiño. Virámola para que non abra e repetimos o proceso até ter todos os saquiños. Logo fritímolos nunha tixola cun pouco de aceite até que collan algo de cor polos dous lados. Ao sacalos colocámolos en papel absorbente para eliminar o exceso de aceite. Segundo prato: Salmón en papillote con verduras Unha receita saborosa, sinxela e moi saúdábel, xa que cociñamos os alimentos no seu propio vapor. Ingredientes 2 toros de salmón 2 cenorias ½ pemento verde ½ pemento vermello 2 patacas 2 cebolas pementa moída 1 rama de romeu tomiño Papel de aluminio 1 chorriño de viño branco Elaboración: Pelamos as patacas e as cebolas e cortámolas en láminas finas. Cortamos os pementos e as cenorias á xuliana para que non queden moi grosos. Cociñamos o salmón en paquetes de papel de aluminio, un para cada toro: cortamos un anaco de aluminio duns 60 cm de longo e dobrámolo marcando as dúas metades. No centro dunha delas colocamos unha cama de pataca e cebola deixando libre os bordos e botámoslle un pouco de sal. A seguir poñemos enriba o salmón e aderezámolo con sal, pementa moída e tomiño. Por último engadimos a cenoria, os pementos e o romeu e botámoslle un chorro de viño. Para pechar o envoltorio dobramos a outra metade sobre a primeira e nas beiras facemos 4 ou 5 dobreces sobre si mesmas para que non escape o vapor. Quentamos o forno a 200 graos, metemos os paquetes con coidado de que non rompan e deixámolos 20 minutos. Agardamos un anaco e abrimos con precaución para non queimarnos. Servimos o salmón sobre as patacas e coas verduras de gornición. Sobremesa: Crema de ovo A crema de ovo é unha das sobremesas máis populares pero non adoitamos facela na casa. Con esta sinxela receita non volveredes mercala nunca máis. Ingredientes 4 ovos 175 g de azucre 1 litro de leite 2 culleradas de maicena 8 galletas maría 1 rama de canela 1 limón canela en pó Elaboración: Tiramos a monda do limón cun pelador con coidado de non sacar a parte branca. Apartamos un vaso do leite e o resto poñémolo a lume medio, nunha pota pequena, co azucre, a monda do limón e a canela en rama, remexendo até que empece a ferver; retiramos do lume e deixamos infusionar durante 10 minutos. Logo, quitamos a monda do limón e a canela. Ao leite que reservamos engadímoslle aos poucos a maicena e mesturamos ben antes de engadir máis para evitar que forme bolos. Cando teñamos a maicena disolvida, botámola nun cunco, engadimos os 4 ovos e batemos até que quede unha mestura homoxénea. A seguir botamos a mestura na pota co leite quente e poñemos a lume baixo, remexendo seguido cun batedor de varas até que espese. Cando vexamos que ten a consistencia desexada, retiramos do lume e servimos en cuncos. Agardamos que arrefríe, colocamos as galletas enriba e botamos canela en po ao gusto. Metémolas na neveira e servímolas frías.