Polo ou galiña, con auga da viña

—Sopa de sémola de arroz e verduras A cabaciña (Cucurbita pepo), variedade das cucurbitáceas, é un froito moi utilizado na gastronomía galega. Elaboración: Lávanse as verduras, despúntase a cabaciña, que se parte en anacos finos. O pemento e as acelgas ou espinacas córtanse á xuliana. Nun recipiente, férvese o caldo e bótanse as verduras que, logo do novo fervor, cocen 5 min. Agrégase a sémola de arroz, o sal e a pementa, e coce 12 min, remexendo de cando en cando. Apágase o lume e repousa 5 min antes de servila quente, esparexendo en cada prato queixo relado. —Zancos de polo enfornados con mollo de limón, mostaza e mel Elaboración: Retíranse dos zancos (denominados tamén coxa, coxigón ou coxote) a graxa e os restos de plumas. Sálganse os coxotes e bótase pementa. Esprémese o limón. Remexemos o zume co mel, a mostaza, o vinagre, o AOVE e a salsa Worcestershire até obtermos unha mestura integrada. Colócanse os coxigóns nun recipiente que poida ir ao forno, vértese o líquido sobre os zancos, untándoos ben por ambos os lados. Para que maceren, déixanse repousar na neveira como mínimo 12 horas, virándoos unha vez para que enchoupen. Ao día seguinte, sácase o recipiente da neveira e deixamos temperar. Mentres, lavadas as cenorias, móndanse e córtanse en anacos medianos (3/4 cm). Pelamos o allo e partimos en anacos moi miúdos. Entre o polo con todos os zumes da maceración, colócase a cenoria, estendendo por riba os allos picados e o tomiño. Régase con 150 ml de caldo ou viño, reservando 50 ml. Caldéase o forno a 200ºC, métese o recipiente e báixase a 180º, asando 30 min. Vírase cada peza, botámoslles os 50 ml de caldo ou viño e enfórnase de novo 30 min. Sóbese a fonte ao punto máis alto do forno e gratina 10 min. Como gornición, arroz en branco, puré de patacas, cuscús, patacas fritas ou simplemente mollo feito coa cenoria triturada e algo dos zumes da cocción. —Torta de cacao e cabaciña Elaboración: Penéirase a fariña, o lévedo, o cacao e o sal. Reservamos. Lávase e despúntase a cabaciña, córtase en vertical e rélase coa monda. Resérvase. Mesturamos cunhas varas de bater os ovos co azucre até estaren escumosos. Engádese o aceite e o leite, batendo até integrárense. Incorpórase a cabaciña relada, remexendo con culler de pau. Engádese a mestura de fariña, cacao, lévedo e sal e mexemos até ficar ben homoxénea, sen bolos. Caldéase o forno a 200º C. Vértese a mestura nun molde engraxado con manteiga e enfórnase baixando a temperatura a 180º C. Debe cocer 30 min. Compróbase a cocción pinchando cunha agulla. Déixase arrefecer, retírase do molde e sérvese decorado con chocolate branco derretido ou azucre moído.