Xuízo político

Segunda longametraxe como director de Aaron Sorkin, gañador dun Óscar a Mellor Guión Adaptado por A rede social. Volve ao drama xudicial, xa tratado en Algúns homes bos (o seu primeiro guión), a través da adaptación do caso dos “7 de Chicago”, un flagrante proceso xudicial cheo de irregularidades coñecido nos EUA, mais non tanto fóra. O xuízo dos 7 de Chicago (The Trial of the Chicago 7) / Aaron Sorkin / EUA / 2020 / 129 min. Non é a primeira vez que se fai un filme sobre estes feitos. Os máis relevantes: Steal This Movie, biopic do activista Abbie Hoffman interpretado por Vincent D’Onofrio (e por Sacha Baron Cohen no de Sorkin); Chicago 10, un aclamado documental sobre o xuízo; e William Kunstler: Disturbin the Universe, documental sobre o avogado que levou o caso dos 7 de Chicago. Sete acusados que, en realidade, foron oito durante gran parte do xuízo; mais Bobby Seale, membro co-fundador dos “Panteras Negras”, foi absolto pouco antes da sentenza. Todos foron acusados de conspiración e incitación aos disturbios ocasionados a raíz da Convención Nacional do Partido Demócrata de 1968 en Chicago. Malia que se negase de forma belixerante, foi un xuízo político en toda regra iniciado coa administración Nixon contra varios membros de asociacións e simpatizantes de “extrema esquerda”, como eran alcumados pola fiscalía. O filme é unha clase maxistral de como desenvolver un drama xudicial con reparto coral sen decaer en ningún momento e mantendo o interese por todos e cada un dos personaxes. Dúas horas perfectas na que hai tempo para coñecer os feitos, as protagonistas, asombrarse, indignarse, rir a gargalladas, sorrir e, incluso, emocionarse. É, sen dúbida, outra das apostas de Netflix para arrasar nas nomeacións aos Óscar. O xuízo dos 7 de Chicago ambiéntase nos 60 pero coa clara pretensión de que repercuta na época actual. Despois de ver o filme enténdense mellor moito do acontecido nos últimos meses baixo a administración Trump: sinalización e persecución sistemática de todas as asociacións de esquerdas baixo a denominación “antifa”, a diferenza de trato policial entre manifestacións de “esquerdas” e as que asaltaron o Capitolio, o racismo endémico, a corrupción das institucións, a arbitrariedade xudicial e que, malia que o neguen, segue habendo xuízos políticos nos países occidentais. Parafraseando un dos cómplices de espallar unha das mentiras globais máis mortíferas... tampouco fai falla ir a desertos remotos ou montañas afastadas para atopar casos similares ao dos 7 de Chicago. Sen ir máis lonxe: o despropósito xudicial da “Operación Jaro”... Para cando o filme?