Todo o mundo ten un lado lamentábel

Partíame o eixe. Un humor que me marcou tanto, ou máis, que o de Faemino e Cansado. Souben que Guillermo Fesser tiña un irmán chamado Javier coa estrea de A milagre e P. Tinto que, por certo, escribiron xuntos. Pareceume tan boa e orixinal que non dubidei en ver as súas anteriores curtametraxes cando as puxeron en Canal+, se non lembro mal. Historias lamentábeis / Javier Fesser / 2020 / comedia / 129 minutos Logo fixo a adaptación a imaxe real de Mortadelo e Filemón. O que podía ser un desastre, nas mans dos Fesser foi maxia pura para os fans do tebeo de Ibáñez. Logo chegou Camino, xa sen Guillermo no guión, na que Javier demostra a súa calidade como cineasta nun inmenso drama arredor do Opus Dei. Javier Fesser estaba nun posto privilexiado no meu particular pedestal cinematográfico. Pero chegou Mortadelo e Filemón contra Jimmy "el Cachondo", secuela en versión animada que lle quitou A Esmorga de Ignacio Vilar o Goya a Mellor Guión Adaptado. Si, xa sei que non é culpa de Fesser... pero comezou a caerme mal. Algo que con Campións condicionoume á hora de vela pois, aínda que é xenial, non deixaba de procurarlle o máis mínimo fallo. Mesmo me alegrei de que non fose finalista aos Óscar. Si, lamentábel. Esta confesión que ocupa máis de media crítica vén propiciada após ver estas Historias lamentábeis, non só pola graza simple do título, senón porque me sentín un pouco coma as personaxes miserábeis que protagonizan as catro historias que conforman o filme. Mantendo un ton a medio camiño entre os seus primeiros traballos e os últimos, constrúe unha comedia sentimental de persoas con diferentes taras de comportamento: un entusiasta herdeiro a un imperio de transportes que só quere que o seu pai estea orgulloso del, un ríxido e metódico veraneante que se enfronta ao día máis desordenado das súa vida, unha muller que se aproveita dun africano sen papeis e un empresario adicto ao xogo que contrata unha empresa de enganos para que lle cree unha coartada fronte as súas irmás. Co selo inconfundíbel de Fesser, Historias lamentábeis rescata as longametraxes de episodios con máis sorrisos que risas e cunha trama ben trenzada que funciona a golpe de xiro argumental e que, ao remate, faise curta malia as dúas horas de duración. Ten prevista a estrea en salas comerciais, pandemia mediante, dentro do primeiro semestre de 2021.