Telelixo, corrupción e inxustiza

Hai 25 anos, na noite do 27 de xullo, estalou unha bomba que matou dúas persoas e feriu máis de cen durante un concerto das olimpíadas de Atlanta 96, e puideron ser máis se Richard Jewell non alertara dunha mochila sospeitosa que propiciou a evacuación. Inmediatamente foi recoñecido como un heroe nacional: entrevistas na tele, querían escribir un libro sobre el, aclamado coma unha estrela do rock... Mais unha combinación de mala sorte e xente sen escrúpulos fixo que pasase de heroe a presunto terrorista. Richard Jewell / Clint Eastwood / EUA / 2019 / 131 min O suceso conmocionou a sociedade norteamericana. Foi un escándalo de telelixo, acoso mediático e policial a Richard Jewell (Paul Walter Hauser), un íntegro e solícito garda de seguridade con aspiracións de axente da lei, e a súa nai (Kathy Bates). Unha incríbel historia baseada no artigo do Vanity Fair "American Nighmare: The Ballad of Richard Jewell" escrito por Marie Brenner. Desde o principio Jewell preséntase como un boy-scout bonachón, moi considerado e firme defensor da lei. A primeira vista semella o curmán listo de Forrest Gump, mais a súa única "tara" é ser boa xente. Non hai dúbida en ningún momento de que é inocente. O quid consiste en asistir atónitos como prensa, probas circunstanciais e opinións nesgadas poden pór en tamaño apuro a calquera persoa. Sabemos tamén que vai estoupar unha bomba durante o concerto, o que non sabemos é o momento. O control dos tempos na realización e a calma tensa durante o evento van na liña do mellor Harry Callahan. A profundidade, desenvolvemento e grao de grises dos personaxes é Eastwood en estado puro. Tanto os bos como os malos teñen o seu lado humano. Bates foi a única nomeada nos Óscar, mais chama a atención que Hauser non obtivera, cando menos, tamén un nomeamento. Á parte de engordar, aínda máis, para o personaxe, actúa tan natural que até pensas que non é un actor, senón que o tipo é así realmente... Mais non. Xusto chegar a esa simbiose é o súmmum do oficio da interpretación. Débenlle unha. Inicialmente o filme estaría protagonizado por Jonah Hill, no rol principal, e Leo DiCaprio, no de avogado –que foi parar para Sam Rockwell– pero ao final quedaron na produción. O filme seguro tería sido máis popular, e seguro que menos auténtico, tamén. Drama, thriller e un chisco de humor mestúranse nesta historia de poder, corrupción e inxustiza sobre o lado máis mesquiño do ser humano, pero tamén o lado máis amábel. Un seguro para incluír nun ciclo sobre os Xogos Olímpicos ou achegarse a ela de novo, ou vez primeira, porque si.