Segunda oportunidade

Era un segredo a voces que algo cheiraba a podre nos Globos de Ouro. As 87 persoas da Asociación da Prensa Estranxeira de Hollywood aceptaron agasallos durante anos a cambio de nomeacións, entre outras corruptelas... Scarlett Johansson, Tom Cruise ou Ricky Gervais plantáronlles cara. Amazon, Netflix ou a NBC boicoteáronos directamente. Ao final, como era de esperar, O poder do can gañou os principais premios da "non gala": Mellor Filme, Dirección e Actor de Reparto. Premios que se unen ao León de Prata a Mellor Dirección no Festival de Venecia, e que están á marxe de toda sombra de dúbida. Jane Campion adapta a novela de Thomas Savage, unha historia que levaba pululando por Hollywood desde hai unha morea de anos pero, por unha cousa ou por outra, ninguén a levara a bo porto... até agora. A trama céntrase en Phil Burbank (Benedict Cumberbatch), un rudo vaqueiro que leva un rancho xunto co seu irmán George (Jesse Plemons). Cando George casa coa viúva da vila (Kirsten Dunst), comezan os problemas con Phil, que non atura nin a súa cuñada nin o seu sensíbel fillo adolescente (Kodi Smit-McPhee). Un día Phil decide converter o rapaz nun home de verdade. Western atípico na liña de First Cow ou Slow West, westerns onde a sutileza, o cotiá e a sensibilidade mandan. Campion consegue impregnar dunha atmosfera case fantasmagórica o relato, centrándose nos momentos de soidade do protagonista, nos tempos mortos. Eses instantes en que está consigo mesmo, e que pode ser el mesmo. É un home que se nega con todas as forzas a saír do armario, pero non se nega a vivir as súas fantasías e fetichismos de portas para dentro. Atención á escena do pano. Cun simple anaco de tea, de iniciais bordadas, consegue unha prodixiosa escena tan erótica como evocativa. Como evocadora é a partitura do británico Jonny Greenwood que, probabelmente, levaría o Globo de Ouro se non competise coa colosal banda sonora que compuxo Hans Zimmer para o Dune de Villeneuve. O mesmo pasa con todo o elenco. Gañou Smit-McPhee, pero calquera podería ter gañado. Pero todas sabemos que os premios, en xeral, adoitan ser dunha grande inxustiza, aínda que os que leva recollido O poder do can son máis que merecidos. Ademais, en ocasións, grazas aos premios os filmes afortunados adoitan ter unha segunda vida nos cinemas. Así que, grazas os deostados Globos de Ouro O poder do can, actualmente en Netflix, poderase ver nos cinemas por tempo limitado, en concreto, nos Multicines Norte de Vigo. Unha oportunidade a non desaproveitar.