Mitos e lendas celtas en Irlanda

Estamos na segunda década do século XXI. Todo o cinema de animación está feito 3D... Todo? Non! Un grupo de irredutíbeis animadores irlandeses resiste, agora e sempre, ao invasor (Disney). Os estudos Cartoon Saloon, afincados en Kilkenny, mantéñense firmes na súa aposta por manter unha animación tradicional como marca distintiva, e moi recoñecíbel, sen rexeitar a espectacularidade nas súas propostas. E non lle vai nada mal... O segredo do libro de Kells, Song of the Sea ou The Breadwinner estiveron nomeadas aos premios Óscar. Wolfwalkers / Tomm Moore e Ross Stewart / Irlanda / 2020 / 85 min En Wolfwalkers retoma os mitos e lendas celtas de Song of the Sea cunha historia in crescendo na liña d’O segredo do libro de Kells, a crueldade dos contos dos irmáns Grimm e con referencias veladas a Brave ou A princesa Mononoke, nada menos... Se en Song of the Sea presentaba ás selkies (mulleres-foca), agora tócalle a quenda ás wolfwalkers, unha sorte de lobas curandeiras de aparencia humana capaces de falar e controlar as mandas de lobos e de transformarse en lobas en soños. Corre o ano 1650, despois da conquista de Irlanda por Cromwell, os ingleses controlan Kilkenny baixo o mandato do Lord Protector. Un soldado inglés chega á vila amurallada coa súa filla Robyn coa encomenda de acabar cos lobos da zona. Robyn quere ser como seu pai que, por certo, ten a voz de Sean Bean (O señor dos aneis, Xogo de Tronos) na versión orixinal, o cal, non quere dicir que vaia morrer... ou quizais si? En fin, o feito é que a filla quere ser coma o pai e ségueo ata o bosque onde topa con Mebh, unha nena wolfwalker de indomábel pelo roibo. Desde ese momento Robyn coñecerá un mundo máxico e cheo de posibilidades que, claro, cambiará a concepción que tiña dos lobos. O malo é que seu pai se resiste a cambiar e o inflexíbel Lord Protector tampouco cesará no seu empeño de exterminar os lobos a toda costa. Fantasía, mitoloxía, ecoloxismo, sororidade, amizade e unha potente mensaxe anti-caza danse na man neste conto para crianzas pero non demasiado pequenas ou sempre coa supervisión dunha persoa adulta, pois contén escenas un tanto violentas para segundo que idades. Espectacular na concepción artística e no nivel de detalle pero inferior ás interiores achegas de Cartoon Saloon até a data. As costuras de guión son demasiado evidentes e tampouco xoga ao seu favor o ser bastante predicíbel. Con todo, sabe xogar moi ben as súas bazas conseguindo manter o interese ao ir debullando pouco a pouco as regras e o misterio que envolve a trama. Un filme exclusivo de Apple TV+.