Marca de calidade

Até o de agora tiñamos as españoladas, as comedias francesas, as británicas, as de enredo, as parodias ianquis ou as comedias románticas. Cuñados ten todos os ingredientes para iniciar un novo subxénero: "a comedia galega", en maiúsculas. Cuñados / Toño López / Galiza / 2021 / 95 min. A trama céntrase en tres irmás (Iolanda Muíños, Eva Fernández e María Vázquez) que teñen unha bodega familiar e anuncian un novo viño nunha comida coa "matriarca" (Mela Casal). Eduardo (Miguel de Lira) pode arruinar todo por un problema co seguro. Pide axuda ao seu concuñado Sabonis (Xosé Antonio Touriñán) para que o acompañe arranxar uns papeis coa empresa de Alicia Zamora (Paku Granxa). Non se lles ocorre outra cousa que secuestrar a Modesto (Federíco Pérez Rey), cuñado desta. A cousa sae mal pero, ademais, a policía, que investigaba a Zamora, pon o foco agora sobre eles. Após triunfar coa serie Hierro, dos irmáns Coira, a produtora Portocabo coróase na súa primeira incursión na longametraxe cunha comedia de altura con certo aire a comedia francesa, toques de comedia de enredo e certas reminiscencias a Kusturica, en parte, por esa espectacular banda sonora, tan acaída, composta por Santi Jul e Iván Laxe, xunto varias cancións de Lamatumbá. Unha mestura regada con bo viño do país, polbo á feira e un equipo técnico e artístico propio que, lonxe de estereotipar (como si facía 8 apelidos vascos), logran desenvolver unha comedia con selo de calidade galega, de proxección internacional á que, probabelmente, comecen a caerlle sobre a mesa varias propostas de secuela e de remake. Toño López debuta na longametraxe para o cinema, aínda que xa fixera unha para televisión (Reliquias), ademais de dirixir series de éxito como Matalobos ou Auga Seca. En Cuñados demostra unha habilidade innata para a comedia prestando especial atención ás reaccións, expresións e miradas, algo esencial no xénero. O guión de Araceli Gonda é perfecto en ton, ritmo e xiros, incluso mellorado por Touriñán, Rey e Miguel de Lira, que non deixaron de improvisar sempre que tiveron ocasión. A secuencia da borracheira, con homenaxe á Esmorga incluída, é sublime. Xa que temos o Novo Cinema Galego consolidado a nivel internacional, e o galician noir como marca a nivel series, hai que deixar de ter medo ao cinema comercial e apostar por el. Comedia, aventuras, fantástico ou de ciencia ficción, cinema de xénero feito na Galiza no noso idioma tamén como marca de calidade. Cuñados, ademais de ser unha comedia para esmendrellarse de risa, abriu un camiño a seguir. Sigámolo pois.