Un home a un violín pegado

A magnética maneira de narrar do violinista, entre inocente e calma, deixa entrever que, tras esa mirada sincera e franca, hai unha experiencia vital terríbel que acabou forxando unha actitude relativista ante a vida... Pero esa cachaza retranqueira fainos dubidar que hai de verdade e que de conto no relato. Este documental, ademais de descubrirnos o lado máis humano do artista, confirma que todo o que conta nos shows non só é certo, senón que é moito máis interesante do que podiamos imaxinar. Ara malikian, unha vida entre as cordas / Nata Moreno / 2019 / 89 minutos Nata Moreno, consciente da incríbel historia da súa parella, viuno claro após ter acceso ao contido das máis de 20 caixas que recibiron na súa casa. Caixas que contiñan un inxente material gráfico e audiovisual desde que Ara tiña catro anos. Sobre esa multitude de fotografías, cintas VHS, súper8 e gravacións varias, Moreno constrúe este documental biográfico, que lle levou un lustro rematar, como un acto de amor ao seu marido, ao seu fillo (Kairo), á música e á vida... E tamén, de paso, serviu de diván catalizador para coñecer mellor esa obsesión polo violín dun home que tan só deixou de practicar un só día en 30 anos. Testemuños de diferentes amizades, familiares, colegas e xente que compartiu algún momento de vida con Ara dinamizan este asombroso relato melómano, antibélico e reivindicativo dun músico que chegou a Europa fuxindo da guerra con 14 anos, e deixou atrás a súa familia para enfrontarse só ao mundo cun violín baixo o brazo. As gravacións antigas solapadas con actuacións actuais (da mesma peza musical) son auténticos achados espazo-temporais que van apuntalando a verdadeira personalidade do xenio, ademais de achegar certa comicidade ao comprobar as tremendas pintiñas que gastaba Malikian cando era mozo... Moita atención tamén a esa versión improvisada da Macarena. Hilarante. Por suposto, hai unha morea de minutos musicais, actuacións e preparacións entre bambolinas, entre as que destacan as escasas pero potentes secuencias ficcionadas que demostran o portentoso potencial e talento como realizadora de Nata Moreno. Supervivente? Virtuoso? Nómade? Filósofo? O documental descobre a multitude de facetas dun home feito a si mesmo que logrou popularizar e achegar a música clásica a todo o mundo. Un home a un violín pegado.