De Galiza ás estrelas

Ruth Chao (Mondoñedo, 1976) leva máis dunha década dedicándose ao documental científico en xeral e, desde hai uns anos, leva virando a vista cara ás estrelas a través da súa produtora Somadrome. Unha traxectoria que foi determinante para que Hal Levinson, director científico, e a xeóloga e viceinvestigadora principal, Cathy Olkin, lles ofreceran facer un documental arredor dos preparativos dunha das fazañas de descubrimento máis importantes da historia da ciencia astronáutica: a 'Misión Lucy'. A 'Misión Lucy' é un proxecto da NASA, que tivo luz verde en xaneiro de 2017, co obxectivo de enviar unha sonda espacial ao puntos L4 e L5, onde se atopan uns asteroides troianos de Xúpiter que levan na mesma posición desde a orixe do Sistema Solar debido a un fenómeno de neutralización de forzas gravitacionais. O hándicap é que, para conseguilo, tiñan que enviar a sonda nunha breve fiestra de tempo de outubro de 2021. Unha conta atrás que non foi precisamente un camiño de rosas. A diferenza doutros documentais de Somadrome, máis centrados nos datos, A viaxe de Lucy, sen perder o rigor científico, achégase máis á narrativa de ficción ao engadir de maneira intelixente uns puntos de xiro que provocan certo grao de suspense até chegar a un clímax final que acaba contaxiando a ledicia do éxito conseguido. Isto tamén grazas ao tempo que se toma en que coñezamos as marabillosas persoas que hai detrás da misión (atención ao concerto/convención científica) e coas que consegue un grao de empatía pouco frecuente neste tipo de documentais. Os datos científicos achegados e como se van expoñendo satisfarán tanto a astrónomos e afeccionados, como a persoas neófitas na materia. Saímos do documental aprendendo que é un asteroide troiano, en que consiste a observación por “ocultación”, que son os puntos de Lagrange, en cantas fases de proxecto adoita traballar a NASA, a relación entre xeoloxía e astronomía e, ademais, melloraremos os nosos coñecementos en astrodinámica coa carambola deseñada arredor do Sol para que a sonda Lucy chegue aos seis asteroides troianos previstos nun período planeado de 12 anos. E todo deseñado ao milímetro. Abraiante. Un documental científico que logra espertar o entusiasmo e a paixón pola astronomía e que se estreou en pantalla grande, que é onde se debe ver, en maio de 2023 na Cidade da Cultura de Compostela. Mágoa que non se estreara aínda en salas. Opta aos Mestre Mateo como máxima favorita pero, ao igual que a 'Misión Lucy', tampouco vai ser un camiño de rosas.