Fluír sombrío baixo ceo cuberto

Cando o sarxento (a voz da razón) abandona temporalmente o lugar, esquécense dos obxectivos encomendados e desátase a inconsciencia, as hormonas e as ganas de divertirse inherentes á súa idade. Comezan a aflorar entón certas rivalidades latentes que irán derivando en liortas irracionais e actitudes violentas. Cando a refén foxe, xorde o caos. Monos | Alejandro Landes | 2019 | 102 minutos | Colombia-Arxentina O guión, que o propio Landes escribiu xunto ao director arxentino Alexis Dos Santos, está empapado do espírito de William Golding (O señor das moscas), pero tamén do de Joseph Conrad (O corazón das tebras) e do "mito da caverna" de Platón. A violencia do ser humano nun microcosmos sen regras (sen adultos), que abranguería a primeira parte do filme, deriva nunha viaxe cara á tolemia e o horror, na segunda. Certamente unha mestura inquietante. Landes sabe combinar á perfección ambos os ingredientes conseguindo un filme orixinal e imposíbel de predicir, onde os brotes de furia animal, no fondo, conteñen un punto de beleza natural moi semellante ao de estar presenciando un documental de feras salvaxes en acción. A maioría de actrices e actores teñen pouca ou nula experiencia cinematográfica. Só Julianne Nicholson (Eu Tonya) e Moisés Arias (O xogo de Ender) son intérpretes profesionais contrastados. Landes tamén logra sacarlle o máximo partido á autenticidade que achega o elenco novo conxugado coas táboas de Nicholson e Arias. De feito, "a novata" Sofía Buenaventura (alcumada "Rambo" no filme) é unha das máis destacadas. A inestabilidade enfermiza e as tensións emocionais están brillantemente apuntaladas pola banda sonora atonal que a compositora londiniense Mica Levi constrúe a partir da máis variada gama de sons sintetizados e timbais. Unha música inquietante que se mete nos miolos e permanece gravada a lume nese subconsciente musical capaz de recoñecer calquera melodía con apenas un par de notas. Levi obtivo premio no Festival Internacional de Cine Independente de Bos Aires (BAFICI). O filme acadou tamén un amplo percorrido festivaleiro internacional, destacou o Premio Especial do Xurado "World Cinema" en Sundance. Probabelmente Hollywood non tarde en facer o pertinente remake desta impresionante e complicada obra rodada a 4.000 metros de altitude e no medio da xungla colombiana.