#EuTamén. Calar ou denunciar

Con O escándalo, Jay Roach semella querer esquecer o seu pasado de comedias absurdas e afianzar esa senda de "director serio" e "oscarizábel". O guión de Charles Randolph (gañador dun Óscar por A gran aposta) está baseado na caída de Roger Ailes, director executivo de Fox News, polos numerosos casos de abuso sexual e acoso a varias traballadoras da cadea. Non estamos ante unha representación fidedigna do acontecido, senón dunha dramatización inspirada en feitos reais, pero coas pertinentes licenzas cinematográficas e algúns cambios de nomes, co fin de preservar o anonimato das vítimas, cousa que xa se advirte ao principio do filme. O escándalo Bombshell | Canadá-EUA | 2019 | Jay Roach | 108 minutos John Lithgow (Ricochet) ponse na pel do magnate televisivo, ou mellor dito... nas próteses. Enorme labor do departamento de maquillaxe para lograr esa hiperrealista transformación facial, merecedora dun BAFTA e dun Óscar. Se na crítica de O irlandés vaticinaba que a xente de maquillaxe e perrucaría tiña os días contados por mor do rexuvenecemento facial dixital, retráctome desde xa após ver o impresionante nivel de perfección acadado polo equipo de Kazu Hiro (que xa gañara outro Óscar pola transformación de Gary Oldman/Winston Churchill en A hora máis escura). Verdadeiramente dá a sensación de que John Lithgow engordou e sacou papada. Coido que non hai mellor maneira de definilo. Nicole Kidman, Margott Robbie e Charlize Theron interpretan tres xeracións de mulleres acosadas e abusadas por Ailes. Tanto Robbie como Theron (que tamén produce) teñen unhas interpretacións equilibradas e honestas que lles valeron nomeamentos aos Óscars, arrebatados por Laura Dern (Historia dun matrimonio) e Renée Zellweger (Judy), respectivamente. Boas interpretacións, caracterizacións que non parecen caracterizacións e unha historia necesaria compensan unha dirección, en ocasións, errática. Sen ser un filme redondo, consegue poñer de manifesto o complicado proceso (mental, mediático e xudicial) de dar o paso para denunciar un acoso sutil e "non violento" dun home, en aparencia agradábel e boa persoa, que utiliza a súa posición de poder para que as mulleres que queiran ascender ou, simplemente, acadar un posto mellor, se vexan obrigadas a facer actos sexuais non desexados.