Equilibro case perfecto

A saga Evangelion chega á súa fin cun memorábel broche de ouro que, ademais, conta cunha particular curiosidade. Co auxe das plataformas de visionado baixo demanda estabamos acostumados a que moitos filmes pasasen brevemente polas salas comerciais antes de seren pasto das plataformas. Incluso comezaron ser habituais as estreas canceladas. Pero chegou Arxentina 1985 resistindo en salas durante varias semanas ao mesmo tempo que estaba dispoñíbel en Amazon. Parecía ser o inicio dunha convivencia frutífera para ambas frontes, pero agora, o último filme de Hideaki Anno dá un paso máis: despois de estar máis dun ano dispoñíbel na plataforma de Jeff Bezos, estrea por todo o alto en cinemas. Evangelion: 3.0+1.01 Thrice upon a time / Hideaki Anno / Xapón / 2021 / 154 min Desde o inicio, a produción de Evangelion: 3.0+1.01 Thrice Upon a Time foi bastante insólita. Despois de varios contratempos, a produción comezou de maneira oficial en 2016, despois de que Anno rematara Shin Godzilla. De primeiras tiña en mente delegar ao máximo, pero axiña quixo recuperar o control, asumindo tarefas directamente e impregnando todo co seu lendario perfeccionismo. Un director tan obsesivo que até Hayao Miyazaki dixo que "derrama sangue polos seus filmes". Esta dedicación pódese apreciar e degustar en cada fotograma, pero de seguro que fixo perder varios anos de vida aos produtores. Tras un breve recordatorio do acontecido "anteriormente", a trama comeza nun París devastado polo Terceiro Impacto. Misato e o seu grupo anti-NERV deben restaurar a cidade. A historia continúa no Pobo-3, un dos poucos asentamentos a salvo da nucleización. Vida rural, natureza e supervivencia mestúranse cos intentos de Rei "Idéntica" por entender a vida e sacar da depresión de cabalo que ten Shinji, mentres Asuka agarda o momento propicio para volver á base e impedir que se produza o Cuarto Impacto e o Plan de Complementación Humano. Non só estamos ante un anime de ciencia ficción mecha de robots xigantes e referencias bíblicas random, consta dun profundo estudo freudiano dos personaxes xunto decenas de capas de complexas subtramas que van desde a intrahistoria até o romanticismo máis sensibleiro, pasando pola filosofía humanista. Un equilibro case perfecto entre a parte dramática e brutalidade da acción desbordante. Espectáculo visual de primeiro nivel co mellor, máis detallista e arriscado Hideaki Anno tirando dun conceptualismo semellante ao de Spider-man: un novo universo, sobre todo na parte final. Unha xoia que non defrauda nin a horda de fans, nin a consumidoras ocasionais de anime.