Corrupción nas elites

Vaca Films segue fiel á súa cita anual co thriller dando oportunidade, desta volta, a un dos cineastas máis en voga do momento: Jorge Coira. O de Rábade comezou fogueándose en series como Terra de Miranda, As leis de Celavella ou Padre Casares, e dirixiu para a gran pantalla as comedias O ano da carracha, 18 comidas e a extraordinaria Eroski-Paraíso, xunto a Xesús Ron. Pero non foi até o éxito da serie Hierro, creada polo seu irmán Pepe Coira, que a produtora coruñesa decidiu apostar por el despois de varios anos traballando de montador de filmes tan potentes como O descoñecido e A sombra da lei e, tamén, na primeira tempada da serie A Unidade. Código emperador / Jorge Coira / Galiza / 2022 / 106 min. Jorge Coira traduce en imaxes outro gran guión de Jorge Guerricaechevarría (Celda 211, As leis da fronteira) apostando por unha linguaxe audiovisual ben coñecida para o gran público, prescindindo de grandes alardes técnicos nas escenas dramáticas pero sen escatimar un ápice nas secuencias de acción, que pouco teñen que envexar ás made in Hollywood. Consegue un equilibrado thriller dramático centrado na vida privada dun axente dos servizos secretos españois, ao tempo que se atreve mostrar a corrupción que conecta os poderes políticos, os xudiciais e os deportivos. Luis Tosar métese na pel deste axente da policía patriótica, chamado Juan, especializado en "limpar" a reputación das elites. Un personaxe similar ao mítico "Sr. Lobo" de Pulp Fiction, pero centrado nas altas esferas e tamén máis habituado a manchar as mans que o interpretado por Harvey Keitel. Os ideais de Juan comezan a virar cando namora dunha asistenta filipina que utiliza para ter vixiada á parella para a que traballa, implicada nun perigoso negocio de tráfico de armas. Xenial Alexandra Masangkay, actriz catalá que xa impresionaba en O foxo, de Galder Gaztelu-Urrutia, e que semella estar destinada a roles moito máis aló dos étnicos. Entre o elenco secundario destacan tamén a televisiva Georgina Amorós (Élite), o coruñés Denis Gómez (O veciño), o lalinense Fran Lareu (Tres), o vigués Santi Prego (Mentres dure a guerra) ou a impagábel participación do veterano Miguel Rellán, nun papel merecedor de spin-off. Aí o deixo. Código Emperador é un thriller turbio, con grandes interpretacións e moi ben executado, que, aseguran, está "baseado en feitos reais". E debe ser certo, pois as historias de políticos investigados, xuíces corruptos e deportistas maltratadores soan... e moito. Só lles faltou meter fíos arredor da Casa Real, pero iso igual o reservan para a secuela.