Contradicións

Agnieszka Holland volve ao cinema un ano despois de Mr. Jones con outra historia inspirada en feitos reais e tamén ambientada a principios do século XX. Charlatán (&Scaron;arlatán) / Agnieszka Holland / República Checa-Irlanda-Polonia-Eslovaquia / 2020 / 118 min. Charlatán centra a trama en Jan Mikolá&scaron;ek, un afamado curandeiro checo experto en plantas medicinais cunha insólita habilidade para diagnosticar enfermidades a través da observación, a ollo, da urina. Centos de persoas facían cola a diario diante da súa casa ou lle enviaban mostras por correo para que Mikolá&scaron;ek lles receitara algunha das súas fórmulas maxistrais. A través de flash backs vaise deconstruíndo o personaxe interpretado por Ivan Trojan remontándose á súa xuventude (co rostro de Josef Trojan, o propio fillo do actor). Descubrimos como adquiriu a súa destreza de curandeiro ao longo dos anos e tamén os porqués dese carácter frío, caprichoso e manipulador que ten de maior (na década dos 50). Tamén é un home pragmático e filántropo, un home respectado por todo o mundo, ou case... Mikolá&scaron;ek tivo unha vida con tantas luces como sombras. Axudou a grandes membros do partido comunista e alongou a vida a moita xente coas súas apócemas e ungüentos, pero tamén tratou os nazis. Para el só eran pacientes, nunca lle importou a ideoloxía ou carné de partido, só salvar vidas. Algo que o protexeu durante moitos anos pero deixou un estigma imperecedoiro. O seu don era unha mestura de coñecementos en botánica, adquiridos na súa etapa de xardineiro, e os "estudos" ao lado dunha curandeira de aldea. Mikolá&scaron;ek acabou mellorando esta técnica adaptando o cobro en especies da curandeira polo cobro en cartiños, os cales lle proporcionaron unha mansión e manter un status acorde cos seus desexos, pero tamén acabaron pondo nervioso o goberno checo que o acusou de charlatán estafador. Marek Epstein inclúe varias licenzas no guión para darlle máis profundidade e interese, se cabe, ao personaxe. Ten un gran romance co seu asistente Frantisek Palko (Juraj Loj) mais oculta a súa sexualidade, tanto para manter as aparencias de home respectábel como tamén, claro, porque era ilegal naquela época. A historia de amor funciona á perfección. Un romance cheo de baixas paixóns, celos e traizóns ao que Holland consegue impregnar dunha química impecábel á parella Trojan-Loj facendo que a súa relación resulte absolutamente críbel. A factura, por momentos televisiva, non embaza esta magnífica historia arredor da complexidade do ser humano, as súas contradicións internas e de como, ao final, o único que nos salva é o amor... aínda que doa.