O compositor para o cine por antonomasia

Xenio. Virtuoso. Visionario. Ennio Morricone é un dos máis grandes compositores de todos os tempos. Deixounos hai dous anos, aos 91, cunha envexábel lucidez. Giuseppe Tornatore puido conversar con el antes, neste documental sobre a súa figura, conducido de primeira man polas lembranzas do propio Ennio e complementadas con testemuños das persoas que pasaron pola súa vida. Todas elas cun punto en común: unha grande admiración polo Mestre. Ennio: o mestre / Giuseppe Tornatore / Italia / 2021 / 156 min. Estando tras a cámara un cineasta como Tornatore, xa podemos intuír que non vai ser un documental a cámara fixa con entrevistas monótonas. A narrativa é dinámica. Foxe dos conformismos. Montaxe áxil que alterna testemuños con imaxes de arquivo, gravacións ou filmes nos que participou. Unha acaída selección coa inigualábel música de Morricone sempre soando. Comeza con eloxios ao seu legado de diversas facianas coñecidas da música e do cinema para, a continuación, entrar de forma cronolóxica na súa biografía: desde os seus inicios, até tocar os ceos... De cativo quería ser médico, pero seu pai, trompetista de profesión, obrigoulle a aprender música. Logo estudou composición. As súas orixes humildes non lle puxeron as cousas doadas, quizais, e por iso se esforzaba máis que o resto. Iniciouse facendo arranxos musicais para a RCA en traballos para programas de televisión ou cantantes de sona. Pronto Ennio comezou a ser recoñecido no mundiño. Logo chegaron os primeiros filmes, máis tarde Sergio Leone e os spaghetti westerns. A partir de aí, a fama internacional. Todo o mundo podía recoñecer os sons atonais que mesturaban coros, asubíos e instrumentos pouco habituais. Con todo, a crítica especializada aínda tardaría 20 anos en recoñecerlle a súa xenialidade. Imposíbel abarcar as máis de 500 obras que compuxo ao longo da súa prolífica vida, mais Tornatore tamén aborda as pezas, mal chamadas "menores", de filmes de segunda categoría nos que Morricone podía ser máis creativo e mellorar como compositor. Unha vida dedicada á música, unha música imperecedoira, eterna. Entre as admiradoras de Morricone atopamos xente como Joan Baez, Dulce Pontes, Pat Metheny, Quincy Jones, Springsteen, Hans Zimmer, John Williams, Tarantino, Clint Eastwood, Wong Kar-Wai, Dario Argento, Liliana Cavani e, claro, o propio Tornatore, entre un longo etcétera de nomes que encherían sen problema o espazo taxado deste artigo. Se non puideches gozar Ennio: o Mestre en pantalla grande no pasado mes de maio, tes desde onte unha nova ocasión grazas aos cinemas Numax de Compostela.