Charlie e Nicole, unha separación

Fillo de críticos de cinema, foise curtindo en filmes de baixo orzamento e colaborando con grandes como Wes Anderson, co que escribiu os guións de Life Aquatic e Fantástico Sr. Fox (nada menos). Foi a raíz de Unha historia de Brooklyn (nomeada a Mellor Guión nos Óscar) cando comezou despuntar como gran promesa; pero non foi até Frances Ha, xunto Greta Gerwig, musa e cineasta do cinema indie, que comezou a afianzar o presaxio. Historia dun matrimonio | 2019 | Reino-Unido-EUA | Noah Baumbach | 137 minutos Historia dun matrimonio apunta a filme cumio da súa carreira e supón o seu segundo “filme Netflix” após The Meterowitz Stories hai dous anos. O guión está baseado na súa propia experiencia no proceso de divorcio con Jennifer Jeson Leigh en 2013. Un guión autobiográfico no fondo pero non nas formas, ao estilo Woody Allen. Neste caso o alter ego de Baumbach sería Adam Driver e a súa ex esposa estaría encarnada por Scarlett Johansson. Evidente que vai predominar o punto de vista masculino (do director), pero hai que recoñecer que tampouco descoida a visión feminina. De feito agradécese a crítica que fai ao proceso xudicial patriarcal. Na trama Driver é un afamado director de teatro e Johansson unha actriz de segunda sempre á sombra do seu marido. A historia comeza co proceso de separación iniciado, desde cando intentan unha solución amigábel até que entran nun tortuoso proceso xudicial onde tratarán de non sacarse os ollos, pese aos consellos dos seus respectivos avogados: Laura Dern, Alan Alda e Ray Liotta. Os puntos fortes máis destacábeis descansan no mimo co que están definidas as respectivas personalidades no guión, tanto da parella protagonista como das personaxes secundarias. Baumbach consegue que as discusións parezan improvisadas cando non é tal: todo está escrito. Un logro acadado a base de repetición (unhas cincuenta tomas para a escena máis potente do filme) e a montaxe soberbia de Jennier Lame (Manchester á beira do mar) da que semella que se esqueceron nos Globos de Ouro, de onde si vén de gañar o premio a Mellor Actriz de Reparto (Laura Dern) dos seis que optaba. Ecos de Kramer contra Kramer (1979, Robert Benton) e Secretos dun matrimonio (1974, Ingmar Bergman) nunha historia eminentemente romántica, pese a todo. Baumbach vai debruzando o traumático proceso da separación, con fillo de por medio ademais, pero dunha maneira suavizada, sen descoidar a comedia (xenial Julie Hagerty) e demostrando que, aínda separados, o amor prevalece aí... nalgures.